ރާލެވިފައިވާ މީހުންނާއި ގޮތް ނުއެނގޭ ގޮތަށް މަރުވެފައިވާ މީހުންގެ މަރުގެ މައްސަލަތައް ބަލަން ރައީސުލްޖުމްހޫރިއްޔާ އުފެއްދެވި ކޮމިޝަނުން ބަލަން ހުރި މައްސަލަތަކުގެ އަދަދު މިޙާރުވެސް 29 ކަމަށާއި އަމާޒަކީ 2 އަހަރަށްވުރެ ކުރު މުއްދަތެއްގަ ބަލައި ނިންމުން ކަމަށް ކޮމިޝަނުގެ ރައީސް ޙުސްނުއްސުޢޫދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ދެއްވަމުން ޙުސްނުއްސުޢުދު ވިދާޅުވީ މައްސަލަތައް ހުށަހަޅަން ބޭނުންވާ މީހުންނަށް 30 ދުވަހުގެ މުއްދަތެއް ދެއްވާނެ ކަމަށާއި އެއިރުން ބަލަންޖެހޭ މައްސަލަތައް އިތުރުވެގެން ހިނގައިދާނެ ކަމަށް ބެލެވޭ ކަމަށެވެ. އަދި ކޮމިޝަނުން މަސައްކަތް ކުރާނީ ހުރިހާ މައްސަލަތަކަކަށްވެސް އިސްކަން ދީގެން ކަމަށާއި އެއްފަހަރާ 40 ވަރަކަށް މައްސަލަ ބެލުމުގެ ޤާބިލުކަން ކޮމިޝަނަށް ލިބިފައިވާ ކަމަށެވެ.
ޙުސްނުއްސުޢޫދު ވިދާޅުވީ މައްސަލަތައް ބަލަމުން ގެންދާއިރު ހާމަކުރެވެން ހުންނަ މައުލޫމާތުތައް ހާމަކުރަމުން ގެންދާނެ ކަމަށާއި ސިއްރުކުރާނީ ހެކި ކަމަށެވެ. "ކޮމިޝަނުން މަސައްކަތް ކުރާނީ މިހާރުވެސް އަމަލުކުރާ ޖިނާޢީ އިޖުރާތުގެ ޤާނޫނުގެ ތެރޭގަ. ހައްޔަރުކުރަން ޖެހޭ މީހުން ހައްޔަރުކުރާނީ ފުލުހުން. ކޮމިޝަނަށް މިނިވަންކަމާއިއެކު މަސައްކަތް ކުރެވޭނެ ޤާނޫނެއް ފާސްކުރަން ވަރަށް އަވަހަށް ހުށަހަޅަން މަސައްކަތް ކުރަން."
ޙުސްނުއްސުޢޫދު ވިދާޅުވީ ކޮމިޝަނުގެ މަސައްކަތްތަކަށް އެހީތެރިވެދޭން ޝައުޤްވެރިވާ ޤައުމުތަކާއި ޖަމާއަތްތައް އެބަހުރިކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެފައިވާ ކަމަށާއި އެފަރާތްތަކުގެ އެހީތެރިކަމާއި ރާއްޖޭގައި ތިބި ތަޖުރިބާކާރުންގެ އެހީތެރިކަން ހޯއްދަވާނެ ކަމަށެވެ.
ޙުސްނުއްސުޢޫދު ވިދާޅުވީ މައްސަލަތައް ތަހްޤީޤް ކުރަން ބޭނުންވާ ޓެކްނިކަލް މަސައްކަތްތައް ކުރިއަށް ގެންދާނީ އެ ފެސިލިޓީތައް ހުރި ދައުލަތުގެ މުއައްސަސާތަކުން ކަމަށާއި ކޮމިޝަނުގެ މަސައްކަތަކަށް ވާނީ މިހައިތަނަށް ކުރި ތަޙްޤީޤްތަކުގައި ނުނިންމައި ކަމެއް ހުރިކަމަށް ކަމެއް ފާހަގަކުރެވިއްޖެނަމަ އެކަމެއް ފުރިހަމަކުރުން ކަމަށެވެ. އަދި މައްސަލަތައް ޝަރީއަތަށް ފޮނުވަމުން ގެންދާނީ ޖިނާޢީ އިޖުރާތުގެ ޤާނޫނުތަކުގެ ތެރެއިން ކަމަށެވެ.
