މަރާލެވިފައިވާ މީހުންގެ މައްސަލަތަކާއި ގޮތް ނުއެނގޭ ގޮތަށް މަރުވެފައިވާ މީހުންގެ މައްސަލަތައް ބަލަން ރައީސުލްޖުމްހޫރިއްޔާ އުފެއްދެވި ކޮމިޝަނަށް މައްސަލަ ހުށަހެޅުމުގެ ފުރުޞަތު މާދަމާ ހުޅުވާލާނެ ކަމަށް އެކޮމިޝަނުން ބުނެފިއެވެ.
ފުރުޞަތު ހުޅުވައިލަނީ މާދަމާއިން ފެށިގެން 30 ދުވަހުގެ މުއްދަތަށެވެ. ކޮމިޝަނުން ބަލަން ހަމަޖެހިފައިވަނީ 1 ޖަނަވަރީ 2012 އިން ފެށިގެން ހިނގާފައިވާ ކަންކަމުގެ މައްސަލަތަކެވެ.
ރައީސުލްޖުމްހޫރިއްޔާގެ އޮފީހުގައި ކޮމިޝަނުގެ ރައީސް ޙުސްނުއްސުޢޫދު ވިދާޅުވީ މަރާލެވިފައިވާ ބައެއް މީހުންގެ މައްސަލަތަކާއި ބައެއް މުއައްސަސާތަކުގެ އިހްމާލުން މަރުވެފައިވާ ބައެއް މީހުންގެ މައްސަލަތައް ނުބަލައި ދޫކޮށްލާފައިވާ ކަމުގެ ޝަކުވާ އެބަހުރި ކަމަށާއި އެ ފަދަ މައްސަލަތައް ބައްލަވާނެ ކަމަށެވެ. އަދި މީގެ ފަހުން އެފަދަ ކަންކަން ނުހިނގާނެ ގޮތަށް މުއައްސަސާތަކުގެ ކަންކަން އިންތިޒާމުކުރަން ގޮތްތަކެއް ކޮމިޝަނުން ސަރުކާރަށް ހުށަހަޅާނެ ކަމަށެވެ.
މ. ސްނޯރޯޒްގައި މަރުވެފައި ތިއްބައި ފެނުނު ދެމަފިރިންގެ މަރުގެ މައްސަލަ އަކީ ރިޟްވާން ގެއްލުވައިލުމާއި ގުޅުންހުރި މައްސަލައެއްގެ ގޮތުގައިވެސް ސޯޝަލް މީޑިއާގައި ވަނީ މައުލޫމާތު ފެތުރިފައެވެ. ލިބެންޖެހޭ ފަރުވާ ނުލިބި ޖަލުތަކުގައި މަރުވި ބައެއް މީހުން މަރުވި މައްސަލަތަކަކީވެސް ޖަވާބު ބޭނުންވާ މައްސަލަތަކެއްގެ ގޮތުގައި ގިނަ ބައަކު ދަނީ ފާހަގަކުރަމުންނެވެ.
ރައްޔިތުންގެ މިފަދަ ގިނަ ސުވާލުތަކަކަށް ޖަވާބު ބޭނުންވެފައިވާއިރު ކޮމިޘަނުގެ ތެރެއިން މިފަދަ ކަންބޮޑުވުންތަކަށް ޖަވާބު ހޯދުމުގެ ފުރުޞަތު މާދަމާ ހުޅުވައިލުމުން ބޮޑު ތަރްޙީބެއް ލިބިގެންދާނެ ކަމަށް ވަނީ ބެލެވިފައެވެ.
