މުޙައްމަދު ރަސޫލް (ﷺ) ދުނިޔެއަށް އުފަންވެވަޑައިގަތީ ކޮން ދުވަހަކު ކަމާއިމެދު ތާރީޚް ލިޔުއްވާ ބޭފުޅުން ވަނީ ޚިޔާލުތަފާތުވެފައެވެ. ނަމަވެސް އެކަލޭގެފާނު ސުވަރުގެވަޑައިގަތީ ރަބީޢުލް އައްވަލް މަހުގެ 12 ވަނަ ދުވަހު ކަމާއި މެދުގައި ހުރިހާ ބޭފުޅުންވެސް އިއްތިފާޤްވެލައްވައެވެ.
އަނެއްކޮޅުން ރަސޫލާ (ﷺ) ދުނިޔޭގައި ހޭދަކުރެއްވެވި 63 އަހަރުތެރޭގައި އެއްވެސް ގޮތަކަށް އެކަލޭގެފާނުގެ އުފަން ދުވަސް ފާހަގަ ކުރައްވަވާފައެއް ނުވެއެވެ. އަދި އެކަލޭގެފާނުގެފަހުން ހެޔޮ ޤަރުނުތަކުގެ ބޭފުޅަކު މިފަދަ ކަމެއް ކުރައްވާފައެއް ނުވެއެވެ.
ވީމާ ރަބީޢުލްއައްވަލް މަހުގެ 12 ދުވަހަކީ ރަސޫލާ (ﷺ)ގެ ޢީދު މީލާދު ނުވަތަ އުފަން ދުވަސް ކަމަށް ބަލައިގެން އެދުވަސް ފާހަގަކުރާނަމަ އެތައް ނުބައެއް އެކަމުގައި އެބަ ވެއެވެ. އެގޮތުން:
1 ރަސޫލާ (ﷺ)ގެ އުފަން ދުވަސް ނޫން ދުވަހެއް އެދުވަސް ކަމަށް ބަލައިގެން ދޮގުމައުލޫމާތު ފެތުރުން
2. ރަސޫލާ (ﷺ) ކުރައްވަވާފައި ނުވާ ކަމެއް ދީނުގެ ތެރެއަށް ވެއްދުން
3. ރަސޫލާ (ﷺ) މިދުނިޔެ ދޫކުރެއްވެވިއިރުގައި ވެސް ދީން ފުރިހަމަ ނުވާކަމަށް ޤަބޫލުކުރުން
4. ރަސޫލާ (ﷺ) މިދުނިޔެއާއި ވަކިވެވަޑައިގެންނެވި ދުވަހަކީ މަތިވެރި ދުވަހަކަށް ހަދައި އެދުވަސް ފާހަގަ ކުރުން.
ވީމާ ބިދްޢަވެރި ކަންތައްތަކުން ދުރުހެލިވުމަށް ނަޞޭޙަތްތެރިވަމެވެ.
- ޑރ. މުޙައްމަދު އިޔާޟް ޢަބްދުއްލަޠީފް
