ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި ޚާރިޖީ ވަޒީރަކަށް ޢައްޔަނުކުރައްވަވާފައިވަނީ ރާއްޖޭގެ ޚާރިޖީވަޒީރުކަން ރައީސް މައުމޫނުގެ ސަރުކާރުގައިވެސް ކުރައްވާފައިވާ ޢަބްދުﷲ ޝާހިދު އެވެ. އެހެންކަމުން މިއީ އެމަނިކުފާނު ޚާރިޖީ ވަޒީރުކަން ކުރައްވާ ދެވަނަ ފަހަރެވެ.
ޢަބްދުﷲ ޝާހިދަކީ ބޭރު ޤައުމުތަކާއި ވަރަށް ގާތް ގުޅުމެއް އޮންނަ އަދި ބައިނަލްއަޤްވާމީ ޖަމާއަތްތަކާއި ދުނިޔޭގެ ގިނަ އަދަދެއްގެ ލީޑަރުންނާއިވެސް ގާތް ގުޅުމެއް އޮންނަ ބޭފުޅެކެވެ.
ޢަބްދުﷲ ޝާހިދު ވަނީ ރައްޔިތުންގެ މަޖިލީހުގައި ވ. އަތޮޅާއި ރަކީދޫ ދާއިރާ ހެންވޭރު އުތުރު ދާއިރާ ތަމްސީލުކުރެއްވުމުގައި ދިގު މުއްދަތެއް ހޭދަ ކުރެއްވުމުގެ އިތުރުން ރައްޔިތުންގެ މަޖިލީހުގެ ރައީސްކަންވެސް ކުރައްވައިފައެވެ. އަދި ރައީސުލްޖުމްހޫރިއްޔާގެ އޮފީހުގެ އިސް މަޤާމުތައްވެސް ފުރުއްވައިފައެވެ.
ޢަބްދުﷲ ޝާހިދަކީ ވަރަށް މާނަފުން ބަސްތައް ބޭނުންފުޅު ކުރައްވައިގެން ސިޔާސީ ޕޯޑިއަމްތަކުގައި ވާހަކަފުޅު ދައްކަވާ ބޭފުޅެކެވެ. ރިޔާސީ އިންތިޚާބުގެ ކެންޕޭނުގައި ވިދާޅުވަމުން ގެންދެވީ "ހިބަރު މިހާރު ވަނީ ވަދުގައި ޖެހިފައި" ކަމަށާއި ދެން ސަލާމަތް ނުވެވޭނެ ކަމަށެވެ. "ހިބަރު ވަނީ ތައްޓުމަތީގައި" ކަމަށާއި ތެޅިފޮޅުނު ވަރަކަށް ދާނީ ހުޅުނބު ކަމަށެވެ.
ރައީސް ޔާމީނު ޖަލުގައި ބަންދު ކުރެއްވި މަޖިލިސް މެންބަރުންގެތެރޭގައި ޢަބްދުﷲ ޝާހިދުވެސް ހިމެނިވަޑައިގަންނަވައެވެ.
