ދިވެހިރާއްޖެއާއި ޖަޕާނާ ދެމެދު އޮތް ބަދަހި ގުޅުމުގެ ތެރެއިން، ސަލާމަތީ ދާއިރާއިން ރާއްޖެއަށް އެހީތެރިކަން ފޯރުކޮށްދިނުމާ ގުޅޭގޮތުން ޖަޕާން ސަރުކާރުން މަޝްވަރާކުރަމުންދާކަން ޚާރިޖީ ވަޒީރު އިރުތިޝާމް އާދަމް ހާމަކުރައްވައިފިއެވެ. ވަޒީރު މިކަން ހާމަކުރެއްވީ ރާއްޖޭގައި ޖަޕާނުގެ އެމްބަސީ ޤާއިމުކުރިތާ 10 އަހަރު ފުރުން ފާހަގަކުރުމުގެ ގޮތުން ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ރަސްމިއްޔާތުގައި ވާހަކަފުޅު ދައްކަވަމުން ވަޒީރު އިރުތިޝާމް ވިދާޅުވީ، ދެޤައުމުގެ ދެމެދުގައި އޮތް ދިގު ތާރީޚީ އެކުވެރިކަމަށް ބަލާއިރު، ޖަޕާނަކީ ރާއްޖޭގެ އިޖުތިމާއީ އަދި އިޤްތިޞާދީ ތަރައްޤީގެ އެންމެ މުހިންމު އެއް ބައިވެރިޔާ ކަމުގައެވެ. އަދި ދިވެހިންގެ ދިރިއުޅުމާ ގުޅިފައިވާ އެތައް ކަމެއްގައި ޖަޕާނުގެ ދެމެހެއްޓެނިވި އެހީތެރިކަން އަބަދުވެސް ލިބެމުންދާކަން އެކަމަނާ ފާހަގަކުރެއްވިއެވެ.
ޖަޕާނުގެ އެހީތެރިކަމުގެ މުހިންމު އުސްއަލިތަކަށް އަލިއަޅުއްވާލައްވަމުން، 1989 ވަނަ އަހަރު ބިނާކުރި މާލޭގެ ބޭރުތޮށިގަނޑަކީ އެހީތެރިކަމުގެ އެންމެ ބޮޑު ރަމްޒުކަން ވަޒީރު ފާހަގަކުރެއްވިއެވެ. އުދައެރުމާއި ބޮޑެތި ރާޅުތަކުން މާލެ ރައްކާތެރިކޮށްދިން މި ތޮށިގަނޑުގެ މުހިންމުކަން، 2004 ވަނަ އަހަރުގެ ސުނާމީ ކާރިސާގައި ލިބުނު ގެއްލުންތައް ކުޑަކުރުމުގައި ވަނީ ސާބިތުވެފައެވެ.
މީގެއިތުރުން، 1980 ގެ އަހަރުތަކުގައި ރާއްޖޭގެ އެކި ކަންކޮޅުތަކުގައި ސްކޫލްތަކާއި ތަޢުލީމީ މަރުކަޒުތައް ބިނާކޮށްދިނުމަށް ޖަޕާނުން ވެދިން އެހީގެ ފައިދާ، މިއަދުވެސް ދިވެހި އެތައް ޖީލަކުން ލިބިގަންނަމުންދާކަމަށް ވަޒީރު ވިދާޅުވިއެވެ.
ހަމައެއާއެކު، ޖަޕާން އޯވަސީސް ކޯޕަރޭޝަން ވޮލަންޓިއަރުން ދިވެހި މުޖުތަމަޢުތަކާ ގުޅިގެން، ދިވެހި ސަގާފަތް ދަސްކޮށް، އެބޭފުޅުންގެ ހުނަރާއި ތަޖުރިބާ ހިއްސާކުރައްވަމުން ގެންދަވާ މަސައްކަތަކީ ދެޤައުމުގެ އިޖުތިމާއީ ގުޅުން އިތުރަށް ބަދަހިކޮށްދޭ ވަރަށް އަގުހުރި މަސައްކަތެއްގެ ގޮތުގައި ވަޒީރު އިރުތިޝާމް ވަނީ ސިފަކުރައްވާފައެވެ.
