ނުކުޅުދުންތެރިކަން ހުންނަ ފަރާތްތަކަށް މުޖުތަމަޢުގައި ހަމަހަމަ ފުރުޞަތުތައް ހޯދައިދެއްވުމަކީ ޚާއްސަ އިސްކަމެއް ދެއްވާ ކަމެއްކަމަށާއި، އެފަދަ ފަރާތްތަކަށް ދިމާވާ ގޮންޖެހުންތަކަށް ވީއެންމެ އަވަހަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ރައީސް މިހެން ވިދާޅުވީ "ރައްޔިތުންގެ އަޑު" ޕްރޮގްރާމްގެ ތެރެއިން އާންމު ރައްޔިތަކު ހިއްސާކުރި ކަންބޮޑުވުންތަކަށް ޖަވާބުދެއްވަމުންނެވެ. އެ މަނިކުފާނު ފާހަގަކުރެއްވި ގޮތުގައި ސަރުކާރުގެ އަމާޒަކީ ވަކި ވަކި ކުދިންނަށް އެކަނި ނޫން، މުޅި މުޖުތަމަޢަށްވެސް އޭގެ ފައިދާކުރާނެ ގޮތަށް ކަންކަން ފަހިކޮށްދިނުމެވެ.
"ތިވިދާޅުވި ހުރިހާ ކަމަކަށް އަޅުގަނޑު އެޑްރެސްކުރާނަން. ވީއެންމެ ރަނގަޅަކަށް ވީއެންމެ އަވަހަކަށް އެ ކަންކަމުގައި ވަކި ކުއްޖަކަށް ނޫން، މުޅި މުޖުމަޢުއަށް ފައިދާވާނެ ގޮތަކަށް ކަންކަން ފަހިވާން އަޅުގަނޑު ބޭނުމީ،" ރައީސް ވިދާޅުވިއެވެ.
މި ޕްރޮގްރާމްގައި ޑައުންސިންޑްރޯމް ހުންނަ ކުއްޖެއްގެ ބެލެނިވެރިއެއް ކަމަށްވާ ފާތިމަތު ފައިރޫޒާ އާދަމް ވަނީ އޭނާގެ ދަރިފުޅަށާއި ޚާއްސަ އެހީއަށް ބޭނުންވާ އެހެން ކުދިންނަށް ދިމާވާ ދަތިތައް ރައީސާ ހިއްސާކޮށްފައެވެ. އެގޮތުން ތަޢުލީމީ ނިޒާމުގެ ތެރެއިންނާއި ކުޅިވަރުގެ ދާއިރާއިން ކުރިމަތިވާ ތަފާތުކުރުންތަކުގެ ވާހަކަ އޭނާ ފާހަގަކުރިއެވެ. ކުޑައިރު ބޭނުންވި ސްކޫލުން ފުރުޞަތު ނުލިބުމާއި، ކްލާސްރޫމްތަކުގައި އެކަށީގެންވާ ވަރަށް ސަމާލުކަން ނުލިބުމުގެ އިތުރުން ބޯހިޔާވަހިކަމާއި ތެރަޕީ ހޯދުމުގައި ހުރި ދަތިތައްވެސް ފައިރޫޒާ ހިއްސާކުރިއެވެ.
މި ކަންކަމަށް އަލިއަޅުއްވާލައްވަމުން ރައީސް ވަނީ ނުކުޅުދުންތެރިކަން ހުންނަ ކުދިންނަށް އެކަށީގެންވާ ތަޢުލީމީ އިންތިޒާމުތަކާއި ޚިދުމަތްތައް ތަފާތުކުރުމެއްނެތް ގޮތެއްގައި ފޯރުކޮށްދިނުމަށް ސަރުކާރުން މަސައްކަތް ކުރައްވާނެ ކަމުގެ ފުރިހަމަ ޔަގީންކަން ދެއްވާފައެވެ.
