އަންނަ ދިރާސީ އައު އަހަރުގެ ކިޔެވުން ޖެނުއަރީ 17، ގައި ފަށާގޮތަށް ހަމަޖައްސައި، ތަޢުލީމީ ވުޒާރާއިން ވަގުތީ އެކަޑަމިކް ކަލަންޑަރު އާންމުކޮށްފިއެވެ.
އާންމުކުރި ވަގުތީ ކަލަންޑަރުގައިވާ ގޮތުން ފުރަތަމަ ޓާމްގެ މިޑް ބްރޭކް ލިބޭނީ މެއި 16 އިން 22 އަށެވެ. އަދި ފުރަތަމަ ޓާމްގެ ކިޔެވުން ނިންމައި ދަރިވަރުންނަށް ބޮޑު ޗުއްޓީ ލިބޭނީ ޖުލައި 16 އިން 31 އަށެވެ. ދެވަނަ ޓާމްގެ ކިޔެވުން އޯގަސްޓް 1 ގައި ފަށާއިރު، އަހަރީ ބޮޑު ޗުއްޓީއަށް ސްކޫލްތައް ބަންދުވާނީ ޑިސެމްބަރު 10 އިން ފެށިގެން 2028 ވަނަ އަހަރުގެ ޖެނުއަރީ 4 ގެ ނިޔަލަށެވެ. އަދި 2028 ވަނަ އަހަރުގެ ދިރާސީ އައު އަހަރުގެ ކިޔެވުން ފެށުމަށް ހަމަޖެހިފައިވަނީ ޖެނުއަރީ 9 ގައެވެ.
ވަގުތީ ކަލަންޑަރުގައި ވާގޮތުން، ފުރަތަމަ ޓާމްގައި ސްކޫލް ބަދަލުވުމުގެ ފުރުސަތު ހުޅުވާލާނީ މެއި 9 އިން ޖޫން 10 އަށެވެ. އަދި ދެވަނަ ޓާމްގައި ސްކޫލް ބަދަލުވުމުގެ ފުރުސަތު އޮކްޓޫބަރު 10 އިން ނޮވެމްބަރު 9 އަށް ހަމަޖައްސާފައިވާއިރު، އަލަށް ސްކޫލަށް ކުދިން ވެއްދުމުގެ މުއްދަތަކީ ޖުލައި 4 އިން އޯގަސްޓް 31 އަށެވެ.
މީގެ އިތުރުން، އަންނަ އަހަރުގެ ކަލަންޑަރުގައި އާންމުކޮށް ކިޔަވައިދޭ ދުވަސްތަކާއި އެއް ދަންފަޅިއަށް ކިޔަވައިދޭނެ ދުވަސްތައް ވެސް ވަނީ ވަކިކޮށްފައެވެ. އެގޮތުން ކުޑަކުދިންގެ ދުވަހާއި ޓީޗަރުންގެ ދުވަސް ފާހަގަކުރުމަށް ހަމަޖެހިފައިވަނީ އެއް ދަންފަޅިއަށް ކިޔަވައިދޭ ދުވަސްތަކުގެ ގޮތުގައެވެ.
