އިސްލާމްދީނާއި ގުޅޭގޮތުން އަސްލާއި ޚިލާފު ވާހަކަތަކެއް ދައްކައިގެން މުރުތައްދުވެފައިވާ، ޖުޑިޝަލް ސާވިސް ކޮމިޝަން (ޖޭއެސްސީ) ގެ ކުރީގެ މެމްބަރު އައިޝަތު ވެލެޒިނީ ގެ ސިއްޙީ ހާލަތަށް ރިއާޔަތްކޮށް، އޭނާއަށް ދޭންޖެހޭ ސިއްޙީ ފަރުވައެއްވާނަމަ އެފަރުވާއެއް ލިބޭނެ އިންތިޒާމު މޯލްޑިވްސް ޕޮލިސް ސާވިސް އިން ހަމަޖައްސާނެ ކަމުގެ ޔަގީންކަން އެއިދާރާއިން ދީފިއެވެ.
މިކަމާއި ގުޅިގެން ފުލުހުން މިއަދު ނެރުނު ބަޔާނެއްގައި ބުނެފައިވަނީ ގާނޫނީ ގޮތުން ވެލެޒިނީއަށް ލިބެންޖެހޭ އެންމެހާ ޙައްޤުތައް އޭނާއަށް ކަށަވަރު ކޮށްދޭނެ ކަމަށާއި ތުހުމަތު ކުރެވޭ މައްސަލައިގެ މަތިން އޭނާ ހައްޔަރު ކޮށްފައިވަނީ ކުށުގެ ތުހުމަތުގައި ހައްޔަރުކޮށް ބަންދު ކުރެވޭ މީހުންނާއިމެދު އަމަލު ކުރުމަށް ދިވެހި ރާއްޖޭގެ ގާނޫނުތަކާއި ގަވާއިދުތަކުގައި ކަނޑައަޅައި ބަޔާން ކޮށްފައިވާ އިޖުރާއަތްތަކާ އެއްގޮތްވާ ގޮތުގެ މަތީން ކަމަށެވެ.
ގިނަ ދުވަސްތަކެއް ވަންދެން ރާއްޖެއިން ބޭރުގައި އުޅުނުއިރު ވެލެޒިނީ ވަނީ އޭނާގެ ފޭސްބުކް އާއި ޓްވިޓާ މެދުވެރިކޮށް އިސްލާމް ދީނުގެ އަސްލާއި ޚިލާފު އެތަކެއް ވާހަކަތަކެއް ދައްކާފައެވެ. ރަސޫލުކަމަށް ދައުވާކޮށް އިސްލާމްދީނުގެ އުސޫލުން ބޭރުން ވާހަކަތަކެއް ދައްކާފައިވުމުން، އޭނާއަކީ މުރުތައްދުވެފައިވާ މީހެއް ކަމަށް އިސްލާމިކް މިނިސްޓްރީގެ އިލްމުވެރިންގެ މަޖިލިހުން ވެސް ވަނީ ކަނޑައަޅައިފައެވެ.
ރާއްޖެއިން ބޭރުގައި އުޅުމަށްފަހު ވެލެޒިނީ އެނބުރި ރާއްޖެ އައިސްފައިވަނީ އިއްޔެއެވެ. ކޯޓު އަމުރެއްގެ ދަށުން އޭނާ ހައްޔަކު ކޮށްފައިވަނީ ރޭ 19:26 ހާއިރެވެ.
ވެލެޒިނީ ހައްޔަރު ކުރުމާއެކު، އޭނާއަކީ ނަފްސާނީ ބައްޔެއް ހުރި މީހެއްކަމަށް ބުނެ ބައެއް މީހުން ދަނީ އޭނާ މިނިވަން ކުރުމަށް ގޮވާލާ އަޑުއުފުލަމުންނެވެ. އަދި މިކަމާއި ގުޅިގެން ފުލުހުންނަށް ވެސް ބައެއް މީހުންވަނީ ފާޑުކިޔުންތައް އަމާޒުވެފައެވެ.
