ރައީސް ޔާމީނުގެ ސަރުކާރުން ފާސްކޮށް އަމަލުކުރަމުން އައި އަބުރުގެ ޤާނޫނު އުވާލައިފިއެވެ. އުވާލަން ވޯޓުދިނީ 38 މެންބަރުންނެވެ. އުވާ ނުލުމަށް ވޯޓުދިނީ 13 މެންބަރުންނެވެ.
ބިލް އުވާލަން ހުށަހެޅުއްވި މަޖިލީހުގެ ހެންވޭރު އުތުރު ދާއިރާގެ މެންބަރު ޢަބްދުﷲ ޝާހިދު މިއަދުވެސް ވިދާޅުވީ އެ ޤާނޫނަކީ ރައީސް ޔާމީނުގެ ސަރުކާރުން ކުރަމުން ގެނދިއަ ވައްކަންތައް ފޮރުވުމަށްޓަކައި އެކަންކަމުގެ ވާހަކަތައް މީޑިއާތަކުން ހާމަކުރުން ހުއްޓުވުމަށް ފާސްކޮށްފައިވާ ޤާނޫނެއް ކަމަށެވެ.
ޝާހިދުވިދާޅުވީ ސަރުކާރުން ކުރާ ވައްކަންތަކާއި އަނިޔާވެރި ކަންކަން ފޮރުވުމަށްޓަކައި މީޑިއާތަކަށް ހުރަސްއެޅުމަކީ ޚުދުމުޚުތާރު އަނިޔާވެރި ވެރިން ކުރާ ކަމެއް ކަމަށާއި މިއަދު ފެނިގެން މިދިއައީ އިންތިޚާބީ ރައީސް އިބްރާހީމް މުޙައްމަދު ޞާލިޙަކީ އެފަދަ ކަންކަން ކުރައްވާނެ ބޭފުޅެއް ނޫންކަން ކަމަށެވެ.
ޝާހިދު ވިދާޅުވީ މިއަދު އުވާލެވުނު ޤާނޫނުގެ ސަބަބުން މީޑިއާތައް މިލިއަން މިލިއަނުން ޖުރުމަނާ ކުރެވުނު ކަމަށާއި ނޫސްވެރިންގެ ލޯތަކަށް ކަރުނަ ގޭސް ޖަހައި ހިފައި ހައްޔަރުކޮށް ޖަލަށް ލެވުނު ކަމަށެވެ. ނަމަވެސް މިއަދު އެ ޤާނޫނު އުވައިލުމުން އެފަދަ އަނިޔާތައް ކުރުން ނިމުމަކަށް އައީ ކަމަށެވެ.
ޝާހިދު ވިދާޅުވީ އަބުރުގެ ޤާނޫނު އުވާލުމަށް މިއަދު ފާސްކުރި ބިލް ރައީސް ޔާމީން ތަޞްދީޤް ނުކުރައްވައިފި ނަމަ އިންތިޚާބި ރައީސް ހުވާ ކުރެއްވުމަށްފަހު ފުރަތަމަ ތަޞްދީޤް ކުރައްވާ ބިލަކަށް އެބިލު ހައްދަވާނެ ކަމަށެވެ. އަދި އެއީ އިންތިޚާބީ ރައީސަށް ލިބިވަޑައިގަންނަވާނެ ފަޚުރެއް ކަމަށެވެ.
