5 ދައުރު، 25 އަހަރު މަޖިލީހުގައި ޚިދުމަތް ކުރައްވައިފިން ކަމަށާއި މިއަދަކީ މަޖިލީހުގެ މެންބަރެއްގެ ގޮތުން ފަހު ދުވަސް ކަމަށް ހެންވޭރު އުތުރު ދާއިރާގެ މެންބަރު ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު ވިދާޅުވީ މަޖިލީހުން ވަކިވެވަޑައިގަންނަވަނީ އިންތިޚާބީ ރައީސްގެ ސަރުކާރުގެ މަޤާމެއްގައި ޚިދުމަތް ކުރައްވަން ކަމަށެވެ. "އަޅުގަނޑު މަޖިލީހުގައި ޚިދުމަތްކުރި، ވ. އަތޮޅު، ރަކީދޫ ދާއިރާ، އަދި ހެންވޭރު ދާއިރާގެ ރައްޔިތުންނަށް އަދި މަޖިލީހުގައި އެއްބާރުލުން ދެއްވި މެންބަރުންނަށް ނިހާޔަތަށް ޝުކުރު ދަންނަވަން."
ޝާހިދު ވިދާޅުވީ 25 އަހަރަށްފަހު މަޖިލިސް ދޫކުރައްވަނީ އަސަރާއިއެކުގައި ކަމަށާއި ނަމަވެސް އަބަދުވެސް ދެމިހުންނަވާނީ އިޚްލާޞްތެރިކަމާއިއެކު ރައްޔިތުންނަށް ޚިދުމަތް ކުރެއްވުމުގައި ކަމަށެވެ. "އަޅުގަނޑާއި އިންތިޚާބީ ރައީސް ޙަވާލުކުރެއްވި ކޮންމެ މަޤާމެއްގައިވެސް މިހުރީ ޚިދުމަތް ކުރަން ތައްޔާރަށް."
މަޖިލީހުގެ ރައީސްކަން ކުރެއްވި ދުވަސްވަރަށް އިޝާރާތްކުރައްވައި ވިދާޅުވީ އެއިރުވެސް ކަންކަމުގައި އަމަލުކުރައްވާފައި ވާނީ އިލާހީ އެންގެވުންތަކާއި އެއްގޮތަށް ކަމަށެވެ. އެހެންކަމުން ހުރިހާ މައްސަލަތަކެއްވެސް ވަނީ ޙައްލު ކުރެއްވެވިފައި ކަމަށެވެ.
ޝާހިދު ވިދާޅުވީ މަޖިލީހުގައި ހޭދަކުރެއްވި މުއްދަތަށް ބައްލަވައިފިނަމަ މަޖިލީހަށް ވަޑައިގަތުމުން އެމަނިކުފާނާއި އިންތިޚާބީ ރައީސް އިބްރާހީމް މުޙައްމަދު ޞާލިޙް މަޖިލީހުގެ ފާރުމަތިން ބޭރުކޮށްލެވުނު ދުވަހަކީ ހަނދުމަފުޅުގައި ހަރުލާފައިވާ ދުވަހެއް ކަމަށެވެ.
ޝާހިދުގެ ރައީސްކަމުގައި އެންމެ ފާހަގަކުރެވޭ ކަމެއްގެ ގޮތުގައި ފާހަގަ ކުރެވޭ ކަންކަމުގެ ތެރޭގައި ރައީސް ޑރ. މުޙައްމަދު ވަޙީދު ޙަސަން ރިޔާސީ ބަޔާން އިއްވަވަން ކުރިމަތިވެވަޑައިގެންނެވި ހުރަސްތައް ފާހަގަކުރެވެއެވެ.
