މި ހިނގާ 2019 ވަނަ އަހަރު އޯލެވެލް ނިންމި ދަރިވަރުންގެ ތެރެއިން ކުރިއަށްދާނެ ރޮގެއް ހިޔާރުކުރުމުގައި އެހީތެރިކަން ބޭނުންވާ ދަރިވަރުންނަށް އަމާޒުކޮށް ވިލާ ކޮލެޖުން ކެރިއަގައިޑެންސް ޕޮރޮގްރާމެއް މިއަދު ފަށައިފި އެވެ.
ވިލާ ކޮލެޖުން މައުލޫމާތު ދިން ގޮތުގައި، އެކޮލެޖުގައި މިއަދު ފެށި މިޕޮރޮގްރާމް މި މަހުގެ 24 ވާ ބުރާސްފަތި ދުވަހުގެ ނިޔަލަށް ކުރިއަށްދާނެއެވެ.
މިޕްރޮގްރާމު ކުރިއަށް ގެންދިއުމަށް ނިންމާފައިވަނީ ކޮންމެ ދުވަހަކު މެންދުރުފަހު 14:00 އިން ހަވީރު 17:00 އަށް ކަމަށާއި މިޕްރޮގްރާމު ކުރިއަށްދާއިރު ކޮންމެ ކުއްޖަކަށްވެސް އެކުއްޖަކު ކުރިއަށް ދާން ބޭނުންވާ ދާއިރާއެއް ޚިޔާރުކުރުމުގައި އިލްމީ ނަޒަރަކުން އެހީތެރިކަން ފޯރުކޮށްދޭނެ ކަމަށް ވިލާ ކޮލެޖުން ބުނެފައިވެއެވެ.
މީގެއިތުރުން ވިލާ ކޮލެޖުން ބުނެފައިވަނީ މި ޕޮރޮގްރާމްގައި މައުލުމާތު ދެއްވާނީ ތަފާތު ދާއިރާތަކުގެ ތަޖުރިބާކާރު ބޭފުޅުން ކަމަށެވެ.
މިޕޮރޮގްރާމްގެ އިތުރުން އޯލެވެލް ނިންމި ދަރިވަރުންނަށް ވިލާ ކޮލެޖުން ފުރުސަތު ދިނުމަށްޓަކައި އެ ކޮލެޖުން ޖެނުއަރީ އިންޓޭކްގައި ފަށާ ކޯސްތަކުގައި ބައިވެރިވުމުގެ ފުރުސަތު ވެސް މިއަދު ވެސް ހުޅުވާލާފަ އެވެ. މިފުރުސަތު މިހާރު ހުޅުވާލާފައިވަނީ މިމަހުގެ 31 ވަނަ ދުވަހުގެ ނިޔަލަށް ކަމަށްވެސް ވިލާ ކޮލެޖުން ވަނީ ބުނެފަ އެވެ.
