އައްޑޫ ސިޓީއާއި ފުވައްމުލައް ސިޓީގެ ފެނާއި ނަރުދަމާގެ ޚިދުމަތް މާލެ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އާ ހަވާލުކުރުމަށްޓަކައި ވާންޖެހޭ ތައްޔާރީތަކާ ގުޅޭ ފްރޭމްވޯކް އެއްބަސްވުމެއްގައި ފެނަކަ ކޯޕަރޭޝަނާއި އެމްޑަބްލިޔުއެސްސީއާ ދެމެދު ސޮއިކޮށްފިއެވެ.
އެމްޑަބްލިޔުއެސްސީން ހާމަކޮށްފައިވާ ގޮތުގައި މި އެއްބަސްވުމުގެ ދަށުން އައްޑޫ ސިޓީގެ ގުޅިފައިވާ ރަށްތަކާއި، ހުޅުދޫ އަދި މީދޫގެ އިތުރުން ފުވައްމުލައް ސިޓީގެ ފެނާއި ނަރުދަމާގެ ޚިދުމަތް އެ ކުންފުނީގެ ދަށަށް ބަދަލުކުރުމަށް ވަނީ ހަމަޖެހިފައެވެ.
މި އެއްބަސްވުމުގެ މައިގަނޑު މަޤްޞަދަކީ ދެ ސިޓީގެ ރައްޔިތުންނަށް މެދުކެނޑުމެއްނެތި، އިތުބާރުހުރި ފެނާއި ނަރުދަމާގެ ޚިދުމަތެއް ފޯރުކޮށްދިނުން ކަށަވަރުކުރުމާއެކު، އިންތިޒާމުވެގެން ޚިދުމަތްތައް ބަދަލުކުރުމުގެ މަރުހަލާ ކުރިއަށް ގެންދިއުމަށް މަގުފަހިކުރުމެވެ.
