އިސްލާމް ދީނަށް ފުރައްސާރަކުރާ މީހުންނާ މުރުތައްދުވެ އިސްލާމް ދީނަށް ގޮންޖަހަމުންދާ މީހުންނަށް ދައުލަތުގެ ކަމާއިބެހޭ މުއައްސަސާތަކުން ޙައްޤު އަދަބު ނުދޭނަމަ އެމީހުން ހައްޔަރުކުރަން އިސްލާމިކް މިނިސްޓަރު ރައްޔިތުންނާއެކު ނުކުމެވަޑައިގަތުމަށް ޝައިޚް ޖަޢްފަރު ފާއިޒް ގޮވާލައްވައިފިއެވެ.
ޝައިޚް ޖައްފަރު ވިދާޅުވީ ކޮންމެ ޤައުމެއްގައިވެސް އެންމެ ބާރުގަދަ ފަރާތަކީ ރައްޔިތުން ކަމަށާއި ރާއްޖޭގައި އިސްލާމް ދީން ހިމާޔަތް ކުރުމަށާއި އެހެން ދީނަކަށް ފުރުޞަތު ނުދިނުމަށް ކުރާ ކޮންމެ މަސައްކަތެއްގައިވެސް ރައްޔިތުންގެ ބިޔަ ލަޝްކަރު އޮންނާނީ އިސްލާމިކް މިނިސްޓަރުގެ ފަހަތްޕުޅުގައި ކަމަށެވެ.
ޝައިޚް ޖަޢްފަރު ފާއިޒް ވިދާޅުވީ އިސްލާމިކް މިނިސްޓްރީން މިކަމުގައި ފޭލިވާނަމަ ދެން އަޅަންޖެހޭ ފިޔަވަޅުތައް އެޅުމަކީ ދީނީ ޢިލްމުވެރިންގެ މައްޗަށް އޮތް ވާޖިބެއް ކަމަށެވެ. އަދި މިކަމުގައި ދައުލަތުގެ މުއައްސަސާތައް ފޭލިވަމުންދާނަމަ ނުކުމުވަޑައިގަންނަވަން ދީނީ ޢިލްމުވެރިންނަށް މަޖުބޫރުވާނެ ކަމަށެވެ.
ޝައިޚް ޖައްފަރު ފާއިޒު ވިދާޅުވީ ފާއިތުވި 900 އަހަރުވެސް ދިވެހި ރައްޔިތުން ވަނީ އިސްލާމް ދީން ޙިމާޔަތްކުރުމުގައި ނަމޫނާ ދައްކާފައި ކަމަށާއި މިހާރުވެސް ތިބީ ހަމަ އެގޮތުގައި ކަމަށެވެ. ޚިޔާލުތަފާތުވެގެން އުޅެނީ ވަރަށް މަދު މީސްކޮޅެއް ކަމަށާއި އެމީހުން މައްސަލަ ޙައްލުކުރަން ޖެހޭ ކަމަށެވެ. ނޫންނަމަ ދެން އުފެދޭ މައްސަލަތައް ޙައްލުކުރަން މާއުނދަގޫވާނެ ކަމަށެވެ.
ޝައިޚް އިލްޔާސް ވެސް ވަނީ މިފަދަ މޭރުމަކުން މިއަދު ބަޔާންކުރައްވަވައިފައެވެ. ޝައިޚް އިލްޔާސް މިއަދު ވިދާޅުވީ އިސްލާމް ދީނަށް ފުރައްސާރަކުރުމާއި މުރުތައްދުވުން ފަދަ ކަންކަން ކުރުމާއި އަޅުގަނޑުމެންގެ މާތް ނަބިއްޔާ (ޞޢވ) އަށް ބަދު ބަސް ބުނުމަކީ މުސްލިމުންގެ ލެޔާއި ކުޅެލުން ކަމަށެވެ. އެހެންކަމުން އެފަދަ ކަންކަން ކުރާ މީހުންނަށް ކަމާއިބެހޭ ފަރާތްތަކުން ފިޔަވަޅު އެޅުމަކީ އެ ފަރާތްތަކުގެ ޒިންމާއެއް ކަމަށާއި އަދި އެފަދަ ފަރާތްތަކާއިމެދު ފިޔަވަޅު ނުއެޅުމަކީ މުޖުތަމައުގެ އަމާންކަން ގެއްލޭނެ ކަމެއް ކަމަށެވެ.
