ފިންލޭންޑާއި ސްވިޒަރލެންޑް އަދި އަޒަރުބައިޖާނުން ރާއްޖެއަށް ކަނޑައެޅުއްވި އާ ސަފީރުން, ސަފީރުކަމުގެ ފަތްކޮޅު، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް މިއަދު އަރުވައިފިއެވެ.
ފިންލޭންޑްގެ އާ ސަފީރު، ސަފީރުކަމުގެ ފަތްކޮޅު އަރުވާފައިވަނީ މިއަދު މެންދުރުކުރީގައި ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައެވެ. ފަތްކޮޅު އެރުއްވުމަށްފަހު، ރައީސުލްޖުމްހޫރިއްޔާ، ފިންލޭންޑްގެ އާ ސަފީރާ ބައްދަލުކުރައްވައި، ސަފީރަށް ތަހުނިޔާ ވިދާޅުވިއެވެ. އަދި ރާއްޖެއާއި ފިންލޭންޑާ ދެޤައުމުގެ ދެމެދުގައި އޮތް ގުޅުން، ފިންލޭންޑްގެ އާ ސަފީރުގެ ދައުރުގައި އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މި ބައްދަލުކޮށްލެއްވުމުގައި ފިންލޭންޑްގެ ސަފީރުވަނީ ރައީސުލްޖުމްހޫރިއްޔާ އިބްރާހީމް މުޙަންމަދު ޞޯލިޙް، ރައީސުލްޖުމްހޫރިއްޔާކަމުގެ މަޤާމާ ހަވާލުވެވަޑައިގަތުމާއި ގުޅިގެން އެމަނިކުފާނަށް މަރުޙަބާ ވިދާޅުވެފައެވެ. އަދި ސަފީރުވަނީ ކުރިއަށްއޮތް ތާނގައި ދެޤައުމުގެ ގުޅުން އިތުރަށް ބަދަހިވެގެންދާނެކަމަށް އުންމީދުކުރައްވާކަމުގައި ވިދާޅުވެފައެވެ.
މިބައްދަލުކޮށްލެއްވުމުގައި މިސްޓަރ ހަރޯ ކަމަރައިނެން އިތުރަށް ދެއްކެވި ވާހަކަފުޅުގައި ފިންލޭންޑްގެ ތައުލީމީ ނިޒާމަކީ އެންމެންވެސް ބަލައިގަންނަ ފެންވަރުރަނގަޅު ނިޒާމެއްކަން ފާހަގަކުރައްވާފައިވެއެވެ. އަދި އެމަނިކުފާނު ވަނީ އެފަދަ ތަޢުލީމީ ނިޒާމެއް ރާއްޖޭގައި ޤާއިމުކުރުމަށް އެހީތެރިވެދިނުމަށް ތައްޔާރަށްއޮތްކަން ފާހަގަކުރައްވައިފައެވެ. މީގެއިތުރުންވެސް އެޤައުމުން ރާއްޖެއަށް އެހީތެރިކަން ފޯރުކޮށްދެވެންހުރި އެހެނިހެން ދާއިރާތަކުން އެހީތެރިކަން ފޯރުކޮށްދެއްވާނެކަމުގެ ޔަޤީންކަން ސަފިރުވަނީ ރައީސުލްޖުމްހޫރިއްޔާއަށް އަރުވާފައެވެ. ޚާއްސަ ގޮތެއްގައި ތިމާވެއްޓާ ރައްޓެހި ސާފު ޓެކްނޮލޮޖީއާއި ޞިއްޙީ ޚިދުމަތްތައް ޑިޖިޓަލްކޮށް ފޯރުކޮށްދިނުމަށް އެހީތެރިކަން ފޯރުކޮށްދިނުމުގައި ތައްޔާރަށް އޮތްކަމުގައިވެސް އެމަނިކުފާނު ވިދާޅުވިއެވެ.
ސްވިޒަރލެންޑް އާ ސަފީރު، ސަފީރުކަމުގެ ފަތްކޮޅު އަރުވާފައިވަނީ މިއަދު މެންދުރުއެވެ. ފަތްކޮޅު އެރުއްވުމަށްފަހު، ރައީސުލްޖުމްހޫރިއްޔާ، ސްވިޒަރލެންޑް އާ ސަފީރާ ބައްދަލުކުރައްވައި، ސަފީރަށް ތަހުނިޔާ ވިދާޅުވިއެވެ. މި ބައްދަލުކުރެއްވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ ރާއްޖެއާއި ސްވިޒަރލެންޑާއި ދެމެދުގައި އޮތް ގުޅުމަށް ވަރަށް ބޮޑު އަހައްމިއްޔަތުކަމެއް ރާއްޖެއިން ދެއްވާކަން ފާހަގަކުރައްވަމުން ހޭންސްޕީޓަރ މޮކްގެ ސަފީރުކަމުގެ ދައުރުގައި ރާއްޖެއާއި ސްވިޒަރލެންޑާ ދެމެދުގައިވާ 38 އަހަރުފުރެން ގާތްވެފައިވާ މިގުޅުން އިތުރަށް ބަދަހިވާނެކަމަށް އުއްމީދުކުރައްވާކަމުގައި ވިދާޅުވެފައެވެ.
މި ބައްދަލުކުރެއްވުމުގައި، ސްވިޒަރލެންޑްގެ އާ ސަފީރު ދެއްކެވި ވާހަކަފުޅުގައި އެމަނިކުފާނުގެ ސަފީރުކަމުގެ ދައުރުގައި ދެޤައުމުގެ ގުޅުން އިތުރަށް ބަދަހިވެގެންދާނެކަމަށް އުންމީދުކުރައްވާކަމުގައި ވިދާޅުވިއެވެ.
މިމޭރުމުން ވާހަކަފުޅު ކުރިޔަށްގެންދަވަމުން ރައީސުލްޖުމްހޫރިއްޔާއާއި ސްވިޒަރލެންޑްގެ އާ ސަފީރު ވަނީ ބައިނަލްއަޤްވާމީ މައިދާނުގައި ދެޤައުމުންވެސް ޤަބޫލުކުރާ ހަމަތަކާ އެއްގޮތްވާގޮތުގެ މަތިން ދެ ޤައުމުންވެސް އެކުގައި މަސައްކަތްކުރުމަށް ޝައުޤުވެރިވާކަން ފާޅުކުރައްވައިފައެވެ. މިގޮތުން، ދެބޭފުޅުންވެސް ވަނީ އިންސާނީ ޙައްޤުތައް ރައްކާތެރިކުރުމާއި ޑިމޮކްރަސީއާއި، ތިމާވެށި ރައްކާތެރި ކުރުމާއި ގުޅުންހުރި ދާއިރާތަކުން އިތުރަށް ގުޅުން ބަދަހިކުރެއްވުމާ ބެހޭގޮތުން މަޝްވަރާކުރައްވައިފައެވެ.
ރައީސުލްޖުމްހޫރިއްޔާ މިބައްދަލުވުމުގައި އިތުރަށް ދެއްކެވި ވާހަކަފުޅުގައި، ސްވިޒަރލެންޑާއެކު ވިޔަފާރީގެ ރޮނގުން ގުޅުން ބަދަހިކުރެއްވެން ހުރި ފުރުޞަތުތަކަކީ ކޮބައިތޯ ބައްލަވައި، އެދާއިރާއިން އިތުރަށް ގުޅުން ބަދަހި ކުރެއްވުމަށް ބޭނުންފުޅުވާކަން ވަނީ ހާމަކުރައްވައިފައެވެ.
މި ބައްދަލުކުރެއްވުމުގައި، ސްވިޒަރލެންޑްގެ ސަފީރު ވަނީ މި ސަރުކާރުގެ ފުރަތަމަ 100 ދުވަހުގެ ވަޢުދުތައް ފުއްދުމުގައި ގެންގުޅުއްވާ ސިޔާސަތަކީ ވަރަށް ހިތްވަރުގަދަ ވަރުގަދަ ސިޔާސަތެއްކަން ހާމަކުރައްވައި އެކަމަށްޓަކައި ދިވެހި ސަރުކާރަށް ތަޢުރީފުކުރައްވައިފައެވެ. އަދި ރާއްޖެއިން ބޭނުންވާ އެހީތެރިކަމާއި އެއްބާރުލެއްވުން ސްވިޒަރލެންޑް ސަރުކާރުން ދެއްވާނެކަމުގައިވެސް ސްވިޒަރލެންޑްގެ ސަފީރު ވިދާޅުވިއެވެ.
އަޒަރުބައިޖާނުގެ އާ ސަފީރު، ސަފީރުކަމުގެ ފަތްކޮޅު އަރުވާފައިވަނީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުގައެވެ. ފަތްކޮޅު އެރުއްވުމަށްފަހު އަޒަރުބައިޖާނުގެ އާ ސަފީރާ ބައްދަލުކުރައްވައި، ރައީސުލްޖުމްހޫރިއްޔާ ވަނީ ސަފީރަށް ތަހުނިޔާ ވިދާޅުވެ، ރާއްޖެއަށް ޒިޔާރަތްކުރެއްވިކަމަށްޓަކައި މަރުޙަބާ ވިދާޅުވިއެވެ. އަދި، އެމަނިކުފާނުގެ ސަފީރުކަމުގެ ދައުރުގައި ރާއްޖެއާއި އަޒަރުބައިޖާނާއި ދެމެދުގައިވާ ގުޅުން އިތުރަށް ބަދަހިވާނެކަން ޔަޤީންކުރައްވާކަމުގައި ރައީސުލްޖުމްހުރިއްޔާ ވިދާޅުވިއެވެ. މީގެއިތުރުން މިއަހަރުގެ މާރިޗު މަހު ހިންގުމަށް ރާއްވަވާފައިވާ "ޕާޓްނަރޝިޕް ފޯރަމް" ގެތެރެއިން ދެޤައުމުގެ ގުޅުން އިތުރަށް ބަދަހިވެގެން ދިއުމަށް އުންމީދުކުރައްވާކަމުގައި ރައީސުލްޖުމްހޫރިއްޔާ ވިދާޅުވިއެވެ.
މިއަދުގެ ބައްދަލުކޮށްލެއްވުމުގައި އަޒަރުބައިޖާންގެ ސަފީރު ވަނީ އެޤައުމުން ދެއްވާ ސްކޮލަރޝިޕްގެ ފުރުޞަތުގައި މަތީ ތަޢުލީމު ހާސިލުކުރަމުންގެންދާ ރާއްޖޭގެ ދަރިވަރުންނާ ބެހޭގޮތުން އަލިއަޅުއްވައިލައްވައި ވާހަކަފުޅު ދައްކަވައިފައެވެ. އަދި އެމަނިކުފާނު ވަނީ އެޤައުމުން ތައުލީމު ހާސިލުކުރުމަށް ބޭނުންވާ އިތުރު ދަރިވަރުންނަށް ހިތްވަރުދެއްވައި އެގައުމުގެ ސިޔާސީ އެކަޑަމީ އެއްކަމުގައިވާ އޭ.ޑީ.އޭ ޔުނިވަރސިޓީއިން ތައުލީމު ހާސިލްކުރުމަށް ބާރުއަޅުއްވައި ވާހަކަފުޅު ދައްކަވައިފައެވެ.
މި ބައްދަލުކޮށްލެއްވުން ނިންމަވާލައްވަމުން އަޒަރުބައިޖާންގެ ސަފީރު ވަނީ ދިވެހިރާއްޖެއަށް އުފާވެރި މުސްތަޤުބަލަކަށް އެދިވަޑައިގެންފައެވެ. އަދި ރައީސުލްޖުމްހޫރިއްޔާގެ ވެރިކަމުގައި ހާސިލުކުރަން ބޭނުންފުޅުވާކަންކަން ހާސިލުވެގެން ދިއުމަށް އުންމީދުކުރައްވާކަމުގައި އެމަނިކުފާނު ވިދާޅުވިއެވެ.
