ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު (94/6) ނަންބަރުގައިވާ ގޮތުގެ މަތީން ދިވެހިރާއްޖޭގެ އިސްލާމީ ވަޙްދަތު ހިފެހެއްޓުމަށް ކަމާބެހޭ މުއައްސަސާތަކުން ކުރަންޖެހޭ މަސައްކަތްތައް ކުރަމުން ގެންދިއުމަށް އިސްލާމިކް މިނިސްޓްރީން އިލްތިމާސްކޮށްފިއެވެ.
އިސްލާމިކް މިނިސްޓްރީން މިކަމަށް އިލްތިމާސްކޮށްފައިވަނީ އެމިނިސްޓްރީން މިއަދު ޢާންމުކުރި ނޫސް ބަޔާނެއްގައެވެ.
އެ ބަޔާނުގައި އިސްލާމިކް މިނިސްޓްރީން ބުނެފައިވަނީ ދިވެހި އިސްލާމީ އުންމަތުގެ ސަފުތައް ރޫޅިގެންދާ ފަދަ އެއްވެސް ވާހަކައެއް ނުދެއްކެވުމަށް މިނިސްޓްރީ އޮފް އިސްލާމިކް އެފެއާޒުން އެންމެހައި ލޮބުވެތި ދިވެހި ރައްޔިތުންނަށް ނަޞޭޙަތްތެރިވާ ކަމަށެވެ.
އިސްލާމިކް މިނިސްޓްރީގެ ނޫސް ބަޔާން
މިހާރަކަށް އައިސް ބައެއް ފަރާތްތަކުން ނޫސް މަޖައްލާތަކާއި، ސޯޝަލް މީޑިޔާއާއި، ވެބްސައިޓުތަކާއި، އަދި ޢާއްމު ތަންތަނުގައި އިސްލާމްދީނާއި ގުޅޭގޮތުން ޞައްޙަ ނޫން ދޮގު މަޢުލޫމާތު ފަތުރައި،އިސްލާމްދީނަށް މަލާމާތާއި ފުރައްސާރަ ކުރަމުންދާ ކަމުގެ ޝަކުވާތައް މި މިނިސްޓްރީއަށް ދަނީ ލިބެމުންނެވެ. ދިވެހިރާއްޖޭގެ ޤާނޫނު އަސާސީގައި ބަޔާންވެގެންވާ ފަދައިން ދިވެހި ދައުލަތުގެދީނަކީ އިސްލާމްދީނެވެ. އިސްލާމްދީނުގެ އަސްލަކާ ޚިލާފު އެއްވެސް ވާހަކައެއް ދިވެހިރާއްޖޭގެ ރައްޔިތުންގެ މެދުގައި ދައްކައި، އެފަދަ ވާހަކަތައް ފެތުރުމަކީޒަމާނުއްސުރެ ދިވެހިންގެ މެދުގައި އޮތް އިސްލާމީ އެއްބައިވަންތަކަމަށްބުރޫ އަރައި، އިސްލާމީވަޙުދަތު ގެއްލިގެންދާނެ ކަމެކެވެ.
އިސްލާމް ދީނަކީ، ހުރިހާ ޒަމާނަކާއި ތަނަކަށް ފެތޭ، އިންސާނާގެ މުޅި ޙަޔާތާއި ގުޅި ލާމެހިފައިވާދިރިއުޅުމުގެ ފުރިހަމަ ނިޒާމަކަށް ވީ ހިނދު،ވަކިވަކި ފަރުދުންގެ އިތުރުން، ދައުލަތުގެ ޤަޟާއީ، ސިޔާސީ، އިޖްތިމާޢީ، ޢިލްމީ، އަދި އިޤްތިޞާދީ،އެންމެހައި ކަންކަން ކުރަންވާނީ ދީނުގެ ތަރަހައިގެ ތެރޭގައި ކަން އިސްލާމީ ޝަރީޢަތުގައި ވަނީ ކަނޑައަޅުއްވާފައެވެ. އިސްލާމްދީން މަތިވެރިކޮށް، އެދީނުގެ ޝިޢާރުތައް ނަގަހައްޓައި، އެ ދީނާމެދު ފަޚުރުވެރިވުމަކީ ކޮންމެ މުސްލިމެއްގެ މައްޗަށް ލާޒިމު ވެގެންވާ ކަމެކެވެ.
އަދި އިސްލާމްދީނާމެދު ޝައްކާއި،ވަހުމާއި، ނަފުރަތު އުފެދޭ ގޮތަކަށް ނުވަތަ ދީނުގެ ޙުކުމްތައް އޮޅޭ ގޮތަށް ނުވަތަ ދީނަށް ފުރައްސާރަކުރެވޭ ފަދަ މޭރުމަކުން ވާހަކަ ދައްކައި، ޝަރީޢަތަށާއި اﷲގެ އާޔަތްތަކަށް، މަލާމަލާމާތްކޮށްފުރައްސާރަކުރާ މީހުންނަށްاﷲގެ ވަޢީދުގެ ބަސްފުޅު އައިސްފައިވެއެވެ. ޝަރްޢީ މައްސަލަތައް އޮޅުން ފިލުވުމަށްޓަކައި ދީނީ ޢިލްމުވެރިންނާއި ސުވާލު ކުރެއްވުމަށާއި މީސްތަކުންގެ މެދުގައި އޮޅުން އަރާފަދަ ގޮތް ގޮތަށް މީސް މީޑިއާގައި ދީނުގެ ޙުކުމްތަކާބެހޭގޮތުން ނޭނގި ތިބެ ބަޙުސްކޮށް ނުހެދުމަށް ނަސޭހަތްތެރިވަމެވެ.
ހަމައެފަދައިން މިފަދަ ވާހަކަތަކަށް ޖަވާބު ދިނުމުގައިވެސް ދަޢުވަތުގެރިވެތި އުސޫލުތަކުގައި ހިފުމަށް ދަންނަވަމެވެ. މިގޮތުން، ދީނީ މަޢުލޫމާތު އޮޅުން ފިލުވުމަށް ބޭނުންފުޅުވާ ފަރާތްތަކަށް، މި މިނިސްޓްރީއަށް ވަޑައިގެން އެފަދަ މަޢުލޫމާތު ސާފުކުރެވޭނެ އިންތިޒާމްތައް ވަނީ ހަމަޖެހިފައިވެއެވެ.
އަދި މީގެ އިތުރުން، ފޮރުވިގެންތިބެ ދީނުގެ ނަމުގައި ހަރުކަށިކަމާއި އަނިޔާވެރިކަމަށް ހިތްވަރުދީ، މީހުންގެ މުދަލާއި ފުރާނައަށް، ޝަރުޢީ ހަމަތަކުން ބޭރުން ގެއްލުންދޭނެ ކަމުގެ އިންޒާރުދިނުން ފަދަ، އިސްލާމްދީން އެކަންކަމުން ބަރީއަވެގެންވާ ކަންކަން ކުރާ ފަރާތްތަކާއި،އިސްލާމްދީނަށް މަލާމާތްކޮށް ފުރައްސާރަ ކުރާ ފަރާތްތައް ހޯދައި ކަމާބެހޭ މުއައްސަސާތައް ގުޅިގެން އެކަންކަން ހުއްޓުވަން މި މިނިސްޓްރީން މަސައްކަތްކުރާނެ ވާހަކަ ދަންނަވަމެވެ.އަދި އެހެންމެ،
ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު(94/6)ނަންބަރުގައިވާ ގޮތުގެ މަތީން ދިވެހިރާއްޖޭގެ އިސްލާމީ ވަޙްދަތު ހިފެހެއްޓުމަށް ކަމާބެހޭ މުއައްސަސާތަކުން ކުރަންޖެހޭ މަސައްކަތްތައް ކުރަމުން ގެންދިޔުމަށް ވެސް އިލްތިމާސްކުރަމެވެ. ވީމާ، ދިވެހި އިސްލާމީ އުންމަތުގެ ސަފުތައް ރޫޅިގެންދާ ފަދަ އެއްވެސް ވާހަކައެއް ނުދެއްކެވުމަށް މިނިސްޓްރީ އޮފް އިސްލާމިކް އެފެއާޒުން އެންމެހައި ލޮބުވެތި ދިވެހި ރައްޔިތުންނަށް ނަޞޭޙަތްތެރިވަމެވެ.
14 جمادى الأولى 1440 ه.
20 ޖަނަވަރީ 2019މ.
