މުސްލިމުން މުސްލިމުންގެ ސިފައިގައި ތިބުމަކީ ކިތަންމެހައިވެސް މުހިންމު ކަމެކެވެ. ފޭރާން ލުމުގައާއި ތުނބުޅި ބެހެއްޓުމުގައިވެސް މުސްލިމުންގެ ސިފަ ދައްކަންވާނެއެވެ. ޚާއްޞަކޮށް ސާފުތާހިރުކަންމަތީގައި ތިބުމުގައެވެ.
ބައެއް މީހުންނަށް ހީވެފައި އޮންނަނީ މިފަދަ ސިފަތަކުގައި ތިބުމުން ތަޤްވާވެރިވެސް ވެވުނީ ކަމަށެވެ. ހަމަހިލާ އެހެނެއް ނުވާނެއެވެ. ތަޤްވާވެރިވާން ބޭނުންނަމަ ބޭރުފުށުގެ ސިފަތަކާއި އެއްގޮތަށް ނުވަތަ އެއަށްވުރެ މާ ބޮޑަށް އެތެރެފުށް ޒީނަތްތެރިކުރަން ޖެހެއެވެ.
އެތެރެފުށުގެ ޒީނަތްތެރިކަން ފެށިގެން އަންނަނީ އީމާންކަމާއި ހަމައިންނެވެ. އިސްލާމް ކަމާއި ހަމައިންނެވެ. އިސްލާމްކަން ބިނާވަނީ މިއަންނަނީ އިސްލާމް ދީނަށް އަމަލުކުރާ މިންވަރަކުންނެވެ. އެހެންވީމާ ބޭރުފުށުން ކިތަންމެ ގިނަ އަދި ކިތަންމެ ފުރިހަމަ ސިފަތަކެއް ދައްކައިގެން ހުރިނަމަވެސް އެކަމަކުން ނުފުދެއެވެ.
ބައެއް މީހުންނަށް ހީވެފައި އޮންނަނީ ތަޤްވާވެރިވުމަކީ ހަމައެކަނި އަޅުކަންކުރާއިރު ކުރަންޖެހޭ ކަމެއް ކަމަށެވެ. އެއީވެސް ވަރަށް ބޮޑު ކުށް ހީއެކެވެ. އަޅުކަން ކުރުމުގައި ތަޤްވާވެރިވާ ފަދައިން ޢާންމު ދިރިއުޅުމުގައިވެސް ތަޤްވާވެރިވާން ޖެހޭނެއެވެ. އަމިއްލަ ގޭތެރޭގައި ކުރާ ކަންކަމުގައިވެސް އަދި އަނބިދަރިންނާއި ކުރާ މުޢާމަލާތުތަކުގައިވެސް ތަޤްވާވެރިކަމުގެ ސިފަތައް ފެންނަން ޖެހޭނެއެވެ. ދައްކަން ޖެހޭނެއެވެ.
އެހެނީ ތަޤްވާވެރިއަކަށް މިވެވެނީ އެމީހާ ކުރާ ހުރިހާ އަމަލުތަކުގައި ﷲ ތަޢާލާއަށް ތަޤްވާވެރިވުމުންނެވެ. ތަޤްވާވެރިކަމުގެ އެންމެ މުހިންމު އެއްބައަކީ އެމީހާގެ އަޚްލާޤެވެ. ޢަދުލުވެރިކަމެވެ. ކިޔަމަންތެރިކަމެވެ. އޯގާތެރިކަމެވެ. އެހެން މީހުންނަށް ރަޙްމް ކުރުމެވެ. ތަޤްވާވެރިކަން ފުރިހަމަވަނީ މިފަދަ ހުރިހާ ކަމެއް ފުރިހަމަކުރެވިގެންނެވެ. ކުރިންވެސް ބުނި ފަދައިން ބޭރުފުށުގެ ސިފައާއި އުނގުޅާ މީރުވަސް ދުވާ އަތަރަކުން ނޫނެވެ. އަދި ޖީބުގައި އޮންނަ ސިވާކް ދަނޑިބުރިއަކުންވެސް ނޫނެވެ.
އެހެންކަމުން ފުރިހަމައަށް ތަޤްވާވެރިވެގެން ހުރި މީހަކަށްވުމަށްޓަކައި ބޭރުފުށާއި އެތެރެފުށް އެއްގޮތްކޮށް ﷲ ތަޢާލާ އަންގަވާފައިވާ މަގުން ހުރިހާ ކަމެއްވެސް ކުރަމުން ގެންދިއުމަށް ނަޞޭޙަތެރިވެ ވަޞިއްޔަތް ކުރަމެވެ.
- އިސްލާމީ ތިލަފަތުގެ ދަރުސަކުން
