އިސްލާމް ދީނާއިމެދު ޝައްކު އުފެދިގެން އުޅޭ މީހުންގެ ސުވާލުތަކަށް ޖަވާބު ދެވޭނެ ޕްލެޓްފޯމެއް މިހާރުން މިހާރަށް ވެސް ބޭނުން ކަމަށް ގިނަ ބައަކު ދަނީ ބުނަމުންނެވެ.
"ޑރ. ޒާކިރް ނައިކުގެ ދަރުސްތައް ބަލަވާ! ބޮޑެތި ބޮޑެތި މައްސަލަތައް ހިފައިގެން ގޮސް ސުވާލުތައް ކުރާ މީހުން، އެމީހުންގެ ސުވާލުތަކަށް ޖަވާބު ލިބުމުން އެދަނީ އިސްލާމްވަމުން. އެމީހުންނަކީ ސުވާލުކުރަންދާއިރު މުޅިން އެހެން ފިކުރެއްގައި ތިބޭ ބައެއް. އެހެން ދީންތަކުގެ މީހުން. ﷲ ތަޢާލާ ޤަބޫލުވެސް ނުކުރާ މީހުން. އެމީހުންގެ ސުވާލުތަކަށް ޖަވާބު ލިބުމުން އެމީހުން އިސްލާމްވާއިރު އިސްލާމް ދީން އެނގޭ، ނަމަވެސް ބައެއް ޝައްކުތަކާއި ސުވާލުތައް އުފެދިފައިވާ މީހުންގެ ސުވާލުތަކަށް ޖަވާބުލިބުމުން ޝައްކުތައް ފިލައިގެން ދިއުމުގެ ފުރުޞަތު ހަމަ މާ ބޮޑުވާނެ." ކަމަށް ގިނަ ބައަކު ދެކެއެވެ.
ރާއްޖޭގެ މިހާރުގެ ހާލަތަށް ބަލާއިރު ހަމައެކަނި ދަރުސް ދީގެން ކަންކަން ޙައްލުކުރެވޭކަށް ނެތެވެ. ސުވާލުތަކަށް ޖަވާބު ލިބެން ބޭނުންވެއެވެ. ޖަވާބު ލިބެން ބޭނުންވާ ގިނަ ޒުވާނުން ބުނާ ގޮތުން އެމީހުން ބޭނުންވަނީ ޢާންމު ތަންތަނުގައި ސުވާލުކުރުމަށެވެ. އެމީހުން ބުނާ ގޮތުން ޖަދަލުކޮށްފިނަމަ އެމީހުން މޮޅުވާނެއެވެ. ނަމަވެސް އެއީ އެމީހުންގެ ވިސްނުމެވެ. ކީރިތި ޤްރްއާނާއި ޖަދަލުކޮށްގެން މޮޅުވެވުނު އެއްވެސް މީހަކު މިދުނިޔެއިން އަދި މިހައިތަނަށް ފެނިފައެއް ނުވެއެވެ. ނުވެސް ފެންނާނެއެވެ.
ރާއްޖޭގައި ބާއްވާ ދަރުސްތަކުގައި ވެސް އަދި ރަމަޟާން މަހު ބާއްވާ އިހްޔާ ފޯރަމްތަކުގައި ވެސް އައީ ސުވާލުކުރުމުގެ ފުރުޞަތު ދެމުންނެވެ. ނަމަވެސް ކުރާ ބައެއް ސުވާލުތަކުން ސަރުކާރު ފަޟީޙަތްވާން ފެށުމުން އެ ފުރުޞަތުތައް ހަނިކޮށް މިހާރު ވަނީ ސުވާލުކުރުން "ޕެރެލައިޒްކޮށްފަ"އެވެ. މިއީ ވެސް ސުވާލުތައް ގިނަވެގެންދިއަ އެއް މައްސަލަކަން ފާހަގަކުރެވެއެވެ.
އެތަނެއްގައި އޮތް އެއްވެސް މައްސަލައެއް ނެތް ކަމަކަށް ނުހެދޭނެއެވެ. އޮންނާނީ މައްސަލަ ހައްލުކުރަން މަސައްކަތް ކުރުމެވެ. ހިނގަމުންދާ ކަމެއް ނުހިނގާ ކަމަށް ދައްކަން ސިއްރުކުރުމަކީ ވެސް އެކަމަށް އެއްވެސް ހައްލެއް ލިބޭނެ ކަމެއް ނޫނެވެ. އެކަން ވާނީ އެ މައްސަލައެއް ދިރި ހެދި ބޮޑުވުމަށް ލިބޭ އިތުރު ބާރަކަށެވެ.
ރާއްޖޭގައި އީޑީސީ ކިޔާ ތަނެއް އުފައްދައި އެތަނުން ބޭނުންވާ ގޮތަށް ފޮތްތައް އުފައްދަން ފެށުމުން އިންދިގެން އައި އޮށުން ފެޅި ގަސް ހެދި ބޮޑުވެ އެގަހުގެ އަސަރު މިވަނީ މުޅި ދިވެހި އުންމަތަށް ވަބާއަކަށްވެފައެވެ. އެ އޮށްތައް އިންދި މީހުންގެ ކިބައިން މިއަދު މިއުޅެނީ ސަލާމަތް ނުވެވިގެންނެވެ. ޤައުމީ މަންހަޖަށް ގެނައި ބަދަލުތަކުގައި ދީން ނެގެހެއްޓުމަށް ސަމާލުކަން ނުދިނުމުން ކުރިމަތިވި މައްސަލަތައް މިއަދު ޤައުމުގައި މިވަނީ ފުނިޖެހިފައެވެ. މިއަދު އޮތީ ޙައްލު ހޯދަން މަސައްކަތް ކުރުމެވެ.
ރާއްޖޭގެ އިސް ބައެއް ދީނީ ޢިލްމުވެރިންވެސް މިމޭރުމުން އިސްލާމިކް މިނިސްޓްރީއަށް ލަފާ އަރުވާފައިކަމުގެ މައުލޫމާތުވެސް ވަނީ ލިބިފައެވެ.
