ރަޞޫލް (ޞޢވ) ހަދީޘްކުރެއްވެވި ބަސްފުޅެއްގެ މާނައިގައިވެއެވެ. "ރައްޔިތުންގެ މައްޗަށް ﷲ ތަޢާލާ އިސްކުރައްވަވާ އެއްވެސް އަޅަކު އޭނާ މަރުވާ ދުވަހު އެ މަރުވެގެންދަނީ އެ ރައްޔިތުންނަށް މަކަރާއި ޙީލަތް ހަދާ މީޙެއްގެ ގޮތުގައި ނަމަ ﷲ އޭނާގެ މައްޗަށް ސުވަރުގެ ޙަރާމް ކުރައްވަވާނެތެވެ."
އެހެން ރިވާޔަތެއްގައި ވެއެވެ. "އޭނާ އެ މަސްއޫލިއްޔަތު އަދާކުރުމުގައި ރައްޔިތުންނަށް ހެޔޮ ނަޞޭޙަތްދޭ މީހަކު ކަމުގައި ނުވެއްޖެނަމަ ސުވަރުގޭގެ ވަސްވެސް ނުލިބޭ ހުއްޓެވެ."
މަސްޖިދު މުޙައްމަދު ތަކުރުފާނުލްއަޢްޒަމްގައި އިމާމްވެ ހުކުރުކުރައްވަމުން ޝައިޚް މުޙައްމަދު އަނީލް މިއަދު ވިދާޅުވެފައިވަނީ އަމިއްލަފުޅު ޚުޠުބާއެކެވެ. ޚުޠުބާ ޚާއްޞަ ކުރައްވާފައިވަނީ އަދުލުވެރިކަމާއިއެކު ވެރިކަން ކުރުމުގެ މުހިންމު ކަމުގެ މައްޗަށެވެ. ﷲ ތަޢާލާ ވެރިކަން ޙަވާލުކުރައްވާ މީހަކުގެ މަސްއޫލިއްޔަތުތަކުގެ މައްޗަށެވެ.
ޚުޠުބާ ފަށްޓަވަމުން ޝައިޚް އަނީލް ވިދާޅުވީ "މާތްވެގެންވާ އިސްލާމް ދީނުގެ މަތިވެރިވެގެންވާ އުޞޫލުތަކުގެ ތެރެއިން އެންމެ މުހިންމު އެއް އުޞޫލަކީ އަމާނާތްތައް އެއިގެ ހައްޤުވެރިންނަށް އަދާކުރުން ވާޖިބުވެގެންވުމާއި ޚިޔާނާތްތެރިވުން ޙަރާމްވެގެންވުން." ކަމަށެވެ.
ޝައިޚް އަނީލް ވިދާޅުވީ ވެރިކަމުގެ ތެރޭގައި ދައުލަތުގެ އެންމެ އާދައިގެ އިދާރާތަކުން ފެށިގެން އެންމެ މަތީ ވެރިޔާ އާއި ހަމައަށް ހިމެނިގެންވާ ކަމަށާއި މިއެންމެހައި ފަރާތްތަކުން އަމަލުކުރަންޖެހޭ އުޞޫލުތައް އިސްލާމް ދީނުގައި ބަޔާންވެގެންވާ ކަމަށެވެ. އަމާނާތައް އަދާކުރާނެ ގޮތުގެ އިރުޝާދު ވަނީ ދެއްވަވައިފައި ކަމަށެވެ.
އަދުލުވެރިކަމާއި އަމާނާތްތެރިކަމާއިއެކު ވެރިކަން ކުރާ ވެރިންނަށް ޤިޔާމަތް ދުވަހު ލިބޭނެ މަތިވެރި ނިޢްމަތްތައްވެސް ޝައިޚް އަނީލް ވަނީ ބަޔާންކޮށް ދެއްވަވައިފައެވެ.
ޝައިޚް އަނީލްގެ ޚުޠުބާއިން އެނގިގެންދަނީ ﷲ ތަޢާލާ އެމީހަކާއި ވެރިކަން ޙަވާލުކުރެއްވެވުމުން ރައްޔިތުންގެ ފައިސާއިން ވައްކަންކުރާމީހުންނަށް ޤިޔާމަތް ދުވަހު ހުރި ޢަޛާބުގެ ގަދަފަދަ ކަމެވެ. އެކައުންޓުގައި ހުންނާނީ ޖާއިޒު ފައިސާ ކަމަށް ބުނެ ނިންމައި ނުލެވޭނެ ކަމެވެ. ހިސާބުތައް ދައްކަން ޖެހޭނެ ކަމާއި ޖަވާބުދާރީ ވާންޖެހޭނެ ކަމެވެ. ވައްކަން ކުރުން ފަދަ ކަންކަމަށް ހިތްވަރުދޭ ވެރިންނަށް ސުވަރުގޭގެ ވަސްވެސް ނުލިބޭނެ ކަމެވެ.
ޝައިޚް އަނީލްގެ ޚުޠުބާ އިން (ވީޑިއޯ):
