އެމްޑީޕީ ބޭނުންވަނީ އެޕާޓީގެ މެޖޯރިޓީ އޮތް ރައްޔިތުންގެ މަޖިލީހެކެވެ. ރައީސް އިބްރާހީމް މުޙައްމަދު ޞާލިޙް ބޭނުންފުޅުވަނީ ސަރުކާރަށް މެޖޯރިޓީ އޮތް މަޖިލީހެކެވެ. މިކަން ހާމަވެގެން ދިއައީ 19 ވަނަ ރައްޔިތުންގެ މަޖިލީހާއިމެދު އެމްޑީޕީން ދައްކާ ވާހަތަކުންނާއި ރައީސް އިބްރާހީމް މުޙައްމަދު ޞާލިޙް މިއަދު ދެއްކެވި ވާހަކަފުޅުންނެވެ.
މިއަދު ބޭއްވި އެމްޑީޕީ ޕްރައިމަރީގައި ވޯޓުލައްވަން އިމާދުއްދީން ސްކޫލަސް ވަޑައިގަގެން މީޑިއާތަކަށް މައުލޫމާތު ދެއްވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ އެމަނިކުފާނު ބޭނުންފުޅުވާ ކަމަކީ ސަރުކާރަށް ތާއީދު އޮތް "އަޅުގަނޑުމެންގެ" ވައުދުތައް ފުރިހަމަކުރުމަށްޓަކައި އެއްބާރުލާ މެޖޯރިޓީ އޮތް މަޖިލީހެއް ކުރިއަށް އޮތް 19 ވަނަ ރަޔިތުންގެ މަޖިލީހަށް އިންތިހާބުވުން ކަމަށެވެ. އަދި ސަރުކާރަށް ތާއީދުއޮތް މަޖިލީހެއްގެ މުހިންމުކަން އެމަނިކުފާނު ވަރަށް ބޮޑަށް ފާހަގަކުރައްވާ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ އެމްޑީޕީގެ ކެންޑިޑޭޓުން ދެކެން ޖެހޭނީ އެމްޑީޕީ ހިމެނޭ ގޮތަށް އައި ކޯލިޝަނުގައި ދެމި އޮވެ ސަރުކާރުގެ ވައުދުތައް ފުއްދުމަށް މަޖިލީހުގެ ތެރޭން މަސައްކަތް ކުރުން ކަމަށެވެ.
އެމްޑީޕީން ސަރުކާރަށް އެ އެއްބާރުލުން ލިބިގެންދާނެ ކަމަށް ޔަޤީން ކުރައްވާ ކަމަށާއި އެއީ މި ޕްރައިމެރީގައި ކާމިޔާބުވެ ރައްޔިތުންގެ މަޖިލިސް އިންތިހާބު ކާމިޔާބުކުރުމަށް ފަހު އެ ބޭފުޅުންގެ އަމަލުތައް މިސްރާބު ޖަހާނެ ގޮތް ކަމުގައި ޤަބޫލުފުޅު ކުރައްވާ ކަމަށްވެސް ރައީސް ޞާލިޙް ވަނީ ވިދާޅުވެފައެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ކުރީގެ ރައީސުންނަށް ރައްޔިތުންގެ މަޖިލީހަށް ވާދަ ނުކުރެވޭގޮތަށް އިންތިހާބާ ބެހޭ ޤާނޫނަށް ދިއްދޫ ދާއިރާގެ މެމްބަރު އަބްދުއްލަތީފް ހުށަހެޅުއްވި އިސްލާހު ޤާނޫނު އަސާސީއާއި ހިލާފު ކަމަށެވެ. އަދި އެއްވެސް ރައްޔިތަކަށް އިންތިހާބުތަކަށް ކުރިމަތިލުމަށް ހުރަސްއެޅޭ ގޮތަށް ހެދުމަށް ކުރެވޭ ކަންކަން ބަލައި ނުގަނެވޭނެ ކަމަށްވެސް ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
