އިސްލާމް ދީނަށް ފުރައްސާރަކޮށް ދީނުގެ ޙުކުމްތަކަށް ގޮން ޖަހާއިރު ބުރަކަށީގަ ފިރުމަން ތިބުމެއް ނެތެވެ. އެމީހުން ހަމަ އެކަނި ދީނަށް ފުރައްސާރަ ކުރަނީއެއް ނޫނެވެ. މުސްލިމުންނަށް ސުވަރުގެއިން ލިބެން ހުރި ނިއުމަތްތައް ކަމަށް ﷲ ތަޢާލާ ބަޔާން ކުރައްވަވާފައިވާ ނިޢްމަތްތަކަށްވެސް އެގެންދަނީ މަލާމާތްކޮށް ފުރައްސާރަކުރަމުންނެވެ. ދީނުގައި ކަނޑައެޅި ބަޔާން ވެގެންވާ ޙުކުމްތަކަށް އެގެންދަނީ ހަޖޫ ޖަހަމުންނެވެ. އިންކާރުކުރަމުންނެވެ. އަދި އެކަންކަމަށް މީސްތަކުންގެ ހިތްތަކުގައި ޝައްކު އުފައްދުވަން މަސައްކަތް ކުރަމުންނެވެ.
މިއީ ދީނުގެ ހިމާޔަތުގައި އެމީހަކަށް ކޮށްދެވެން އޮތް ކަމެއް ކޮށްދިނުމަށް އެންމެން ނުކުންނަންވީ ވަގުތެވެ. ނަމަވެސް މީގެ މާނައަކީ އެމީހުންނާއި ކުރިމަތިލައި ލޭ އޮހޮރުވުމެއް ނޫނެވެ. ކޮންމެ މީހަކުވެސް ކޮށްދޭންވީ ކަމަކީ އެކަންކަމަށް އެމީހަކަށް ވެވުނު ވަރަކުން ރައްދުދީ ހައްޤު މަގު ބަޔާން ކުރުމަށް މަސައްކަތް ކުރުމެވެ. އެފަދަ މީހުންނަށް އަދަބު ދިނުމަކީ ސަރުކާރުގެ ކަމާއިބެހޭ އިދާރާތަކުން ކުރަންޖެހޭ ކަމެކެވެ. މީސްތަކުން އަމިއްލައަށް އެއްވެސް މީހަކަށް އަދަބު ދިނުމަކީ އިސްލާމް ދީނުގައި އޮތް ގޮތެއް ނޫނެވެ.
ރާއްޖެ އިސްލާމްވެ ދިވެހިންނަށް އިސްލާމް ދީނުގެ ހިދާޔަތް ލިބުނުތާ 900 އަހަރުވާން ދާދި ކައިރިވީއެވެ. މިހައި ދުވަސްވަންދެން އިސްލާމް ދީނުގައި ސާބިތުކަމާއިއެކު ދެމިތިމުގެ ތައުފީޤް ދެއްވެވިކަން މައްޗަށް ﷲ ތަޢާލާއަށް ޙަމްދުކުރަންޖެހެއެވެ. ނަމަވެސް މިއަދު މިފެންނަ ގޮތުން މި ނިއުމަތުގައި ދެމިތިބެވޭނީ ކިހައި ދުވަހަކުކަމާއިމެދު މިހާރު މިވަނީ ސުވާލު އުފެދިފައެވެ.
ރާއްޖެއަކީ ޤައުމުގެ ހައިޞިއްޔަތުން ބަލައިފިނަމަ ވަރަށް ކުޑަކުޑަ ޤައުމެކެވެ. ނަމަވެސް ﷲ ތަޢާލާ ދެއްވަވާފައިވާ އިސްލާމް ދީނުގައި ދެމި ތިބުމުގެ ނިޢްމަތަށް ބަލައިފިނަމަ ލިބިފައި މިވަނީ ވަރަށް ބޮޑު ނިޢްމަތެކެވެ. ޝުކުރުވެރިވުން އިންތިހާއަށް ޙައްޤު ނިޢްމަތެކެވެ.
ދުނިޔޭގެ އެންމެ ބޮޑެތި ޑިމޮކްރސީތައް ކަމަށް ބުނާ ޤައުމުތަކުގައި އިސްލާމް ދީނަށް ހުރި ގޮންޖެހުންތައް މިދަނީ ފެންނަމުންނެވެ. ދުނިޔޭގެ އާބާދީ އެންމެ ގިނަ ޗައިނާ އާއި މިޔަންމާ ފަދަ ޤައުމުތަކުގައި މިއުޅެނީ މުސްލިމުންނަށް ރޯދަ ހިފައި ނުލެވިގެންނެވެ. ކީރިތި ޤްރްއާން ކިޔަވައި ނުލެވިގެންނެވެ.
ބަދަލުވަމުން މިދާ ޙާލަތަށް މިއަދު ހޭލައި ނުތިބެ ޣާފިލުވެއްޖެނަމަ ރާއްޖޭގެ ޙާލަތު މާދަމާވެސް ބިރުވެރިކަން ބޮޑު ޙާލަތަކަށް ނުދާނެ ކަމަށް މިހާރު ބެލެވޭކަށް ނެތެވެ. ކައިރި މުސްތަޤްބަލެއްގައި ކަންކަން މުޅިން ބަދަލުވެގެން ނުދާނެ ކަމަށް ބަލައި ޣާފިލުވެގެން ތިބެވޭކަށް ނެތެވެ. ދީނީ މިނިވަންކަމަށް ގޮވާލައި ޙަރާމް ކަންކަން ކުރުމަށް ހިތްވަރުދީ އަދި ބާރުއަޅަމުން ގެންދަނީ ހަމަ ދިވެހި ދަރިންކަމަށްވާތީއެވެ.
ﷲ ތައާލާގެ މަގުގައި ސާބިތުވެ ތިބެ އިސްލާމް ދީނަށް ނަޞްރު ހޯދައިދޭން މަސައްކަތް ކުރުމުން ﷲ ތަޢާލާ ނަޞްރު ދެއްވަވާނެއެވެ. ނަމަވެސް އެ ނަޞްރު ލިބޭނީ ސާބިތުކަމާއިއެކު ކުރިމަތިލައި އެކަންކަމަށް ގަދައަޅައި މަސައްކަތް ކުރުމުންނެވެ. ޞަހާބީން ވެސް މަސައްކަތް ކުރެއްވެވި ފަދައިންނެވެ. ބޮޑުތަކުރުފާނާއި ދޮންބަންޑާރައިން އަދި ޢަލިރަސްގެފާނު ކުރެއްވި ފަދައިން ޖިހާދުކުރުމުންނެވެ.
މިއަދު ރާއްޖޭގައި އިސްލާމް ދީނަށް ކުރިމަތިކުރުވަމުން މިގެންދާ ކަންކަމަށް ޣާފިލުވެގެން މިއަދު ތިބެއްޖެނަމަ އަންނަން ތިބި ދަރިންނަށް އިސްލާމް ދީން ފޯރުކޮށްދެވޭނެ ކަމުގެ އުންމީދު މިދަނީ ނެތެމުންނެވެ. ވީމާ އެކަމުގައި ޣާފިލުވެގެން ތިބެވޭނެ އެއްވެސް ގޮތެއް މިހާރަކު ނެތެވެ. ޣާފިލުވެގެން ތިބެން ހެޔޮ ނުވާ ހިސާބަށް މިއަދު ކަންކަން މިވަނީ ގޮސްފައެވެ.
އިސްލާމް ދީނާއި ދެކޮޅަށް ކުރާ މަސައްކަތްތަކުގެ ތެރެއިން އިސްލާމީ ޝަރީޢަތަށް އަމަލުކުރުން މިހާރު މިވަނީ ހައްދުފަހަނައަޅައި ދިއުން ކަމަށް ހަދައިފައެވެ. ބުނަމުން އެގެންދަނީ އެއީ ކަޓް ކަންތައްތައް ކަމަށެވެ. އެފަދަ ކިތަންމެ ގިނަ ދޮގު ވާހަކަތަކެއް ދެއްކި ނަމަވެސް ﷲ ތަޢާލާ ބާވައިލެއްވެވި ޙުކުމްފުޅުތަކަކީ އެންމެ ފުރިހަމަ ޙުކުމްފުޅުތަކެވެ.
އިސްލާމް ދީނަށް އަމަލުކުރުމުގައި އެންމެ ފުރިހަމައަށް އަމަލު ނުކުރެވޭ ކަމަށް ޤަބޫލުކުރެވި އިސްލާމް ދީނުގެ ދިފާއުގައި ބަސް ބުނަން ފަސްޖެހޭ ބައަކުވެސް އެބައުޅެއެވެ. މިއީ އެފަދަ މީހުން ވެސް ފަސް ނުޖެހި އިސްލާމް ދީނުގެ ދިފާޢުގައި، އިސްލާމް ދީން ޙިމާޔަތް ކުރަން ނުކުމެ މަސައްކަތް ކުރަން ފަށަންވީ ވަގުތެވެ. އެކަމަށް މަސައްކަތް ކުރަން ފެށުމުން ތިމާގެ ކިބައި ހުރި އުނި ސިފަތައްވެސް ދާނީ ﷲ ތަޢާލާގެ ވާގިފުޅާއިއެކު އިޞްލާޙްވަމުންނެވެ.
- މިއަދުގެ ޢަޞްރު ނަމާދަށްފަހު ވިޔަފާރިވެރިންގެ މިސްކިތުގައި ޝައިޚް އާދަމް ނިޝާން ދެއްވި ދަރުސުން
