ލިޔުނީ: ޒިދާން މުހައްމަދު
ދިވެހިރާއްޖޭގެ ޖަލުތަކުގައި ތިބޭ ގައިދީންނާ ދޭތެރޭ އަމަލުކުރާ ގޮތުގެ މައުލޫމާތު ހިއްސާކުރަން މިއަދު ހުޅުވާލައިފި އެވެ. އެ ފުރުސަތު ހުޅުވާލާފައި ވަނީ ޖަލުތައް އޮޑިޓްކުރަން އުފެއްދި ކޮމިޝަނުންނެވެ.
އެ ކޮމިޝަން ހިންގާ މިނިސްޓްރީ އޮފް ހޯމް އެފެއާޒުން ނެރުނު ނޫސް ބަޔާނެއްގައި ބުނެފައި ވަނީ، ޖަލުތައް އޮޑިޓްކުރަން ބޭނުންވާ މައުލޫމާތު އެއްކޮށް ދިރާސާކުރުމުގެ މަސައްކަތް ކޮމިޝަނުން ފަށާފައިވާ ކަމަށެވެ. އެހެންވެ އެކަމަށް ބޭނުންވާ މައުލޫމާތު ހިއްސާކުރަން އާއްމުންނަށް އަންނަ ހަފުތާގެ ބުރާސްފަތި ދުވަހާ ހަމައަށް ހުޅުވާލާފައި ވާ ކަމަށެވެ.
މީގެ އިތުރުން، މައުލޫމާތު ހިއްސާކުރުމަށް [email protected] އަށް މެއިލްކޮށްގެންނާއި ރަސްމީ ގަޑީގައި 3321752 އަށް ގުޅައިގެން ނުވަތަ ސިޓީއަކުން އަދި އެ ކޮމިޝަންގެ އޮފީހަށް ހާޒިރުވެގެން ވެސް މައުލޫމާތު ދެވޭނެ ކަމަށް ވެސް މިނިސްޓްރީގެ ނޫސް ބަޔާނުގަވެއެވެ.
ރާއްޖޭގައި މިވަގުތު ހުރި ޖަލުތަކުގެ ތެރޭގައި މާލެ ޖަލާއި ކ. މާފުށީ ޖަލާއި ކ. ހިންމަފުށީ ޖަލު އަދި މާލޭގައި ހުންނަ އަތޮޅުވެއްސާއި ދޫނިދޫ ޖަލު ހިމެނެ އެވެ. މީގެ އިތުރަށް، ބިދޭސީންނަށް ހާއްސަކޮށް، ހުޅުމާލޭގައި ޑިޓެންޝަން ސެންޓަރެއް ވެސް ގާއިމްކޮށްފައި ހުރެ އެވެ.
