ލިޔުނީ: ޒިދާން މުހައްމަދު
ރާއްޖޭގެ ފަތުރުވެރިކަން އިސްތިހާރު ކުރުމަށް، ސްޕޭންގެ ފުޓްބޯޅަ ކުޅުންތެރިޔާ މިޝޭލް ސަލްގާޑޯގެ އެހީތެރިކަމާ އެކު ޚާއްސަ މަސައްކަތެއް ފަށަން ނިންމާފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
އަޅި ވަހީދު މިހެން ވިދާޅުވީ، ވެލާނާ އިންޓަނޭޝަނަލް އެއާޕޯޓުގައި އިއްޔެ ބޭއްވި ނޫސްވެރިންގެ ބައްދަލުވުމެއްގައެވެ. އަދި ސްޕޯޓްސް ޓޫރިޒަމް ފުޅާ ކުރުމަށް، ޔޫރަޕުގެ ބޮޑެތި ފުޓްބޯޅަ ޓީމުތައް ރާއްޖެ ގެނެސްގެން މާކެޓް ކުރަން ޕްލޭން ކޮށްފައިވާ ކަމަށް ވެސް މިނިސްޓަރު ވިދާލުވިއެވެ.
މީގެ އިތުރުން އެމަނިކުފާނު ވިދާޅުވީ، މަޝްހޫރު ފުޓްބޯޅަ ތަރިން ރާއްޖެ އަށް ޗުއްޓީ ހޭދަ ކުރަން އަންނަ ތަން މިހާރު ފެންނަ ކަމަށާއި، މި އަހަރުގެ ތެރޭގައި "ރަނގަޅު [ފުޓްބޯޅަ] ކްލަބެއް" ރާއްޖެ އަށް ގެނައުމުގެ މަސައްކަތް ކުރަމުން އަންނަ ކަމަށެވެ. އަދި އޭގެ ސަބަބަބުން ސީދާ ގޮތުންނާއި، ނުސީދާ ގޮތުން ރާއްޖެ އިސްތިހާރު ވާނެ ކަމަށް މިނިސްޓަރު ވިދާޅުވި އެވެ.
ގައުމީ ޓީމުގެ ކީޕަރު އިމްރާން މުހައްމަދު ރިޓަޔާ ކުރުމަށް ބޭއްވި ޚާއްސަ މެޗް ބެލުމަށް ރިއާލް މެޑްރޑުގައި މޮޅު ކުޅުމެއް ދެއްކި މަޝްހޫރު ފުޓްބޯޅަ ތަރި ސަލްގާޑޯ ރާއްޖެ އައުމަށް ފަހު އޭނާ ވެސް ވަނީ ރާއްޖެ އިސްތިހާރު ކުރަން ސަރުކާރާ ގުޅިގެން މަސައްކަތް ކުރާނެ ކަމަށް ބުނެފައެވެ. އަދި ރައީސް ޞާލިޙް އާ ވެސް މިކަމާ ގުޅޭގޮތުން މަޝްވަރާ ކުރި ކަމަށް އޭނާ ބުންޏެވެ.
ދިވެހިރާއްޖޭގައި 7000 އަށް ވުރެ ގިނަ ލޯކަލް ޓޫރިޒަމް އެނދު ހުރި އިރު، އެވަރަށް ރާއްޖޭގެ ލޯކަލް ޓޫރިޒަމް އިސްތިހާރު ކުރެވިފައި ނެތެވެ. އެހެން ކަމުން ރާއްޖޭގައި ލޯކްލް ޓޫރިސަމް ތަރައްގީކޮށްފައިވާ ރަށްތައް މާ ބޮޑަށް ބޭރުގެ ލޯ ތަކުގައި އަޅައިގަނެފައި ނެތެވެ. އެހެންކަމުން، ލޯކަލް ޓޫރިޒަމް ގާއިމްކޮށްފައިވާ ރަށްތައް އިސްތިހާރު ކުރުމަށް ސަރުކާރުން ވަރަށް ހާއްސަ އަހަންމިއްޔަތު ކަމެއް ދޭން މިވަނީ ޖެހިފައެވެ.
މިކަން ކުރެވޭނެ އެއްގޮތަކީ އެފަދަ ރަށްތައް އިސްތިހާރު ކުރުމަށް އެމްބެސިޑަރުން ހަމަޖެއްސުމެވެ. އަދި މީސްމީޑިއާ ޕްލެޓްފޯމްތަކުގައި އެމްބެސިޑަރުން ބޭނުންކޮށްގެން ހަދާފައިވާ އިސްތިހާރުތައް އާއްމުކުރުމެވެ. މިފަދަ އެމްބެސިޑަރުން ވާންޖެހޭނީ މަޝްހޫރު ބަޔަކަށެވެ. މިސާލަކަށް މަޝްހޫރު ފްޓްބޯޅަޅުންތެރިންގެ އިތުރުން މޮޑެލުން ބޭނުންކުރެވިދާނެއެވެ.
މަޝްހޫރު މީހުން ބޭނުންކޮށްގެން އިސްތިހާރު ކުރުމަކީ ގިނަ މީހުންގެ ލޯތައް އެ އިސްތިހާރަކަށް އަމާޒުވާނެ ކަމެއްކަން ގައިމެވެ. ވީއިރު، ރާއްޖޭގެ ލޯކަލް ޓޫރިޒަމް އިސްތިހާރުކުރަން މިއީ އެއްމެ މޮޅު ގޮތް ކަމަށް ވެދާނެއެވެ.
