ރާއްޖޭގެ އެއާޕޯޓަކީ ފަތުރުވެރިންނަށް އެންމެ ރައްކައުތެރި އެއާޕޯޓެއްކަން ކަށަވަރު ކުރައްވާނެ ކަމަށާއި އަދި އެކަމުގެ ހިތްހަމަޖެހުން ފަސިންޖަރުންނަށް ހޯއްދަވައި ދެއްވާނެ ކަމަށް ޓޫރިޒަމް މިނިސްޓަރު ޢަލީ ވަޙީދު ވިދާޅުވެއްޖެއެވެ.
2019 ވަނަ އަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާޢަށް މަޙަބާ ކިޔުމަށް އިއްޔެ ބޭއްވި ރަސްމިއްޔާތުގައި ޢަލީ ވަޙިދު ވަނީ ވެލާނާ އިންޓަރނޭޝަނަލް އެއާޕޯޓަކީ ދުނިޔޭގެ އެންމެ ފެންވަރު ރަނގަޅު އެއާޕޯޓަތްކުގެ ތެރޭގައި ހިމެނޭ، އަދި އެންމެ ރަނގަޅު ފެންވަރުގައި ޚިދުމަތް ދޭ އެޢާޕޯޓަކަށް ހެދުމަށްޓަކައި ސަރުކާރުން ކުރައްވަމުން ގެންދަވާ މަސައްކަތްތައް ފާހަގަކުރައްވައިފައެވެ.
އެއާޕޯޓުގެ ދެވަނަ ރަންވޭ އެޅުމުގެ މަސައްކަތް ނިމިފައިވީނަމަވެސް ރަންވޭ އާއި ގުޅިގެން އިމާރާތްކުރަން ނިންމާފައިވާ އައު ޓަރމިނަލްގެ މަސައްކަތް ނުކޮށް ހުރުމުން އެ މަޝްރޫއުގެ މަސައްކަތް ވީހައި އަވަހަކަށް ކުރިއަށް ގެންދަން ސަރުކާރުން މަސައްކަތް ކުރާކަން ރައީސް އިބްރާހީމް މުޙައްމަދު ޞާލިޙް ވަނީ ފާހަގަކުރައްވައިފައެވެ. އަދި އެކަމަށް ބޭނުންވާ ފައިސާ ސަރުކާރުން ދޭން އެއްބަސްވެފައިވާ ކަމަށާއި އެފައިސާ ވަރަށް އަވަހަށް ހަމަޖައްސަވައި ދެއްވާނެ ކަމަށްވެސް ރައީސް އިބްރާހީމް މުޙައްމަދު ޞާލިޙް ވަނީ ވިދާޅުވެފައެވެ.
