ރާއްޖެއިން ބޭރުގައި ދިރިއުޅެމުން އަންނަ ދިވެހީންގެ ކަންކަން ގާތުން ބަލައި، ކަންކަން އިތުރަށް ހައްލު ކޮށްދޭން މަސައްކަތް ކުރައްވާނެ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
އައު އަހަރުގެ ތަހުނިޔާ ފޮނުއްވަމުން މިނިސްޓަރ ވިދާޅުވީ، މިފެށުނު އަހަރަކީ ރައްޔިތުންގެ އުންމީދުތައް ހަގީގަތަކަށް ހަދައިދިނުމަށް އިތުރަށް މަސައްކަތް ކުރައްވާނެ އަހަރެއް ކަމަށެވެ.
މީގެއިތުރުން ފޮރިން މިނިސްޓަރ ވިދާޅުވީ އިންސާނީ ޙައްޤުތަކާއި ޑިމޮކްރެސީ އާއި ތިމާވެށްޓަށް އަންނަ ބަދަލުތަކަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ޚާރިޖީ ސިޔާސަތުގެ މައިގަނޑު ތަނބު ކަމުގައެވެ.
އަދި އެތަނބުތަކުގެ މައްޗަށް ބިނާކޮށް ރާއްޖެއާއި ރަޙުމަތްތެރިކަން އޮތް ޤައުމުތަކާއި ޒަމާންވީ ރަޙުމަތްތެރިކަން އޮތް ޤައުމުތަކާއި ގުޅުން ބަދަހި ކުރުމަކީ ވެސް އަމާޒެއް ކަމަށް މިނިސްޓަރ ޝާހިދު ވިދާޅުވިއެވެ. "މިއީ އުންމީދުން ފުރިގެންވާ ދަނޑިވަޅެއް" ފޮރިން މިނިސްޓަރ އަބްދުﷲ ޝާހިދު ވިދާޅުވިއެވެ.
