ރާއްޖޭގެ ކޮންމެ ތަނެއްގަ ކޮންމެ ކޮލެޖެއްގަ ކިޔެވި ނަމަވެސް ފުރަތަމަ ޑިގްރީއަށް ހިލޭ ކިޔެވުމުގެ ފުރުޞަތު ލިބޭނެ ކަމަށް ހަޔަރ އެޑިޔުކޭޝަން މިނިސްޓަރު ޑރ.އިބްރާހީމް ޙަސަން ވިދާޅުވެއްޖެއެވެ.
ނޫސްވެރިންނަސް މައުލޫމާތު ދެއްވަމުން ޑރ.އިބްރާހީމް ޙަސަން މިއަދު ވިދާޅުވީ ފަސްޓް ޑިގްރީއަށް ކިޔަވަން ބޭނުންވާ ކޮންމެ ދަރިވަރަކުން ވެސް އެ ދަރިވަރަކު ބޭނުންވާ ދާއިރާއަކުން ފަސްޓް ޑިގްރީ އަށް ކިޔެވުމުގެ ފުރުޞަތު ވެސް ހިލޭ ލިބިގެންދާނެ ކަމަށެވެ. އަދި ކުއްޖާ ކިޔަވަނީ ރާއްޖޭގެ ކޮންމެ ރަށެއްގައި ހުރެގެން ނަމަވެސް އަދި އަމިއްލަ ކޮލެޖެއްގައި ކިޔެވިނަމަވެސް ހިލޭ ކިޔެވުމުގެ ފުރުޞަތު މިސަރުކާރުން ދޭނެ ކަމަށެވެ. އަދި ފަސްޓް ޑިގްރީ އަށް މިދިއަ އަހަރު ކިޔެވި ކުދިން މިއަހަރު ކިޔަވާނަމަ (2 ވަނަ އަހަރަށް) ވެސް ސަރުކާރުން ފަންޑް ކުރާނެ ކަމަށެވެ.
ރައީސުލްޖުމްހޫރިއްޔާ ދެއްވާ ޚާއްޞަ ސްކޯލާޝިޕުތަކުގައި ކިޔަވާ ކުދިންނަށް އިޝާރާތް ކުރައްވައި ޑރ.އިބްރާހީމް ޙަސަން ވިދާޅުވީ އޭލެވެލްގައި 5 މާއްދާއިން އޭ ސްޓާރ ހޯދާ ކޮންމެ ކުޖަކަށްވެސް އެ ކުއްޖަކު ބޭނުންވާ ދާއިރާއަކުން ކިޔެވުމުގެ ފުރުޞަތު މިހާރު ލިބިގެންދާނެ ކަމަށެވެ.
މިހައިތަނަށް އޮތް ގޮތުން ބޭނުން ޤައުމަކުން ކިޔަވަން ފުރުޞަތު ލިބުނު ނަމަވެސް ބޭނުން ދާއިރާއަކުން ކިޔެވުމުގެ ފުރުޞަތު ނުލިބޭ ކަމަށް ވުމުން މިއީ ގެނެވުނު ވަރަށް ރަނގަޅު ބަދަލެއް ކަމަށް ވެސް އިބްރާހީމް ޙަސަން ވިދާޅުވިއެވެ.
ޑރ.އިބްރާހީމް ޙަސަން ވިދާޅުވީ ރައީސް އިބްރާހީމް މުޙައްމަދު ޞާލިޙް ގެ ވައުދުތަކުން އެ މިނިސްޓްރީން ފުއްދަންޖެހޭ ވައުދުތަކުގެ ތެރެއިން 3 ވައުދެއް މިހާރުވެސް ފުއްދިފައިވާ ކަމަށެވެ. އެގޮތުން ސްޓޫޑަންޓް ލޯނުގެ އިންޓަރެސްޓް 5 އިންސައްތައިން 3 ސައްތައަށް ކުޑަކުރެވިފައިވާ ކަމަށާއި ފައިސާ އަނބުރާ ދައްކަންޖެހޭ މުއްދަތުވެސް 25 އިންސައްތަ އިތުރު ކުރެވިފައިވާ ކަމަށެވެ.
