މީގެ އަހަރުތަކެއް ކުރިން ކުރަމުން އައި މަސައްކަތްތަކުގެ ސަބަބުން މެލޭރިއާ އާއި ފައިލޭރިއާ ރާއްޖެއިން މިހާރު ވަނީ ނައްތާލެވިފައި ކަމަށާއި ޑެންގީ ވެސް ނައްތައިލެވޭނެ ކަމަށް ޔަޤީން ކުރައްވާ ކަމަށް ހެލްތް މިނިސްޓަރު ޢަބްދުﷲ އަމީން ވިދާޅުވެއްޖެއެވެ.
ރައީސް އިބްރާހީމް މުޙައްމަދު ޞާލިޙްގެ ރިޔާސީ ވައުދުތަކުގެ ތެރޭގައި ހިމެނޭ "މުޅި ރާއްޖެއިން މަދިރިއާއި ބަލިފަތުރާ އެހެން ޖަނަވާރާއި ސޫފާ ސޫފި މަދު ކުރުމުގެ ޕްރޮގްރާމް" ޤަވާއިދުން ހިންގަންފެށުން ތަންފީޒުކުރުމުގެ މަސައްކަތް ފެށުމަށް މިއަދު ބޭއްވި ރަސްމިއްޔާތުގައި އަމީން މިއަދު ވިދާޅުވީ ސަރުކާރުން މަސައްކަތް ކުރާނީ ޑެންގީ ބަލީގައި ހަމަ އެކަކުވެސް މަރުވުމަށް ފުރުޞަތު ނުދިނުމަށް ކަމަށާއި އެ މަޤްޞަދު ޙާޞިލުކުރެވޭނީ މަދިރި ނައްތަލިލެވިގެން ކަމަށެވެ.
އަމީން ވިދާޅުވީ މަދިރި އާއި މީދާ ފަދަ ނުރައްކާތެރި، ސިއްހަތަށް ގެއްލުންދޭ ސޫފިތައް ނައްތައިލުމަކީ ހަމައެކަނި އެއް އިދާރާއަކަށް ކުރެވޭނެ ކަމެއް ނޫން ކަމަށާއި އެކަމަށް ހުރިހާ ފަރާތްތަކާއި ހުރިހާ އެންމެންގެ އެހީތެރިކަން ބޭނުންވާ ކަމަށެވެ. އެގޮތުން ކައުންސިލްތަކާއި އިމާރާތްކުރާ ކުންފުނިތަކާއި އެހެން ފަރާތްތަކުގެ އެހީތެރިކަމާއި އެއްބާރުލުން ވަރަށް ބޮޑަށް ބޭނުންވާ ކަމަށެވެ.
މިބާވަތުގެ ކޮންމެ ކަމަކަށް ޑަބްލިޔޫއެޗްއޯ ފަދަ ޖަމާއަތްތަކުގެ އެހީތެރިކަމާއި އެއްބާރުލުން އަބަދުވެސް ލިބެމުން އަންނަކަން ފާހަގަ ކުރައްވައި އަމީން ވަނީ ޝުކުރު އަދާކުރައްވައިފައެވެ.
