ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީގެ މަރާއި ގެއްލުވާލާފައިވާ މިނިވަން ނޫސްވެރިޔާ އަހުމަދު ރިޟްވާން އާއި ބްލޮގަރ ޔާމީން ރަޝީދުގެ މަރުގެ މައްސަލައިގައި ގުޅުން ހުރި ކަމަށް ހުސްނުއްސުއޫދް ވިދާޅުވެއްޖެއެވެ.
ގޮތް ނޭނގޭ މަރުތަކާއި ވީނުވީއެއް ނޭނގި ގެއްލުވާލާފައިވާ މީހުންގެ މައްސަލަތައް ބަލައި ކޮމިޝަންގެ ރައީސް ސުއޫދް އަށް އޮންލައިން ނޫހަކުން ކުރި ސުވާލަކަށް ޖަވާބު ދެއްވަމުން ވިދާޅުވީ، އެ ތިން މައްސައިގައިވެސް އެއްގޮތް ކަންތައްތަކެއް ހުރި ކަމަށެވެ.
"އެއް ޕެޓާނަކަށް، އެކަތި އަނެކައްޗާއި ގުޅުން ހުރި ކަމަށް އަޅުގަނޑުމެން މިބަލަނީ" ސުއޫދް ވިދާޅުވިއެވެ.
މިފަދަ މައްސަލަތައް ބަލައި ތަހުގީގު ކުރުމަށް ރައީސް އިބްރާހިމް މުޙައްމަދު ޞާލިޙު އުފެއްދެވި މިކޮމިޝަންގެ މަސައްކަތްތައް ކުރިއަށް ގޮސްފައިވާ މިންވަރާއި ބެހޭ ގޮތުން ވާހަކަ ދައްކަމުން ސުއޫދް ވިދާޅުވެފައިވަނީ، މިހާރު ބައެއް މައްސަލަތަކުގައި ކަންހިނގި ގޮތުގެ ތަސައްވުރެއް ކޮށްލެވޭ ވަރަށް މައުލޫމާތު އެއްކުރެވިފައިވާ ކަމަށާއި އެގޮތުން ފަސް މައްސަލައެއްގައި ކުރިއެރުން ލިބިފައިވާ ކަމަށެވެ. އަދި އެމައްސަލަތަކުގެ ތެރޭގައި ޑރ. އަފްރާޝީމް އާއި ރިޟްވާން އަދި ޔާމީން ރަޝީދުގެ މައްސަލަ ހިމެނޭ ކަމަށްވެސް ސުއޫދް ވިދާޅުވިއެވެ.
