މިރޭ ގަލޮޅު ރަސްމީ ދަނޑުގައި ކުޅުނު، ގޯލް ކީޕަރު ޢިމްރާން މުޙައްމަދު ޤައުމީ ޓީމަށް ކުޅުން ހުއްޓާލާ ވަދާޢީ މެޗް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައްލަވާލައްވައިފިއެވެ.
މި މެޗު ފެށުމުގެކުރިން ރާއްޖޭގެ ޤައުމީ ފުޓްބޯޅަ ޓީމުގެ ގޯލް ކީޕަރެއްގެ ހައިސިއްޔަތުން ޢިމްރާން މުޙައްމަދު ހޯއްދަވާފައިވާ އަގުހުރި ކާމިޔާބީތައް ފާހަގަކުރައްވައި އެކަމަށް ޝުކުރު އަދާކުރެއްވުމުގެގޮތުން ރައީސް އިބްރާހީމް މުޙައްމަދު ޞާލިޙް ވަނީ އިމްރާން މުޙައްމަދަށް ހަނދާނީ ފިލައެއް ދެއްވައިފައެވެ.
އިމްރާން މުޙައްމަދު ވަނީ އޭނާ ގޯލްކީޕަރުކަން ކުރުމުގައި ގެންގުޅުނު އަންގި ޖޯޑުން އަންގިއެއް ރައީސް އިބްރާހީމް މުޙައްމަދު ޞާލިހަށް ހަދިޔާކޮށްފައެވެ
ޢިމްރާން މުޙައްމަދު ފުޓްބޯޅަ ކުޅެން ފަށާފައި ވަނީ 1999 ވަނަ އަހަރު އެވެ. ފުޓްބޯޅައިގެ ދާއިރާގައި ހޭދަކުރި 19 އަހަރު ތެރެއިން 17 އަހަރު ޢިމްރާން ވަނީ ދިވެހި ޤާއުމީ ފުޓްބޯޅަ ޓީމްގައި ކުޅެފައެވެ. ޢިމްރާން މުޙައްމަދު ފުޓްބޯޅައިގެ ދާއިރާގައި ހޯދާފައިވާ އެންމެ ބޮޑު ކާމިޔާބީއަކީ 2008 ވަނަ އަހަރު ރާއްޖެއަށް ސާފް ޗެންޕިއަންޝިޕް ހޯދައިދިނުމެވެ.
