މަރުގެ މައްސަލަތައް އިތުރަށް ބަލައި ތަޙްޤީޤްކުރަން ރައީސުލްޖުމްހޫރިއްޔާ އުފެއްދެވި ކޮމިޝަނުން މައްސަލަތައް ބަލައި ކޯޓަށް ފޮނުވި ނަމަވެސް ކްރިމިނަލް ކޯޓުގައި މިހާރު ތިބި ފަނޑިޔާރުން ބައިތިއްބައިގެން އިންޞާފުލިބިދާނެ ކަމުގެ އުންމީދެއް ނެތް ކަމަށް ކޮމިޝަނުގައި އިސްކޮށް ހުންނެވި ޙުސްނުއްސުޢޫދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ދެއްވަމުން ޙުސްނުއްސުޢޫދު ވިދާޅުވީ ކޮމިޝަނުން ކިތަންމެ ފުރިހަމައަކަށް މައްސަލަތައް ތަޙްޤީޤް ކުރުމަށްފަހު ކޯޓަށް ފޮނުއްވި ނަމަވެސް އަދުލުވެރިކަމާއިއެކު މައްސަލަތައް ބެލިދާނެ ކަމަށް އުންމީދު ވެސް ނުކުރައްވާ ކަމަށެވެ. އަދި މިކަން ޤާނޫނީ ވަކީލުންވެސް ޤަބޫލުކުރާ ކަމަށެވެ. "ޝަރުޢީ މަރުހަލާ އިސްލާޙް ނުކުރެވި އިންޞާފު ލިބިދާނެ ކަމަށް އަޅުގަނޑު ޤަބޫލެއް ނުކުރަން. އެކަން އިޞްލާޙް ކުރެވޭނީ ގިނަ މުއައްސަސާތަކެއް ގުޅިގެން ވަރަށް ގިނަ މަސައްކަތްތަކެއް ކޮށްގެން."
ޙުސްނުއްސުޢޫދު ވިދާޅުވީ މަރުގެ މައްސަލަތަކަށް ޝަރުޢީ ފުރަތަމަ މަރުހަލާގައި ގޮތެއް ނުނިމި 3. 4 އަހަރު ދުވަސް ފާއިތުވެގެން ދިއުމަކީ އިންޞާފު ނުލިބުން ކަމަށެވެ. އަދި ބަނަދުގައި ބަހައްޓަންޖެހޭ މުއްދަތު ދިގުވެ ތުހުމަތުކުރެވޭ މީހުން ކޯޓުތަކުން މިނިވަން ކުރަމުން ގެންދާއިރު އެ މުއްދަތުގައި ކޯޓުތަކުން މައްސަލައަށް ގޮތެއް ނުނިންމަނީ ކީއްވެގެން ކަމާއިމެދު ސުވާލު ކުރައްވަން ބޭނުންފުޅު ކަމަށެވެ.
"މިގޮތަށް ކަންތައް ކުރުމުން އިތުބާރުގެ މައްސަލަ އުފެދޭ. ބަންދުކުރަންޖެހޭ މީހުންނަށް ބަންދުގެ މުއްދަތު ޖަހައި ނުދިނުން، ބަނދުކުރަން ނުޖެހޭ މީހުންނަށް ބަންދުގެ މުއްދަތު ޖަހައިދިނުން. މިފަދަ އިތުބާރުގެ މައްސަލަތައް އުފެދޭ ކަންކަން ދަނީ ހިނގަމުން. އަދި ކޯޓުގެ ނިޒާމުގެ ތެރެއިން މީހުން ދޫވެފައިވެސް އެބަހުރި. އިދާރީ މުވައްޒިފުންނާ އަދި ފަނޑިޔާރުން ކޮންމެވެސްވަރަކަށް ޝާމިލުވެގެން މަރުގެ މައްސަލަތައް އެބަހުރި ސާބިތު ނުކޮށް. ގޭންގްތަކުގެ ނުފޫޒު ފަނޑިޔާށރުންގެ މައްޗަށް ފޮރާފަ އެބަހުރި، ބައެއް މައްސަލަ ތަކުގަ ހެކިން ކޯޓުތަކަށް ހާޒިރުކޮށްފަ ތިއްބާ ގޭންގްތަކުން ހެކިންގެ މައްޗަށް ނުފޫޒު ފޯރުވާފަ އެބަހުރި، ހަމަ އެގޮތަށް ފަނޑިޔާރުންނަސް ނުފޫޒު ފޯރުވާފަ އެބަހުރި. ބައެއް ފަނޑިޔާރުންގެ ސެކިޔުރިޓީއަށް ބައެއް ގޭންގުތައް ބޭނުންކޮށްފަ އެބަހުރި. ފަނޑިޔާރުން ޢައްޔަނުކުރުމުގަ ބައެއް ގޭންގްތަކުގެ ކޯޓާއެއް އޮންނަކަމަށް ވަނީ މައުލޫމާތު ލިބިފަ. އެގޮތުން ގޭންގްތަކުން ޢައްޔަނު ކުރާ ފަނޑިޔާރުން ކްރިމިނަލް ކޯޓުގެ ފަނޑިޔާރުކަމަށް އައްޔަނުކުރުން. މިއީ ހިނގާފަ ހުރި ކަންތައްތައް." ކަމަށްވެސް ހުސްނުއްސުޢޫދު ވިދާޅުވިއެވެ.
