ޖެންޑަރ މިނިސްޓްރީއަށް މިދިއަ އަހަރު 2800 މައްސަލަ ހުށަހެޅި ކަމަށް ޖެންޑަރ މިނިސްޓަރ ޝިދާތާ ޝަރީފް ވިދާޅުވެއްޖެއެވެ.
މޫކައި ހޮޓަލުގައި ނޫސްވެރިންނަށް މައުލޫމާތު ދެއްވަމުން މިއަދު ޝިދާތާ ވިދާޅުވީ 2017 ވަނަ އަހަރު ހުށަހެޅުނީ 2800 މައްސލަ ކަމަށާއި އެއިގެ ތެރޭގައި ކުޑަކުދިންނަށް ކުރާ އަނިޔާ އާއި ގުޅުންހުރި 1300 އަށްވުރެ މައްސަލަ ހިމެނޭ ކަމަށެވެ. މިއަހަރުގެ މިހައިތަނަށް 2345 މައްސަލަ ހުށަހެޅިފައިވާ ކަމަށެވެ. އަދި ހުށަހެޅުނު މައްސަލަތަކުގެ ތެރެއިން 50 އިންސައްތަ މައްސަލައަކީ ކުޑަކުދިންނާއި ގުޅުން ހުރި މައްސަލަތައް ކަމަށެވެ.
ޝިދާތާ ވިދާޅުވީ މިކަމުންވެސް އެނގެނީ ކުޑަކުދިންނާއި ބެހޭ ކަންކަން ބެލެހެއްޓުން އިތުރަށް ހަރުދަނާ ކުރުމުގެ މުހިންމުކަން ކަމަށާއި އެކަމަށް މިހާރުވެސް ގެންދަނީ މަސައްކަތް ކުރަމުން ކަމަށެވެ. އަދި މައްސަލަތައް ރިޕޯޓް ކުރެވޭނެ ފަސޭހަ މެކޭނިޒަމެއް ޤާއިމުކުރަންވެސް ގެންދަނީ މަސައްކަތްތައް ކުރަމުން ކަމަށެވެ.
މިސަރުކާރުގެ ސިޔާސަތަކީ ރައްޔިތުންނާއި ވީހައި ގާތުން ޚިދުމަތް ދިނުން ކަމަށްވުމުން އަތޮޅުތަކުގައި ހަރަކާތްތެރިވާނެ ކޮމިޓީތައް އުފައްދައި ކޮމިޓީތަކުގެ ބޭނުން މިހާރުވެސް ހިފަން ފަށާފައިވާ ކަމަށްވެސް ޝިދާތާ ވިދާޅުވިއެވެ.
(ޚަބަރު މިވަނީ ޖެންޑަރ މިނިސްޓްރީން ފަހުން ދިން މައުލޫމާތާއި އެއްގޮތަށް އިޞްލާޙްކޮށްފައެވެ.)
