ވަޒީފާތަކުގައި ދިވެހީން ގެންގުޅެންޖެހޭ މިންގަނޑުތައް މުރާޖަޢާކޮށް، ތަންފީޒުކުރުން ހަރުދަނާކުރެވޭނެ ކަމަށާއި ޤާނޫނުގައި ބުނާ ނިސްބަތުން ދިވެހީންނަށް ރިޒޯޓް ވަޒީފާ ނުލިބޭ މައްސަލަ ހައްލުކުރަން ސަރުކާރުން މަސައްކަތް ކުރާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އިއްޔެ ކުރިއަށް ގެންދިއަ ގެސްޓް ހައުސް ސިމްޕޯޒިއަމް ނިންމުމަށް ރޭ ދަރުބާރުގޭގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ ރަށްރަށަށް ފަތުރުވެރިކަން ތަޢާރުފު ކުރުމުގެ މަޤްޞަދަކީވެސް، ފަތުރުވެރިކަމުގެ މަންފާގެ އެންމެ މަތީ މިންވަރެއް، ސީދާ ރައްޔިތު މީހާގެ ޖީބަށް ވަންނަކަން ކަށަވަރުކުރުން ކަމަށެވެ.
"އެހެނަސް، މިއަދުވެސް ބައެއް ރިޒޯޓުތަކުން އިވެނީ، ސަރވިސް ޗާޖު ނުލިބޭ ވާހަކައާއި، ޤާނޫނުގައި ބުނާ ނިސްބަތުން ދިވެހީންނަށް ރިޒޯޓް ވަޒީފާ ނުލިބޭ ވާހަކަ." ރައީސް އިބްރާހީމް މުޙައްމަދު ޞާލިޙް ވިދާޅުވީ މި ޝަކުވާތަކަށް ނިމުމެއް ގެނައުމަށްޓަކައި، ޤާނޫނާ އެއްގޮތަށް ސަރވިސް ޗާޖު ދެވޭކަން ކަށަވަރުކުރުމުގެ މަސައްކަތް، ޓޫރިޒަމް މިނިސްޓްރީން ފުރިހަމަކުރަމުން ގެންދާނެ ކަމަށެވެ.
ހަމައެފަދައިން، ވަޒީފާތަކުގައި ދިވެހީން ގެންގުޅެންޖެހޭ މިންގަނޑުތައް މުރާޖަޢާކޮށް، ތަންފީޒުކުރުން ހަރުދަނާކުރެވޭނެ ކަމަށެވެ. ރައީސް އިބްރާހީމް މުޙައްމަދު ޞާލިޙް ވިދާޅުވީ މިކަންކަން ޙައްލުކުރުމަށް ސަރުކާރުން ގެންގުޅޭ އެއް ވިސްނުމަކީ، ދިވެހިން ގެންގުޅެންޖެހޭ ނިސްބަތަށްވުރެ އިތުރަށް ދިވެހިން ގެންގުޅޭނަމަ، އެ ރިޒޯޓަކަށް ނުވަތަ އެ ގެސްޓް ހައުސްއަކަށް ޓެކްސް އިންސެންޓިވެއް ދިނުން ކަމަށެވެ.
އަދި މިއީ ދިވެހީންނަށް ރިޒޯޓް ވަޒީފާ ކަށަވަރުކުރުމަށް އެޅޭ ހަރުދަނާ ފިޔަވަޅަކަށްވާނެ ކަމަށެވެ. ޤާނޫނުގައި ބަޔާންކުރާ އަދި ރިޒޯޓުތައް ތަރައްޤީ ކުރުމަށް ހަދާފައިވާ އެއްބަސްވުންތަކުގައި ބަޔާންވެގެންވާ އަދަދަށް ވަޒީފާތަކުގައި ދިވެހިން ގެންގުޅެނީ މަދު ރިޒޯޓުތަކެއްގައިކަން ފާހަގަކުރެވެއެވެ. އަދި މިކަމުގެ ޝަކުވާއަކީ އަބަދުވެސް ރައްޔިތުން ކުރަމުން ގެންދާ ޝަކުވާއެކެވެ.
