މީގެ 8 ވަރަކަށް އަހަރުކުރިން ޜާއްޖޭގައި ފަށައިގަތް ގެސްޓް ހައުސް ވިޔަފާރި އަކީ ވަރަށް ކާމިޔާބު މަސައްކަތެއް ކަމަށާއި މިހާރުވެސް ރައްޔިތުންގެ ޖީބުތަކަށް ޑޮލަރު ވަންނަމުންދާ ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މިއަދު ދަރުބާރުގޭގައި ފެށި ގެސްޓް ހައުސް ސިމްޕޯޒިއަމް ނިންމުމުގެ ގޮތުން މިރޭ ބޭއްވި ރަސްމިއްޔާތުގައި ރައީސް އިބްރާހީމް މުޙައްމަދު ޞާލިޙް ވިދާޅުވީ އެންމެ އަތޮޅެއް ފިޔަވައި އެހެން ހުރިހާ އަތޮޅުތަކެއްގައި މިހާރު ގެސްޓް ހައުސް އެބަހުރި ކަމަށާއި ށ. އަތޮޅުގައިވެސް ވަރަށް އަވަހަށް ގެސްޓް ހައުސް ވިޔަފާރި ފެށިގެންދާނެ ކަމަށް އުންމީދުކުރައްވާ ކަމަށެވެ. އަދި ފަތުރުވެރިކަމުގެ ސިނާއަތުގައި 41000 އެނދު ހުރިއިރު އެއިގެ ތެރެއިން 7000 އެނދަކީ ގެސްޓް ހައުސްތަކުގައި ހުރި އެނދުތައް ކަމަށް ވުމުން ސިނާއަތް ކުރިއަރަމުންދާ މިންވަރު އަނގައިދޭ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ރާއްޖެއަކީ ހަމަ އެކަނި އަގު ބޮޑު މަންޒިލެއްގެ ގޮތުގައި އޮތް އޮތުން މިހާރު ނިމިފައިވާ ކަމަށާއި މިހާރު ރާއްޖެއަކީ މެދުފަންތީގެ ފަތުރުވެރިންނަށްވެސް މަރުހަބާ ކިޔަމުންދާ ޤައުމެއް ކަމަށެވެ. އަދި އެކަމުގެ ސަބަބުން އަގުހެޔޮ (ބަޖެޓް) އެއާލައިންތަކުގެ ދަތުރުތައްވެސް ރާއްޖެއަށް އިތުރުވެފައިވާ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ގެސްޓް ހައުސްތަކުގެ ވިޔަފާރި ކުރިއެރުވުމަށްޓަކައި ރަށްތައްވެސް ތަރައްޤީކުރަންޖެހޭ ކަމަށެވެ. އެގޮތުން ރަށްރަށުގެ ބަނދަރާއި ނަރުދަމާ އާއި އަދި ދެވޭ ޞިއްހީ ޚިދުމަތުގެ ފެންވަރުވެސް މަތިކުރަންޖެހޭ ކަމަށެވެ. "މިކަމުން އެނގެނީ ފަތުރުވެރިކަމުގެ ކުރިއެރުމާއި ރަށްތަކުގެ ތަރައްޤީވެސް މިވަނީ ގުޅިލާމެހިފައިކަން."
ގެސްޓް ހައުސް ވިޔަފާރި ފުރަތަމަ ފަށައިގަތް ރަށްރަށުގައި މިހާރު ރިޒޯޓް ފެންވަރަށް ކަންކަން ތަރއްޤީކޮށްފައިވާކަން ވެސް ރައީސް އިބްރާހީމް މުޙައްމަދު ޞާލިޙް ފާހަގަކުރެއްވިއެވެ.
