ފެބްރުއަރީ މަސް ހުސްވުމުގެ ކުރިން އެސްއެމްއީ ބޭންކެއް ހުޅުވުމުގެ އަމަލީ މަސައްކަތް ފެށޭނެ ކަމަށާއި އެގޮތުން ފައިނޭންޝަލް އިންސްޓިޓިޔުޝަނެއް އުފައްދައި ގެސްޓް ހައުސްތަކާއި ގެދޮރު ބިނާކުރަން ބޭނުންވާ ލޯނު ލިބިގެންދާނެ ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ގެސްޓް ހައުސް ސިމްޕޯޒިއަމް ނިންމުމުގެ ގޮތުން މިރޭ ދަރުބާރުގޭގައި ބޭއްވި ރަސްމިއްޔާތުގައި ރައީސް އިބްރާހީމް މުޙައްމަދު ޞާލިޙް ވިދާޅުވީ ކޮންމެ ވިޔަފާރިއެއްގެ ވެސް މައި ބަދައަކީ މާލީ ތަނަވަސްކަން ކަމަށާއި އެކަން ފަހިކޮށްދިނުމަށްޓަކައި ފުރަތަމަ ކަމެއްގެ ގޮތުން ސަރުކާރުން ޤަޞްދުކުރަނީ އެސްއެމްއީ ފިނޭންސިންގ އެންޑް ޑިވޮލޮޕްމަންޓް ކޯޕޮރޭޝަނެއް އުފައްދަން ކަމަށެވެ. އަދި މި އިންސްޓިޓިޔުޓް ފުރަތަމަ އެފެދިގެންދާނީ ޑިޕޮޒިޓް ނުނަގާ ތަނެއްގެ ގޮތުގައި ކަމަށާއި އަދި މެދު ރާސްތާގައި ޑިޕޮޒިޓްވެސް ނެގޭ ގޮތަށް އެސްއެމްއީ ބޭންކަކަށް ބަދަލުވެގެންދާނެ ކަމަށެވެ.
"އަޅުގަނޑުމެން މިއުފައްދާ އެސްއެމްއީ ބޭންކުގައި ލާމަރުކަޒީ ނިޒާމަށް ފުރުޞަތު ދިނުމުގެ ގޮތުން މިހާރު އޮތް 3 ސިޓީ ކަމަށްވާ މާލެ ސިޓީއާ ފުވައްމުލަކު ސިޓީ އަދި އައްޑޫ ސިޓީގެ ހިއްޞާ ހިމެނޭ ގޮތަށް އެބޭންކް އުފެދިގެންދާނީ."
ގެސްޓް ހައުސް ވިޔަފާރި ތަރައްޤީ ކުރުމަށް މިސަރުކާރުން ހޭދަކުރާނެ ކަމުގެ ޔަޤީންކަންވެސް ރައީސް އިބްރާހީމް މުޙައްމަދު ޞާލިޙް ވަނީ ދެއްވައިފައެވެ.
