ދަރުބާރުގޭގައި މިއަދު ކުރިއަށް ގެންދާ ގެސްޓް ހައުސް ސިމްޕޯޒިއަމް ނިންމުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައިވެރިވެވަޑައިގަންނަވަން ވަނީ ހަމަޖެހިފައެވެ.
މިއަދު ހެނދުނު ޓޫރިޒަމް މިނިސްޓަރު ޢަލީ ވަޙީދު ވިދާޅުވީ ގެސްޓްހައުސްތަކަށް ދިމާވާ ދަތިތައް ހައްލު ކުރުމުގައި ލާމަރުކަޒީ ނިޒާމަށް ބަދަލުތަކެއް ގެންނަން ޖެހޭކަން މިހާރުވެސް ފާހަގަކުރެއްވިފައިވާ ކަމަށެވެ.
ޢަލީ ވަޙީދު ވިދާޅުވީ ޓެކްސްތަކާ ގުޅޭ ކަންކަމަށް އިސްލާހުތަކެއް ގެންނަން ޖެހޭ ކަމާއި ސަމާލުކަން ދޭން ޖެހިފައިވާ ގިނަ ދާއިރާތަކެއް އެބަހުރި ކަމަށެވެ.
ގެސްޓް ހައުސްގެ ވިޔަފާރި ފުޅައުވަމުން އަންނައިރު އެކަމުގެ ސަބަބުން ދިވެހިންގެ އިސްލާމީ ވަންތަކަމަށް ވަރަށް ބޮޑަށް ނޭދެވޭ އަސަރު ކުރަމުން އަންނަކަން ގިނަ ބައަކު ދަނީ ފާހަގަކުރަމުންނެވެ. ޚާއްޞަކޮށް ބަރަހަނާ ހާލު ގޮނޑުދޮށްތަކުގައި އުޅުމާއި ބިކިނީގައި ޢާންމުންގެ ތެރޭގައި އުޅުން ފަދަ ކަންކަން ދަނީ ފާހަގަކުރަމުންނެވެ.
މީހުން ދިރިއުޅޭ ބައެއް ރަށުގައި ހިންގާ ގެސްޓްހައުސްތަކުގައި ތިބޭ ފަތުރުވެރިންގެ އަމަލުތައް ހުންނަނީ ރިޒޯޓުތަކުގައި ތިބޭ ފަތުރުވެރިންގެ އަމަލުތައް ހުންނަ ގޮތަށްކަންވެސް ގިނަ ބައަކު ދަނީ ފާހަގަކުރަމުންނެވެ.
