ދަރުބާރުގޭގައި މިއަދު ކުރިއަށް ގެންދާ ގެސްޓްހައުސް ސިމްޕޯސިއަމްގައި 400 ވަރަކަށް ގެސްޓްހައުސް ބައިވެރިވުމަކީ ލިބުނު ވަރަށް ބޮޑު ކުރިއެރުމެއް ކަމަށް ޓޫރިޒަމް މިނިސްޓަރު ޢަލީ ވަޙީދު ވިދާޅުވެއްޖެއެވެ.
ސިމްޕޯޒިއަމް ތެރެއިން ނޫސްވެރިންނަށް މައުލޫމާތު ދެއްވަމުން ޢަލީ ވަޙީދު ވިދާޅުވީ މި ސިމްޕޯޒިއަމްގައި ބައިވެރިވި ފަރާތްތަކުން ހާމަކުރި މައުލޫމާތުގެ ސަބަބުން އެފަރާތްތަކުގެ ކަންބޮޑުވުންތައް ހުރިވަރު އެނގިވަޑައިގެންފި ކަމަށާއި މިއީ ކަންކަން ކުރިއަށް ގެންދަން ލިބުނު ވަރަށް މުހިންމު މައުލޫމާތެއް ކަމަށެވެ.
ޢަލީ ވަޙީދު ވިދާޅުވީ މެންދުރުގެ ބައްދަލުވުމުގައި ވެސް ގެސްޓްހައުސްތަކުގެ ކަންބޮޑުވުންތައް އަޑުއެހުން އޮންނާނެ ކަމަށެވެ. މިސަރުކާރު ވެގެންދާނީ ރައްޔިތުންގެ އަޑު އަހައިގެން ކުރިއަށްދާ ސަރުކާރަކަށް ކަމަށެވެ.
ޢަލީ ވަޙީދު ވިދާޅުވީ ފަތުރުވެރިން ރާއްޖެއަށް އެންމެ ގިނައިން ޒިޔާރަތް ކުރާ ސީޒަނުގެ މިފަދަ ދުވަސްވަރެއްގައިވެސް މިހައި ގިނަ ބައަކު ސިމްޕޯޒިއަމްގައި ބައިވެރިވުމުން ވަރަށް އުފާކުރައްވާ ކަމަށެވެ. އަދި ސިނާއަތުގެ އުންމީދު އޮތް މިންވަރުވެސް ހާމަވެގެން ހިނގައްޖެ ކަމަށެވެ.
ޢަލީ ވަޙީދު ވިދާޅުވީ ފަތުރުވެރިކަމުގެ ސިނާޢަތް ކުރިއަށް ގެންދާނެ ގޮތުގެ ސްޓްރެޖިކް ޕްލާން އެކުލަވައިލުމުގެ މަސައްކަތް މިސަރުކާރުގެ ފުރަތަމަ 100 ދުވަހުގެ ތެރޭގައި ފަށާނެ ކަމަށާއި ޕްލޭން އެކުލަވައި ލައްވާނީ ސިނާއަތުގެ ހުރިހާ ބައިވެރިންގެ ޚިޔާލާއިއެކުގައި ކަމަށެވެ.
މިއަދު ކުރިއަށް ގެންދާ ސިމްޕޯސިއަމްގެ ސަބަބުން ގެސްޓްހައުސް ދާއިރާއަށް ސަރުކާރުން ގެންނާނެ ބަދަލުތައް ދެނެގަނެވޭނެ ކަމަށް ވެސް ޢަލީ ވަޙީދު ވިދާޅުވިއެވެ.
