ބިންމަތީގައި ހުރި މާތް ﷲ ގެ ގެކޮޅުތައް ކަމަށްވާ މިސްކިތްތައް މަރާމާތުކޮށް ބެލެހެއްޓުމަށާއި އިތުރު މިސްކިތް އަޅަން ބޭނުންވާ ފައިސާ ހޯދުމުގެ މަޤްޞަދުގައި ބިނާކުރި ވަޤްފް ބިނާ "ދާރުލްއީމާން" ކުއްޔަށް ދީފައިވަނީ އަހަރަކު 108،000 ރުފިޔާ ގެއްލުންވާ ގޮތަށް ކަމަށް ދައުލަތުގެ އޮޑިޓަރ ޖެނެރަލް ހާމަކުރައްވައިފިއެވެ.
މިސްކިތްތަކަށް ހަރަދު ކުރަން އުފައްދާފައިވާ ވަޤްފް ފަންޑުންނާއި އިސްލާމިކް މިނިސްޓަރުކަމުގައި ހުންނަވައި ޑރ. މުޙައްމަދު ޝަހީމް ޢަލީ ސަޢީދު ބޭރުގެ ހެޔޮ އެދޭ ފަރާތްތަކުންނާއި އަދި ދައުލަތުގެ ބަޖެޓުން ހަރަދުކޮށްގެން ބިނާކޮށްފައިވާ "ދާރުލް އީމާން" ކުއްޔަށް ދީފައިވާ ގޮތާއިމެދު އޮޑިޓަރ ޖެނެރަލް މިމޭރުމުން ހާމަކުރައްވާފައިވަނީ އިސްލާމިކް މިނިސްޓްރީގެ 2017 އަހަރުގެ މާލީ އޮޑިޓް ރިޕޯޓްގައެވެ.
އެ ރިޕޯޓުގައި ބުނެފައި ވަނީ އެ އިމާރާތުގެ ފަންގިފިލާތައް ކުއްޔަށް ދީފައިވާ މުއްދަތަށް ބަލާއިރު އެކަމުގެ ސަބަބުން ދައުލަތަށް 540،000ރ.ގެ ގެއްލުމެއް ވާނެ ކަމަށެވެ. އަދި ކުލީގެ ގޮތުގައި ލިބެންޖެހޭ ގިނަ އަދަދެއްގެ ފައިސާ ނުލިބިވާކަން ވެސް ރިޕޯޓުގައި ވަނީ ފާހަގަކޮށްފައެވެ.
ރިޕޯޓުގައިވާ ގޮތުން އެ އިމާރާތުން 2017 ވަނަ އަހަރުގެ ކުލީގެ ގޮތުގައި އިސްލާމިކް މިނިސްޓްރީ އަށް ލިބެންޖެހޭ 10.4 މިލިޔަން ރުފިޔާ ނުލިބި އޮތްއިރު އެ ފައިސާ ހޯދަން ކުރަން ޖެހޭ މަސައްކަތް ވެސް އެ މިނިސްޓްރީން ކޮށްފައެއް ނުވެއެވެ. މީގެ ތެރެއިން ބައެއް ފައިސާ ދެއްކުމުން ވެސް 6.3 މިލިޔަން ރުފިޔާ އަށް ވުރެ ގިނަ ފައިސާ ނުލިބިވާކަން ވަނީ ރިޕޯޓުގައި ފާހަގަކޮށްފައެވެ.
ވަގުފް ބިނާގެ ފަންގިފިލާތައް 3 ފަރާތަކަށް ކުއްޔަށް ދޫކުރި އިރު އެންމެ އަގު ހެޔޮކޮށް ދޫކޮށްފައި ވަނީ އޯޝަން ބަރަކާ ޕްރައިވެޓް ލިމިޓެޑް ކިޔާ ކުންފުންޏަކަށް ކަމަށްވެސް ރިޕޯޓުގައި ވަނީ ފާހަގަކޮށްފައެވެ.
ﷲ ތަޢާލާގެ ގެކޮޅުތައް ބަލަހައްޓާނެ ފައިސާ ހޯދަން އަޅާފައިވާ އިމާރާތުގެ ފައިސާގެ ކަންކަން މިހާލަތުގައި ހުރުމުން ﷲ ތަޢާލާއަށް އެބައަކު ބިރުވެތިވާ މިންވަރާއިމެދުވެސް ސުވާލު އުފެދެއެވެ.
