- ދީނީ ޖަމްޢިއްޔާތަކައި ވީހާވެސް ގާތުން މަސައްކަތް ކުރާނަން – މިނިސްޓަރ ޑރ. އަޙްމަދު ޒާހިރު ޢަލީ
މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ރާއްޖޭގެ ދީނީ ޖަމްޢިއްޔާތަކާއި ބައްދަލުކުރައްވައިފިއެވެ.
އިސްލާމިކް މިނިސްޓްރީން ބުނެފައިވަނީ މި ބައްދަލުކުރެއްވުން ކުރިއަށް ގެންދިއައީ އިއްޔެ ކަމަށާއި މި ބައްދަލުވުމުގެ މަޤްޞަދަކީ މިނިސްޓްރީއާއި ޖަމްޢިއްޔާތަކުގެ ގުޅުން ބަދަހިކުރުން ކަމަށެވެ. ދީނީ ޖަމްޢިއްޔާތަކާއި މިނިސްޓްރީއަކީ ދީނީ ހޭލުންތެރިކަން އިތުރުކުރުމަށް މަސައްކަތް ކުރާ ދެފަރާތެވެ.
ބައްދަލުވުމުގައި މިނިސްޓަރ ވަނީ ޖަމްޢިއްޔާތަކަށް ކުރިމަތިވާ ގޮންޖެހުންތަކާމެދު މަޝްވަރާކުރައްވައިފައެވެ. މިގޮތުން މި މައިދާނުގައި ކުރިމަތިވާ ގޮންޖެހުންތަކާއި، ޖަމްޢިއްޔާތައް ކުރިއެރުވުމަށް ކުރެވެން ހުރި މަސައްކަތްތަކަކީ ކޮބައިކަމާއި، ދައުވަތުގެ މައިދާން ހީނަރުވިއަ ނުދިނުމަށް އެޅެން ހުރި ފިޔަވަޅުތަކަށް ވަނީ އަލިއަޅުއްވައިލައްވައިފައެވެ.
މި ބައްދަލުވުމުގައި ދައުވަތުގެ މައިދާނުގައި އެންމެ ފުންނާބު އުސްކޮށް ޙަރަކާތްތެރިވާ ޖަމްޢިއްޔާތައް ވަނީ ބައިވެރިވެފައެވެ. މިގޮތުން، ޕީސް ފައުންޑޭޝަން، މަހަލްދީބް ފައުންޑޭޝަން، މުސްލިމުންގެ ގުޅުން، ޖަމްޢިއްޔަތު ސަލަފް، އަލް ޢަސްރު، ރީޗް، އަލް ހިޖްރަ ފަދަ ޖަމްޢިއްޔާތައް ހިމެނެއެވެ. މީގެ އިތުރުން މިނިސްޓްރީގެ އިސްވެރިންނާއި، މިނިސްޓްރީ އޮފް އިސްލާމިކް އެފެއާޒްގެ ސްޓޭޓް މިނިސްޓަރ އައްޝައިޚް އިލްޔާސް ޖަމާލްވަނީ ބައިވެރިވެވަޑައިގެންފައެވެ.
މިއީ އިސްލާމިކް މިނިސްޓަރުގެ ހައިޞިއްޔަތުން ޑރ. އަޙްމަދު ޒާހިރު ޢަލީ ޖަމްޢިއްޔާތަކާއެކު ބައްދަލުކުރެއްވި ފުރަތަމަ ފަހަރެވެ. މީގެ ކުރިން އިސްލާމިކް މިނިސްޓަރކަމުގެ މަޤާމާ ޙަވާލުވެވަޑައިގަތުމަށްފަހު 24 ނޮވެންބަރުގައި މިނިސްޓަރ ޑރ. އަޙްމަދު ޒާހިރު ޢަލީ ވަނީ ރާއްޖޭގެ ޢިލްމުވެރިންނާއި ބައްދަލުކުރައްވައިފައެވެ.
