ނޮވެމްބަރ މަހުގެ 17 ވަނަ ދުވަހުގެ ރޭ، ހޯމް މިނިސްޓަރު ކަމުގެ ހުވާ ކުރެއްވި ޝައިޚް އިމްރާން އަބްދުﷲ، އެމަގާމުން މިއަދު އިސްތިއުފާ ދެއްވުމަށްފަހު އަލުން އެމަގާމާއި ހަވާލުވެވަޑައިގެންފިއެވެ.
ހޯމް މިނިސްޓަރުކަމުން އިސްތިއުފާ ދެއްވުމަށްފަހު އަލުން މަގާމުގެ ހުވާ ކުރެއްވީ ވަޒީރުކަމަށް ޝައިޚް އިމްރާން ފުރަތަމަ އައްޔަނު ކުރެއްވިއިރު، އޭނާގެ މައްޗަށް އޮތް 12 އަހަރުގެ ޖަލު ހުކުމުގެ ސަބަބުން ވަޒީރުކަން ކުރެވިދާނެ ކަމާއިމެދު ބައެއް ފަރާތްތަކުން ސުވާލު އުފައްދާފައިވާތީއެވެ. ނަމަވެސް އެހުކުމް ސުޕްރީމް ކޯޓުން ފަހުން ވަނީ ބާތިލު ކޮށްފައެވެ.
ގާނޫނު އަސާސީ ބުނާގޮތުގައި ޖިނާއި ކުށެއްގައި އެއް އަހަރަށްވުރެ ގިނަ ދުވަހުގެ ޖަލު ހުކުމެއް އޮތް ބޭފުޅަކަށް ވަޒީރުކަން ކުރެއްވޭނީ އެހުކުމް ތަންފީޒުކޮށް ނިމުނުތާ ނުވަތަ މާފު ލިބުނުތާ ތިން އަހަރުވުމަށް ފަހުއެވެ.
އެނގިފައިވާ ގޮތުގައި ހޯމް މިނިސްޓަރު އިމްރާން އަބްދުﷲ އެމަގާމުން އިސްތިއުފާ ދެއްވެވީ އަމިއްލައަށް ބޭނުން ވެގެންނެވެ. އަދި އެމަނިކުފާނަށް ހޯމް މިނިސްޓަރުކަން އަލުން ދެއްވައިފިކަން ރައީސް އޮފީހުން ވެސް ވަނީ ކަށަވަރު ކޮށްދެއްވާފައެވެ.
