ފުލުހުންގެ އިންޓެލިޖެންސް ޑިޕާޓްމެންޓްގެ ކުރިގެ ވެރިޔާ މުޙައްމަދު ހަމީދު (އެމްސީ ހަމީދު) ވަޒީފާއިން ވަކިކުރީ ނުރަނގަޅުން ކަމަށާއި އެހެންކަމުން އޭނާއަށް ފުލުހުންގެ ވަޒީފާ އަލުން ދޭން ސުޕްރީމް ކޯޓުން އަމުރު ކޮށްފިއެވެ.
ސުޕްރީމް ކޯޓުން މިފަދައިން ކަނޑައެޅީ އެމްސީ ހަމީދުގެ ފަރާތުން ހުށަހެޅި އެމައްސަލައިގެ މިއަދު އިއްވި ހުކުމްގައެވެ.
ޗީފް ސުޕަރިންޓެންޑެންގެ މަގާމުގައި ހުއްޓާ 2012 ވަނަ އަހަރުގެ އޯގަސްޓް މަހު އޭނާ ވަޒީފާއިން ވަކިކުރީ ފުލުހުންގެ ސިއްރު މައުލޫމާތުތަކެއް ލީކު ކުރިކަމުގެ ތަހުމަތުގައެވެ. އެމްސީ ހަމީދަށް އަލުން ވަޒީފާ ދިނުމަށް ސިިވިލް ކޯޓުން އަމުރު ކޮށްފައިވަނިކޮށް ހައިކޯޓުން ވަނީ އެހުކުމް ބާތިލު ކޮށްފައެވެ.
އޭނާގެ ފަރާތުން އެމައްސަލަ ސުޕްރީމް ކޯޓުގައި އިސްތިއުނާފް ކުރުމުން އެމައްސަލަ ބަލައި އެކޯޓުން މިއަދު އަމުރުކުރީ އޭނާ ކުރިން ހުރި ފެންވަރުގެ ފުލުހުންގެ ވަޒީފާއެއް އަލުން ދިނުމަށެވެ.
ސިއްރު މައުލޫމާތު ތަކެއް ލީކު ކުރި ކަމުގެ ތުހުމަތުގައި ހަމީދު 2012 ވަނަ އަހަރު ހައްޔަރު ކުރި ނަމަވެސް އޭނާގެ މައްޗަށް އެމައްސަލައިގައި ދައުވާއެއް ނުކުރެއެވެ.
ފުލުހުންގެ ވަޒީފާއެއް އަލުން އެމްސީ ހަމީދަށް ދިނުމަށް ސުޕްރީމް ކޯޓުން އަމުރުކޮށްފައިވާއިރު، ޕޮލިސް ކޮމިޝަނަރުގެ މަގާމަށް އޭނާ އައްޔަނު ކުރަން އުޅޭކަމުގެ އަޑުތަކެއް ވަނީ ފެތުރިފައެވެ. ފުލުހުންގެ ގާނޫނު ބުނާ ގޮތުގައި ޕޮލިސް ކޮމިޝަނަރުގެ މަގާމަށް އައްޔަނު ކުރެވޭނީ ފުލުހުންގެ އެންމެ އިސް އޮފިސަރުންގެ ތެރޭގައި ހިމެނޭ އޮފިސަރެކެވެ.
