ޢާއިޝަތު ރަފާޙް ޢަލީ
ﷲ ތަޢާލާ ޝޫރާ ސޫރަތުގެ 28 ވަނަ އާޔަތުގައި ވަޙީ ކުރައްވާފައިވެއެވެ.
وَهُوَ الَّذِي يُنَزِّلُ الْغَيْثَ مِن بَعْدِ مَا قَنَطُوا وَيَنشُرُ رَحْمَتَهُ ۚ وَهُوَ الْوَلِيُّ الْحَمِيدُ ﴿٢٨﴾
މާނައީ: "އެކަލާނގެއީ، އެއުރެންގެ އުންމީދު ކެނޑުމަށްފަހު، ވާރޭވެއްސަވައި، އެކަލާނގެ رحمة ފަތުރުއްވާ ރަސްކަލާނގެއެވެ. އަދި އެކަލާނގެއީ، ގިނަގިނައިން حمد ލިބިވޮޑިގެންވާ، އެހީތެރިވަންތަ ރަސްކަލާނގެއެވެ. (28)"
އެއާއެކު، ތިބާ އުނދަގޫތަކާއި ތަކުލީފުތައް ތަޙައްމަލުކުރަމުންދާއިރު، އަދި ބުރަކޮށް މަސައްކަތްކުރަމުން ގޮސް އުއްމީދު ކެނޑޭ ހިސާބަށް ދާ ހިނދު، ﷲ އެކަމަށް ނަޞްރާއި ކާމިޔާބީ ފޮނުއްވައިދެއްވަވައެވެ. ﷲ އެ އުފާވެރި ޚަބަރު ފޮނުއްވައެވެ. ﷲ ތިބާއަށް އެހީތެރިވެވޮޑިގަންނަވައެވެ.
އަދި ޝޫރާ ސޫރަތުގެ 28 ވަނަ އާޔަތް ނިމޭއިރު ﷲ ތަޢާލާ ވަޙީކުރައްވަނީ
وَهُوَ الْوَلِيُّ الْحَمِيدُ ﴿٢٨﴾
މާނައީ: އަދި އެކަލާނގެއީ، ގިނަގިނައިން حمد ލިބިވޮޑިގެންވާ، އެހީތެރިވަންތަ ރަސްކަލާނގެއެވެ. (28)"
އިބްރާހީމްގެފާނުގެ ޤައުމުގެ މީހުން، އެކަލޭގެފާނާ ދެކޮޅަށް ރޭވި މަކަރުވެރި ރޭވުންތަކަށް ވަކީލުކުރެއްވިއެވެ. އަދި ދުޢާ ކުރެއްވިއެވެ. އިބްރާހީމްގެފާނު ކުރެއްވި ދުޢާ، މުމްތަޙިނާ ސޫރަތުގެ 4 ވަނަ އާޔަތުގައި ﷲ ތަޢާލާ ވަޙީކުރައްވާފައިވެއެވެ.
رَّبَّنَا عَلَيْكَ تَوَكَّلْنَا وَإِلَيْكَ أَنَبْنَا وَإِلَيْكَ الْمَصِيرُ ﴿٤﴾
މާނައީ: "އަޅަމެންގެ ވެރިރަސްކަލާކޮ! ހަމައެކަނި، އިބަރަސްކަލާނގެއަށް އަޅަމެން وكيل ކޮށްފީމުއެވެ. އަދި ހަމައެކަނި، އިބަރަސްކަލާނގެ حضرة އަށް އަޅަމެން رجوع ވެ توبة ވެއްޖައީމުއެވެ. އަދި އެނބުރި ދިޔުންވަނީ، އިބަރަސްކަލާނގެ حضرة އަށެވެ. (4)"
- ޝައިޚް އަދްނާން މެންކްގެ ދަރުސަކުން
