މާލެ ނޯތު ހާބަރު ސަރަހައްދުން ބޯޓުފަހަރަށް މުދާ ދޫކުރުމުގެ ޚިދުމަތް ދިނުމަށްޓަކައި، ވިޔަފާރިތަކަށް އިތުރު ޖާގަ ދޫކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނިންމައިފިއެވެ. މި ނިންމުމަކީ ބަނދަރުގެ ޚިދުމަތްތައް ހަރުދަނާކޮށް، ވިޔަފާރިވެރިންނަށް ފަސޭހަ މަގުތަކެއް ކޮށައިދިނުމުގެ ގޮތުން ނިންމި ނިންމުމެކެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން އެމްޕީއެލްގެ އެސިސްޓެންޓް ޖެނެރަލް މެނޭޖަރ އަޙްމަދު ޢައްޒާމް ޝަރީފް ވިދާޅުވީ، ނޯތު ހާބަރު ސަރަހައްދުން ވިޔަފާރި ބޭނުންތަކަށް ޚާއްސަކޮށްގެން އިތުރު 6 ސްލޮޓެއް ދޫކުރުމަށް މިހާރު އިޢުލާންކޮށްފައިވާ ކަމަށެވެ. މި ޖާގަތައް ދޫކުރުމަށް ހަމަޖެހިފައިވަނީ ބިޑް އުސޫލުން ކަމަށްވެސް އޭނާ ފާހަގަކުރެއްވިއެވެ.
މިހާރުވެސް އެ ސަރަހައްދުން ބައެއް ބޮޑެތި ކުންފުނިތަކަށް ޖާގަ ދޫކޮށްފައިވާކަން ފާހަގަކުރައްވައި ޢައްޒާމް ވިދާޅުވީ، "މިހާރުވެސް އެސްޓީއޯ، އެމްޑަބްލިއުއެސްސީ އަދި މިފްކޯ ފަދަ ކުންފުނިތަކަށް އެ ސަރަހައްދުން ޖާގަ ދޫކޮށްފައިވެއެވެ." މި ކުންފުނިތަކުން ދަނީ އެ ސަރަހައްދުގައި މުދާ ދޫކުރުމުގެ ޚިދުމަތްތައް ފޯރުކޮށްދެމުންނެވެ.
އެމްޕީއެލްއިން ބުނި ގޮތުގައި މިގޮތަށް އިތުރު ޖާގަތައް ދޫކުރުމުގެ މައިގަނޑު މަޤްޞަދަކީ ބޯޓުފަހަރަށް ބޭނުންވާ ތަކެތި ބަނދަރު ސަރަހައްދުން ފަސޭހަކަމާއެކު ފޯރުކޮށްދިނުމުގެ މަގު ފަހިކޮށްދިނުމެވެ. މީގެ ސަބަބުން މުދާ އުފުލުމާއި ބޯޓުފަހަރަށް މުދާ ބަރުކުރުމުގެ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށް އެ ކުންފުނިން އުންމީދު ކުރެއެވެ.
