ތިބާގެ ލޮލުން ވައްޓައިލާ ކޮންމެ ކަރުނަ ތިއްކެއްވެސް ﷲ ތަޢާލާ ދެކެދެނެވޮޑިގެންވެއެވެ. ތިބާގެ ހިތުގައި ވަންހަނާކޮށްގެން ހުރި ކަންކަންވެސް ﷲ ތަޢާލާ ދެނެވޮޑިގެންވެއެވެ. ވީމާ އެކަންކަން މީސްތަކުންނަށް އަންގަން މަސައްކަތްކުރުމުގެ ބަދަލުގައި ﷲ ތަޢާލާގެ ޙަޟްރަތުގައި މިފަދައިން ދުޢާކުރަމުން ގެންދާށެވެ! ކުރިމަތިވެފައިވާ ދަތިތަކުން އަރައިގަނެވޭނެ މަގެއް ދައްކަވާނެތެވެ. ހިތްދަތިކަމުގެ ބަދަލުގައި އުފާވެރިކަން މިންވަރުކުރައްވަވާނެތެވެ. އިން ޝާ ﷲ
ޔާ ﷲ! މިއަޅާއަށް ތަޙައްމަލްކުރަންޖެހިފައިވާ ހިތްދަތިކަމުގެ ބަދަލުގައި އުފާވެރިކަން ދެއްވަވާނދޭވެ! ހިތްދަތިކަން ލިބެމުން އަންނަ ކޮންމެ ކަމެއްގެ ބަދަލުގައި ހިތްހަމަޖެހުން ލިބޭނެ ކަމެއް މކިންވަރުކުރައްވަވާނދޭވެ!
ޔާ ﷲ! މިއަޅާއަށް ކުރަން ބޮޑުވެފައިވާ ކަންކަމަކީ ލުއިފަސޭހަކަމެއް ކަމުގައި ލައްވަވާނދޭވެ! އާމީން
ﷲ ތަޢާލާ ތިބާއަށް ލައްވަވަންހުރި ކިތަންމެ ކުޑަކުޑަ ރަހްމަތަކަށްވެސް ހުރަސްއެޅޭނެ އެކަކުވެސް ނުހުންނާނެއެވެ. ވީމާ މީސްތަކުންނަށް އާދޭސްކުރުން ހުއްޓާލައި ﷲ ތަޢާލާގެ ރަޙްމަތަށް އެދޭ މީހަކުކަމުގައިވާށެވެ! ތިބާއަށް ހުރި ހުރިހާ މައްސަލަތަކެއްވެސް ޙައްލުކޮށްދެއްވަވާނެތެވެ. އިން ޝާ ﷲ
- މުފްތީ މެންކުގެ ދަރުސަކުން
