ޕީޖީ ޢައިޝަތު ބިޝާމް މަޤާމުން އިސްތިއުފާދޭން ޖެހޭ ކަމަށާއި އަމިއްލައަށް އިސްތިޢްފާ ނުދޭނަމަ އިތުބާރު ނެތް ކަމުގެ މައްސަލަ މަޖިލީހަށް ވައްދަވާނެ ކަމުގެ އިންޒާރު ތިނަދޫ ދެކުނު ދާއިރާގެ މެންބަރު ޢަބްދުﷲ އަޙްމަދު ދެއްވައިފިއެވެ.
ޕީޖީ ބިޝާމް ވަނީ ރައީސް ޔާމީނު ދައުވާ ކުރަން ބޭނުންވި ކޮންމެ މީހެއްގެ މައްޗަށް ރައީސް ޔާމީނު ބޭނުންވި ގޮތަކަށް ދައުވާކޮށްދީފައެވެ. އަދި އެއްވެސް އަޞްލެއް ނެތް މައްސަލަތަކުގައި ދައުލަތުގެ ވަކީލުން ކޯޓުތަކަށް ފޮނުވައި ވަކާލާތުވެސް ކުރުވައިފައެވެ.
މެންބަރު ޢަބްދުﷲ މިމޭރުމުން ވިދާޅުވެފައިވާއިރު ބިޝާމް ވަނީ މަޖިލީހުގެ ގިނަ އަދަދެއްގެ މެންބަރުންގެ މައްޗަށް އެއްވެސް ކުށެއްނެތް މައްސަލަތަކުގައި ދައުވާ ކުރަންވެސް ކޯޓަށް ފޮނުވައިފައެވެ.
ހަމައެޢާއިއެކު ކުރީގެ ޑިފެންސް މިނިސްޓަރު ކާނަލް މުޙައްމަދު ނާޒިމްގެ މައްސަލައިގައި ތަޙްޤީޤް ފުރިހަމަވެސް ނުކުރެވެނީސް ދައުވާ ކުރުމުގެ އިތުރުން ތަޙްޤީޤް ފުރިހަމަ ކުރެވުމުން އެއީ ނާޒިމް ޢާއި އެއްވެސް ގުޅުމެއްވެސް ނެތް މައްސަލައެއްކަން ސާބިތުވުމުން ވެސް އަލުން މައްސަލަ ބެލުމުގައި ބިޝާމް ވަނީ ޤާނޫނީ ވާޖިބު އަދާނުކޮށްފައެވެ.
ބިޝާމްގެ މައްޗަށް ތުހުމަތު ކުރެވޭ ކޮރަޕްޝަން މައްސަލަ މިއަދު ރައީސުލްޖުމްހޫރިއްޔާ އުފެއްދެވި ރިޔާސީ ކޮމިޝަނުން ބެލުމުން ގިނަ ކަންތައްތަކެއް އިތުރަށް އެނގިގެންދާނެ ކަމަށްވެސް ބެލެވެއެވެ.
