އާ ސަރުކާރުގެ ފޮރެން މިނިސްޓަރު އަބްދުﷲ ޝަހިދުގެ އެންމެ ފުރަތަމަ ބައްދަލުވުން ފަލަސްތީނުގެ ފޮރެން މިނިސްޓަރާއެކު ބާއްވައިފިއެވެ.
ފޮރެން މިނިސްޓްރީން ބުނެފައިވާ ގޮތުގައި މިނިސްޓަރ ޝާހިދު ފަލަސްތީނުގެ ފޮރެން މިނިސްޓަރ ރިއާދު މާލްކިއާއެކު ބޭއްވެވި ބައްދަލުވުމުގައި ދެގައުމުގެ ގުޅުން އިތުރަށް ބަދަހި ކުރުމަށް މަޝްވަރާ ކުރެއްވިއެވެ.
ފަލަސްތީނު ރައްޔިތުންނާއެކު ދިވެހި ސަރުކާރާއި ރައްޔިތުން ތިބޭނެކަމުގެ ޔަގީންކަން ދެއްވަމުން މިނިސްޓަރ ވިދާޅުވީ ފަލަސްތީނު މީހުންނަށް އެމީހުންގެ ޙައްގު ހޯދަން ކުރާ މަސައްކަތަށް ތާއީދު ކުރާނެ ކަމުގެ ޔަގީންކަން ވެސް ދެއްވާ ކަމަށެވެ.
މިނިސްޓަރ ޝާހިދަށް ފޮރެން މިނިސްޓަރުކަން ލިބިވަޑައިގަތުމުން އެކަމަށް މަރުހަބާ ވިދާޅުވެ މާލްކި ވިދާޅުވިއެވެ.
މިދެބޭފުޅުންގެ ބައްދަލުވުމުގައި ފޮރިން މިނިސްޓްރީގެ ސެކްރެޓަރީ ބައިލެޓްރަލް އަހުމަދު ޚަލީލާއި އެމިިނިސްޓްރީގެ ޑައިރެކްޓާ އަބްދުލް ވާރިސް ސައީދާއި އެސިސްޓެންޓް ޑައިރެކްޓާރ މަރިޔަމް ބައްސާމާ ފާރުގު ވެސް ބައިވެރިވެ ވަޑައިގެންނެވިއެވެ.
