ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރެއްވި ރަސްމީ ދަތުރުފުޅަކީ ކާމިޔާބު ދަތުރުފުޅެއްކަމަށާއި މި ދަތުރުފުޅުގެ ހުރިހާ މަޤްޞަދުތަކެއް ފުރިހަމައަށް ހާސިލުވެފައިވާކަމަށް ރައީސް ވިދާޅުވެއްޖެއެވެ. މި ވާހަކަ ރައީސް ވިދާޅުވީ އިންޑިއާގެ ބެންގަލޫރުގައި ދިރިއުޅުއްވާ ދިވެހިންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވި ގޮތުގައި މި ދަތުރުފުޅުގެ ސަބަބުން ދިވެހި ރައްޔިތުންނަށް ފައިދާކުރާނެ އެތައް ކަމެއްގެ މަގު ތަނަވަސްވެ، ރައްޔިތުންގެ ޙައްޤުތައް ހޯދައިދިނުމަށް އިތުރު ފުރުޞަތުތަކެއް ހުޅުވިގެން ގޮސްފައިވެއެވެ. އަދި މި ދަތުރުފުޅުގެ ސަބަބުން ޚާރިޖީ، އިޤްތިޞާދީ އަދި އިޖުތިމާޢީ ގޮތުންވެސް ގިނަގުނަ ކުރިއެރުންތަކެއް ލިބިގެން ދިޔަކަމަށް ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވި ގޮތުގައި އިޖުތިމާޢީ ދާއިރާގެ ތެރޭގައި ޞިއްޙީ ދާއިރާއިން ޑޮކްޓަރުން ތަމްރީނު ކުރުމާއި، ތަޢުލީމީ އަދި ކުޅިވަރުގެ ދާއިރާތަކުން ކުރިއެރުން ހޯދުމުގެ ފުރުޞަތުތައް ހިމެނެއެވެ. މީގެ އިތުރުން، ގެދޮރު އިމާރާތްކުރުމާއި، މަސްވެރިކަމުގެ ދާއިރާއާއި އެހެނިހެން ދާއިރާތަކަށް އިންވެސްޓްމަންޓް ގެނައުމަށް މަގުފަހިވެ، އެކި ދާއިރާތަކުން ގިނަ ކުރިއެރުންތަކެއް ލިބިގެން ގޮސްފައިވާކަމަށްވެސް ރައީސް ފާހަގަކުރެއްވިއެވެ.
މި ދަތުރުފުޅުގެ ސަބަބުން ދެ ޤައުމުގެ ގުޅުން އިތުރަށް ބަދަހިވެ، ދިވެހިރާއްޖެއަށް ލިބޭނެ ފައިދާތައް އިތުރުވެގެންދާނެކަމަށް ބެލެވެއެވެ. ރައީސްގެ މި ބަސްފުޅުތަކުން ދޭހަވަނީ މި ދަތުރުފުޅަކީ ދިވެހިރާއްޖޭގެ ތަރައްޤީއަށް މުހިންމު ބިންގަލެއް އެޅިގެން ދިޔަ ދަތުރުފުޅެފުޅެއްކަމެވެ.
އިންޑިއާ ދަތުރަކީ މަޤްޞަދު ހާސިލުކުރެވުނު ކާމިޔާބު ދަތުރެއް: ރައީސް
