ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަދި އަނބިކަނބަލުން އިންޑިއާއަށް ކުރައްވަމުންދާ ރަސްމީ ދަތުރުފުޅުގެ ތެރެއިން، އިއްޔެ އިންޑިއާގެ އިޤްތިޞާދީ ވެރިރަށް މުމްބާއީއަށް ވަޑައިގެންފިއެވެ.
މިއީ ރައީސުލްޖުމްހޫރިއްޔާގެ ދެކަނބަލުން އިންޑިއާއަށް ކުރައްވަމުންދާ ދަތުރުފުޅުގެ ތިންވަނަ ދުވަހެވެ. އިންޑިއާގެ ވެރިރަށް ނިއު ދިއްލީއަށްފަހު، ރައީސް ވަނީ އަގްރާއަށް ޒިޔާރަތްކުރައްވާފައެވެ. އޭގެފަހުން، އިއްޔެ ވަނީ މުމްބާއީއަށް ވަޑައިގެންފައެވެ.
މުމްބާއީއަށް ޝަރަފުވެރިކަމާއެކު ވަޑައިގަތުމުން، ރައީސުލްޖުމްހޫރިއްޔާގެ ދެކަނބަލުންނަށް ޗަތުރަޕަތީ ޝިވާޖީ މަހާރާޖު އިންޓަރނޭޝަނަލް އެއަރޕޯޓުގައި ވަނީ މަރުޙަބާ ދެންނެވުމުގެ ރަސްމިއްޔާތެއް ބޭއްވިފައެވެ. މި ރަސްމިއްޔާތުގައި އިންޑިއާގެ އިސް ވެރިންތަކެއް ބައިވެރިވެ ވަޑައިގެންނެވިއެވެ.
ރައީސުލްޖުމްހޫރިއްޔާ މުމްބާއީއަށް މި ވަޑައިގަތީ މި ސިޓީގައި އިންތިޒާމުކުރެވިފައިވާ ޚާއްޞަ ވިޔަފާރީގެ ހަރަކާތެއްގައި ބައިވެރިވެ ވަޑައިގަތުމަށެވެ. މި ހަރަކާތުގައި މުމްބާއީގެ ފާހަގަކޮށްލެވޭ ވިޔަފާރިތަކާއި އިންވެސްޓްމަންޓު ކުންފުނިތަކުން ބައިވެރިވާނެއެވެ. މީގެއިތުރުން، އިންޑިއާގެ ބައެއް ނަމުދާރު ޝަޚްޞިއްޔަތުންވެސް މި ހަރަކާތުގައި ބައިވެރިވާނެކަމަށް ބެލެވެއެވެ.
މި ދަތުރުފުޅުގެ މައިގަނޑު މަޤްޞަދަކީ ދިވެހިރާއްޖެއާއި އިންޑިއާއާ ދެމެދު އޮތް އިޤްތިޞާދީ އަދި ވިޔަފާރީގެ ގުޅުން އިތުރަށް ބަދަހިކުރުމެވެ. އަދި ދެ ޤައުމުގެ ދެމެދުގައި އޮތް އެކުވެރިކަން އިތުރަށް ހަރުދަނާކުރުމެވެ.
ރައީސުލްޖުމްހޫރިއްޔާގެ މި ދަތުރުފުޅުގައި ސަރުކާރުގެ އިސް ވަޒީރުންނާއި އޮފިޝަލުން ބައިވެރިވެ ވަޑައިގަންނަވައެވެ.
ރައީސް ޑރ.މުޢިއްޒު އިންޑިއާގެ އިޤްތިޞާދީ ވެރިރަށް މުމްބާއީއަށް ވަޑައިގެންފި
