މިސަރުކާރުގެ ފުރަތަމަ 100 ދުވަހުގެ ތެރޭގައި ރާއްޖޭގެ މަސްކަނޑުތަކުގައި ބޭރުގެ ފަރާތްތަކުން މަސްވެރިކަން ކުރުމުގެ ހުއްދަ ދިނުން ހުއްޓައިލައްވާނެކަން ރައީސް އިބްރާހީމް މުޙައްމަދު ޞާލިޙް އިއްޔެ ވަނީ އިޢްލާން ކުރައްވައިފައެވެ.
މިއީ ރާއްޖޭގެ މަސވެރިންނަށް ލިބިގެން ދިއަ ވަރަށް ބޮޑު އުފާވެރިކަމެއް ކަމަށް މަސްވެރިން މިހާރުވެސް ދަނީ ބުނަމުންނެވެ. އެހެންކަމާއިއެކުވެސް މަސްވެރިން ބުނަނީ މިކަމުގެ އެއްވެސް ނަތީޖާއެއް ފެންނާނީ ރާއްޖޭގެ މަސްކަނޑުތަކުގައި މިހާރު މަސްވެރިކަން ކުރަމުންދާ ބޭރުގެ އުޅަނދުތައް ބޭރުކުރެވިގެން ކަމަށެވެ.
މަސްވެރިން ބުނަނީ މަސްވެރިކަން ކުރަން އުޅަނދަކަށް ހުއްދަ ދިނުމުން އެތއް ބޯޓުތަކެއް މަސްވެރިކަން ކުރާ ކަމަށެވެ. "އެބޯޓުން މަސްބަލައި އަންނަ ބޯޓުފަހަރާއި އެ ބޯޓަށް ބޭނުންވާ ތަކެތި ހިފައިގެން އަންނަ ބޯޓުފަހަރުގެ ނަމުގައިވެސް ޢާދޭ. ހަޤީޤަތަކީ މިހުރިހާ އުޅަނދުތަކުންވެސް ކުރަނީ މަސްވެރިކަން. އެކަން ބަލާނެ ފަރާތެއް ނެތް." ކަމަށެވެ.
ރައީސް ޞާލިޙް އިއްޔެ ވިދާޅުވީ "ގުޅިފައިވާ ބަދަހި އިއްތިހާދަކާއެކު، މިއަދު އަޅުގަނޑުމެން މި އުފައްދާ ސަރުކާރު އިރާދަކުރެއްވިއްޔާ، ވެގެންދާނީ، ހުރިހާ ދާއިރާއަކުން މި ރާއްޖެއަށް އިތުރު ކުރިއެރުމާއި ތަރައްޤީ ގެނެސްދޭނެ ސަރުކާރަކަށް. ރައްޔިތުންނަށް އިންސާފުވެރި ހެޔޮ ވެރިކަމެއް ކޮށްދޭނެ ސަރުކާރަކަށް. ތަފާތު ސިޔާސީ ފިކުރުތައް ބަދަހިކަމާއެކު ހިފެހެއްޓުމަށް އަޅުގަނޑު ކުރަންޖެހި، ނުކޮށް އޮތީ މިވެނި ކަމެކޭ ބުނެވޭނޭ އެއްވެސް ކަމެއް ދޫކޮށެއް ނުލާނަން." ކަމަށެވެ.
އެހެންކަމުން ރާއްޖޭގެ މަސްކަނޑުތަކުން ވައްކަން ކުރަން ދީފައިވާ ލައިސަންސްތައް އަތުލައި މިހާރުން މިހާރަށް ކަނޑުތައް ހިމާޔަތްކޮށްދީ ދިވެހި މަސްވެރިންނާއި ހަވާލުކުރަންޖެހޭ ކަމަށް މަސްވެރިން ދަނީ ބުނަމުންނެވެ.
