އަހަރެންގެ މައިންބަފައިންނަށް ފުރަތަމަ ލިބުނު ދަރިފުޅަކީ އަހަރެނެންނެވެ. ނަމަވެސް ދުވަހަކުވެސް މަންމަ އާއި ބައްޕަގެ ލޯބި ލިބުނު ހަނދާނެއް ނުވެއެވެ. އަބަދުވެސް ހުންނަނީ ބާކީކޮށްފައެވެ. އެކަމާ އަބަދުވެސް ވަރަށް ދެރަވިއެވެ.
ކަންކަން މާބޮޑަށް ނުއެނގުނު ނަމަވެސް ހަނދާން ހުރެއެވެ. އަހަރެންގެ އުމުރުން ފަސް އަހަރުގައި ފިރިހެން ކޮއްކޮއަކު ލިބުނެވެ. ކޮއްކޮ ލިބުމުން ކޮއްކޮ ދެކެ މަންމަ އާއި ބައްޕަ ވަރަށް ބޮޑަށް ލީބިވިއެވެ. އަބަދު އުޅެނީ ކޮއްކޮ ގޮވައިގެން ކޮއްކޮއަށް އުފާކޮށްދޭށެވެ.
ކާފަ ދިރިއުޅެނީ މާދުރު ސިޓީއެއްގައެވެ. ބައްޕަމެން ކާފަ ދެކޭކަށް ދުވަހަކުވެސް ނުދެއެވެ. 2،3 އަހަރުކޮށްލާފައި އަންނަނީ ކާފައެވެ. އަހަރެންގެ އުމުރުން 10 އަހަރުގައި ކާފަ އަހަރެމެން ދެކެލަން ގެއަށް އައި ދަތުރެއްގައި ގޭގައި ހުރެފައި އެނބުރިދަމުން ދިއައީ އަހަރެން ގޮވައިގެންނެވެ. އެއީ ބައްޕަމެން އަހަރެންނާއިމެދު ކަންކަންކުރާ ގޮތް ފެނި އެކަމާ ދެރަވެގެންނެވެ. ކާފަ އަހަރެން ގެންދަން ބޭނުންވާހަކަ ބުނާއިރަށް ބައްޕަމެން އަވަސް އަވަހަށް އެކަމަށް އެއްބަސްވެއްޖެއެވެ.
ކާފަ އަހަރެން ގެންދިއުމަށްފަހު އަހަރެންނަށް ލޯބިދިނެވެ. ގެންގުޅުނީ ވަރަށް ލޯބިންނެވެ. ކިޔވައިދިނެވެ. ހިތާމައަކީ އަހަރެންގެ ޙާލު ބަލައިލަން ބައްޕަމެން ދުވަހަކުވެސް ނުގުޅާ ކަމެވެ. ނުގުޅައި ގިނަދުވަސްވީމާ ހަނދާންވާވަރުން އަހަރެން ގުޅިނަމަވެސް ވަރަށް އަވަސްއަވަސްކޮށްލާފައި ބާއްވާތީވެސް ވަރަށް ދެރަވެއެވެ.
ކޮންމެއަކަސް ކިޔަވައި ނިމުނުތަނާހެން ކާފަ ނިޔާވެއްޖެއެވެ. އެކަން ބައްޕަމެންނަށް އެންގީމާ ޖަނާޒާއަށް ވެސް ނައުދެއެވެ. ކާފަގެ ޢާއިލާއިންވެސް އައީ އެންމެ މީހެކެވެ. އެނގުނު ގޮތުގައި އެއީ ކާފަގެ ކޮއްކޮއެވެ. އޭނާގެ ދަރިއަކުވެސް ނުހުރެއެވެ. އެހެންވެ ޢާއިލާއެއް ނެތީއެވެ. ކާފަގެ ހުރި ހަމައެކަނި ދަރިއަކީ އަހަރެންގެ ބައްޕައެވެ. ބައްޕަ ނައީއެވެ.
ކާފަ ނިޔާވިތާ 3 ވަނައަށް ދުވަހު ކާފަގެ ވަޞިއްޔަތް ހިފައިގެން ޤާނޫނީ ވަކީލު އައިސް ކިޔައިދީ ލިޔުންތައް ހަވާލުކުރިއެވެ. އެއްވެސް މީހަކަށް ކާފަގެ ޙަޤީޤަތް ނުއެނގެނީއެވެ. ކާފައަކީ މިލިއަނަރެކެވެ. ބިންވެރިއެކެވެ. ހުރިހާ ބިންތަކާއި ފައިސާތަކެއް ދީފައިވަނީ އަހަރެންނަށެވެ.
ޚުދު އަހަރެންވެސް ޙައިރާންވީމެވެ. ކާފަ ގާތުގައި 12 އަހަރު ހުރިއިރުވެސް ކާފައަކީ އެފަދަ ތަނަވަސް މީހެއްކަން އެނގިފައެއް ނެތެވެ. ކޮންމެއަކަސް ވަކީލު ކާފަހެ ވަޞިއްޔަތް ބައްޕައަށް އަންގާއިރަށް އަހަރެންދެކެ އިންތިހާއަށް ލޯބިވެއްޖެއެވެ. އިރުއިރުކޮޅުން ގުޅަންފަށައިފިއެވެ. ކާފަގެ ގޭގައި އެކަނި ނުހުރެ އެމީހުންގެ ގާތަށް ބުނަން ފަށައިފިއެވެ. ނުދިއުމުން އެންމެފަހުން އަހަރެންގެ ގާތަށް އަތުވެއްޖެއެވެ.
އަހަރެން ހުރީ އެކަމަށް ވަރަށް ބޮޑަށް ހޭލުންތެރިވެގެންނެވެ. އައިސް 2،3 ދުވަސްވުމަށްފަހު ދައްކަން ފެށީ ކޮއްކޮގެ ވާހަކައެވެ. އަހަރެންގެ ބެލެނިވެރިއަކަސްވާނީ ކޮއްކޮ ކަމާއި ކޮއްކޮއަސް ރަނގަޅަށް ކަންކަން ކޮށްދޭންޖެހޭނެ ވާހަކައެވެ. ލިބުނު ތަނަވަސްކަމުން ބައެއް ކޮއްކޮއަސް ދޭންޖެހޭނެ ވާހަކައެވެ.
ބައްޕަމެންނާއި ޒުވާބު ނުކުރަންވެގެން އެއިން އެއްވެސް ވާހަކައަކަށް ޖަވާބެއް ނުދެމެވެ. ހަމައެކަނި ބުނިހާވެސް އެއްޗަކީ އުޅެން ބޭނުންވަނީ މިހައިތަނަށްވެސް އުޅުނު ގޮތަށް އެކަނި ކަމަށެވެ. މައިންބަފައިންނާއި ވަކިން ކަމަށެވެ. އަހަރެންގެ ބެލެނިވެރިއަކަށް ވާން ކޮއްކޮއަށް ޖެހޭނީ އަހަރެންނަށް ދަރިން ނުލިބި އެކަނިވެރިވެއްޖެނަމަ ކަމަށެވެ.
ބައްޕަމެން އައި ބޭނުން ނުފުދޭނެކަން އެނގުމުން އެނބުރި ދިއައީއެވެ. އަހަރެން ކައިވެނިކޮށްގެން ދިރިއުޅެން ފެށީއެވެ. އަހަރެންނަސް 6 ދަރިން ލިބުނެވެ. 2 ދަރިން ކުޑައިރު ނިޔާވީއެވެ. 4 ދަރިން ބޮޑެތިވެ މާމަ ކިޔައިފިއެވެ.
އަހަރެން ދުނިޔޭގެ ހުރިހާ މައިންބަފައިންނަށް ދޭން ބޭނުންވާ މެސެޖަކީ ލިބޭ ދަރިންގެ އުމުރު ކަނޑައަޅަނީ ދަރިންނެއް ނޫނެވެ. ވީމާ ކޮންމެ ޖިންސަކުން ދަރިން ލިބުނު ނަމަވެސް ބާކީކޮށް ނިކަމެތިކޮށްނުލާށެވެ. ދަރިންނަށް ނަޞީބު މިންވަރުކުރައްވަވަނީ ވެސް ޖިންސަކުން ނޫނެވެ. އެކަލާނގެ އިރާދަކުރައްވަވާ އަޅަކަށް އަދި އެކަލާނގެ މިންވަރުކުރައްވަވާ ވަރަކަށެވެ. އެކަމުގައި އެއްވެސް މީޙެއްގެ އެއްވެސް ބާރެއް ނުހިނގައެވެ.
- ޝެރީ / ލޮސްއެންޖަލަސް، އެމެރިކާ
