ރަމަޟާން މަހަށް ތައްޔާރުވާ މީހާ އެންމެ ބޮޑަށް ގަދައަޅައި ކުރަންޖެހޭ ކަމަކީ ކޮބައިކަމާއިމެދު ގިނަ ބައަކު ސުވާލުކުރެއެވެ. އެސުވާލަށް އަހަރެން ދޭނެ އެންމެ ކުރު ޖަވާބަކީ ކަސްތޮޅު ނާޅުއްވަވާ ޝައިޠޯނުންގެ ކިބައިން ސަލާމަތްވުމެވެ.
މައުޟޫޢުގައި ކުރިއަށްދަމާ ހިނގާށެވެ! ރަމަޟާން މަހަށް ﷲ ތަޢާލާ ކަސްތޮޅު އަޅުއްވަވަނީ ބޮޑެތި ޝައިޠޯނުންތަކެވެ. ވީއްލިފައި ތިބޭ ޝައިޠޯނުންގެ ތެރޭގައި ދެބާވަތެއްގެ ޝައިޠޯނުން ހިމެނެއެވެ. އެއީ ލޮލަށް ލިފެންނަ ކުދި ޝައިޠޯނުންނާއި އިންސީންގެ ތެރޭގައި ތިބި ޝައިޠޯނުންނެވެ. މީގެ ތެރެއިންވެސް އެންމެ ނުރައްކައުތެރިކަން ބޮޑީ އިންސީނގެ ތެރޭގައި ހިމެނޭ ޝައިޠޯނުންނެވެ. މި ދެބާވަތުގެ ޝައިޠޯނުންގެ ކިބައިން ސަލާމަތްވެވިގެން ނޫނީ ރަމަޟާން މަސް ކާމިޔާބެއް ނުކުރެވޭނެއެވެ.
އެންމެ ފުރަތަމަ ބަލަންވީ ޝައިޠާނާގެ މާނައަށެވެ. ޝައިޠާނާގެ މާނައިގައި، އީމާން ނުވާ މީހާ، ކުފުރުވާ މީހާ، މީސްތަކުން ލައްވައި ނުބައި ކަންތައްތައް ކުރުވާ މީހާ އަދި އެކަމަށް ހިތްވަރުދޭ މީހާ ހިމެނެއެވެ. ވީމާ އެމީހެއްގެ ކިބައިގައި މިފަދަ ސިފަތައް ހުރި ނަމަ އެއީ އިންސާނެއް ކަމަށްވީނަމަވެސް އަދި ޖިންނިއެއް ކަމަށްވީ ނަމަވެސް އެއީ ޝައިޠާނެކެވެ.
ޢާންމު ގޮތެއްގައި ޝައިޠާނާ އަހަރެމެން މިކިޔަނީ އިބިލީހުގެ ބައިވެރިންގެ ތެރެއިން މީސްތަކުންގެ ލޯތަކަށް ނުފެންނަ ޖިންނި ޝައިޠާނުންނަށެވެ. ނަމަވެސް ޝައިޠާނާއަކީ ކޮންމެހެން ޖިންނިއަކަށްވާކަށް ނުޖެހޭނެއެވެ. އިންސާނުންގެ ތެރޭގައި ވެސް ޝައިޠާނުންތައް ބައިވަރެވެ.
ޝައިޠާނާގެ ކިބައިން ސަލާމަތް ވެވޭނީ ޝަޠާނާއަކީ ކޮބައިކަން ދަސްކޮށްގެންނެވެ. ވީމާ އަހަރެމެން ކޮންމެ މީހަކީވެސް ޝައިޠާނާ އަކީ ކޮބައިކަން ވަރަށް ރަނގަޅަށް ދަސްކުރަން ޖެހޭނެ މީހެކެވެ.
މިހާރުގެ ބައެއް އިލްމުވެރިން ބަޔާންކުރައްވާ ގޮތުގައި ޙަޤީޤީ ޝައިޠާނަކީ އިބިލީސް އެކަންޏެވެ. ދެން އުޅޭ ޝައިޠާނުންނަކީ ޖިންނީންނާއި އިންސީންގެތެރޭގައިވާ ބައެކެވެ. މިސާލަކަށް އެއްވެސް ފާފައެއް ކުރުމަށް އެއްވެސް މީހަކަށް ދައުވަތުދޭނަމަ އެމީހާޢަކީ ޝައިޠާނެކެވެ. އެއްވެސް ފާފައެއް ކުރަން މީހަކަށް މަގުފަހިކޮށްދޭނަމަ އެއީ ވެސް ޝައިޠާނެކެވެ. ލޮލަށް ފެނުނަސް ނުފެނުނަސް އެއީ ހަމަ ޝައިޠާނެކެވެ.
މިމޭރުމުން ބުނެވޭ ބުނުމުގައި ހަޤީޤަތެއްވެސް އެބަ އޮވެއެވެ. އެހެނީ އިންސާނުންގެ ތެރެއިންވާ ޝައިޠާނުން އެބަ ތިބި ކަމާއި ތިބޭނެކަން ރަސޫލް (ﷺ) ވަނީ ބަޔާންކޮށްދެއްވަވައިފައެވެ. އަދި ކީރިތި ޤްރްއާނުން ވެސް އެބައޮތެވެ. އައްނާސް ސޫރަތް ބަލާށެވެ!
ކޮންމެ މީހެއްގެ ކިބައިގައިވެސް ޝައިޠާނީ ބާރުތަކެއް ވެއެވެ. އެމީހަކު އެ ބާރުގެ ބޭނުން ހިފަން އިޚްތިޔާރުކޮށްފިނަމަ ކޮންމެ މީހަކަށްވެސް ހިފޭނެއެވެ. އަދި ސަލާމަތްވާން ބޭނުންވާ މީހަކަށް ސަލާމަތްވެސް ވެވޭނެއެވެ.
އިންސާނުންގެ ތެރެއިންވާ ޝައިޠާނުންގެ ނުބައިކަން އިބިލީހަށްވުރެ އެތައް ގުނައަކަށް ނުބައިކަން ބޮޑު ކަމަށް ބުނުމުން ބައެއް މީހުން ހިތް ހަމަ ނުޖެހިގެން ސުވާލުވެސް ކުރެއެވެ. "އެއީ ލަޢްނަތް ލެއްވެވި އިބިލީސް ނޫން ހެއްޔެވެ؟ އަހަރެމެންނަކީ އިންސާނުންނެވެ. އަހަރެމެންނަކީ ލަޢްނަތް ލެއްވިގެންވާ ބައެއް ނޫނެއް ނޫންހެއްޔެވެ؟" މިފަދަ ސުވާލުތައް ކުރެއެވެ.
އެފަދަ ސުވާލުތައް އުފެދޭ މީހުން ވިސްނައިލާށެވެ. އަހަރެމެން އަޢޫޛް ކިޔުމުން ޝައިޠާނާ ދުވެ ފިލާނެއެވެ. ނިކަން އިންސާނީ ޝައިޠާނެއްގެ ގާތު ހުރެ 3000 ފަހަރު ޞަލަވާތް ކިޔަވައި ބަލާށެވެ! އެންމެ އިންޗިއަކަށްވެސް ގުޑައި ނުލާނެވެ. ބަންގީގެ އަޑު އިވުމުން އިބިލީސް ދުވެ ފިލައެވެ. އިންސާނީ ޝައިޠާނެއްގެ ގާތުގައި ހުއްޓާ ބަންގިގޮވާ އަޑު އިވިގެން މިސްކިތަށް ދާން އުޅުނު ނަމަވެސް ހިފަހައްޓާނެވެ. "ފްރެންޑް! ފްރެންޑް!" ކިޔައި ހައްދައިގެން މިސްކިތަށް ދިއަ ނުދީ ހިފަހައްޓާނެއެވެ.
ބަންގި ގޮވުމުން ނަމާދުކުރަން ހުރަސްއެޅޭ ގޮތަށް އެފަދަ ކަންކަން އެކުރަނީ ހަމަ އިންސާނުންގެ ތެރޭގައި ތިބޭ ޝައިޠާނުންނެވެ. ވީމާ ބަލަންވީ އޭނާ އަށް ކިޔާ ނަމަކަށް ނޫނެވެ. ހައްވާ، މޫސާ، ޒަކަރިއްޔާތޯއެއް ނޫނެވެ! ބަލަންވީ އެފަދަ މީހުންނާއި ދުރުހެލިވުމަށެވެ. އާޚިރަތް ހާޞީލުކުރެވޭނީ ޝައިޠާނުންނާއި ގުޅުން ކަނޑާލައިގެންނެވެ.
ފަށަމުން ބުނި ފަދައިން މިއަހަރުގެ ބަރަކާތްތެރި ރަމަޟާން މަސް މިވަނީ ދާދި ގާތުގައެވެ. އެކުވެރިން އަވަހަށް ފުރާނައިލާށެވެ! އަޅުކަމާއި ތިމާ ދުރުކުރުވައި ކުޅިވަރުތަކާއި މުނިފޫހިފިލުވުމާއި ތިމާ ގާތްކުރުވާނެ ކަމަށް ލަފާ ކުރެވޭ އެކުވެރިންނާއި ދުރުހެލިވާށެވެ! ރަމަޟާންމަސް ލިބިގަނެވޭނީ އެއިރުންނެވެ!
- މަޢްލޫމާތު: ބިލާލް އައްސަދުގެ ދަރުސަކުން
