ފާޠިމަތު ނަޢީޝާ ޢަބްދުﷲ ޢަބްދުލްބާރީ
އިސްލާމްދީނުގައި ކަނޑައެޅިގެންވާ އެންމެ ނުބައި 7 ފާފަތަކަކީ އޭގެ ނުބައި ކަމާއި އެކަންތައްތަކުން ދުރުހެލިވުމަށް ތަކުރާރުކޮށް އަޅުގަނޑުމެންނަށް އަންގަވާފައިވާ ކަންތައްތަކެވެ. ނަރަކައިގެ އެންމެ ވޭންދެނިވި ޢަޒާބުތަކުން ތިބާއަށް ސަލާމަތްތެރިކަން ލިބިގަތުމަށްޓަކައި މި 7 ފާފަތަކުން ރައްކާތެރިވުމުގެ މުހިއްމުކަން ބޮޑުވެގެންދެއެވެ.
سورة النساء ގެ 31 ވަނަ އާޔަތުގައި މާތްﷲ ވަޙީ ކުރައްވާފައިވެއެވެ. " ތިޔަބައިމީހުންނަށް އެކަންކަން ނަހީކުރައްވާފައިވާ ބޮޑަތި ފާފަތަކުން ތިޔަބައިމީހުން ދުރުހެލިވެތިބޭނަމަ، ތިޔަބައިމީހުންގެ ކުދިކުދި ފާފަތައް ތިޔަބައިމީހުންގެ ކިބައިން، ތިމަންރަސްކަލާނގެ ފުއްސަވާހުށީމެވެ. އަދި މާތް ވެގެންވާ ތަނަކަށް ( އެބަހި ސުވަރުގެއަށް ) ތިމަންރަސްކަލާނގެ ތިޔަބައިމީހުން ވައަދަވާހުށީމެވެ."
އެހެންކަމުން، އެންމެ ބޮޑެތި ފާފަތަކުގެ ތެރޭގައި ހިމެނޭ ކަންތައްތަކަކީ ކޮބައިތޯ ބަލައިލަމާ ހިނގާށެވެ.
1. މާތް ﷲ އަށް ޝަރީކު ކުރުން
އެކަލާނގެއަށް ޝަރީކުކުރުމަކީ ތިބާ އިސްލާމްދީނުން ނަފީކުރާނެ ކަމެކެވެ.
" ހަމަކަށަވަރުން، ﷲ އެކަލާނގެއަށް شريك ކުރުމުގެ ފާފައެއް ނުފުއްސަވާނެތެވެ. އެނޫން ފާފަތައް އެކަލާނގެ އިރާދަކުރައްވާ މީހަކަށް ފުއްސަވަތެވެ. ﷲ އަށް شريك ކުރާމީހާ ދަންނާށެވެ ! ފަހެ، އޭނާ ދުރުވެގެންވާ މަގުފުރެދުމަކުން މަގުފުރެދިއްޖެކަން ކަށަވަރެވެ. "
2. ޙައްޤަކާ ނުލާ މީހަކު މަރާލުން
“ ބިމުގައި ފަސާދައެއް އުފައްދައިގެން ނޫންގޮތަކަށް، ނަފްސެއް މަރައިފި މީހާ އެންމެހާ މީސްތަކުން މެރިފަދައެވެ." سولرة الماىدة : 32
3. ރިބާ ކެއުން
ރިބާ ދޭމީހާ އާއި ރިބާ ކާމީހާ އާއި އެ ބަލަހައްޓާ މީހާއާއި އެ މުޢާމަލާތުގެ ހެކިވެރިންނަށް ކީރިތި ރަސޫލާ (ޞ) ލަޢިނަތް ލެއްވިއެވެ. ( ސަޙީހް މުސްލިމް )
" ރިބާ ކާމީހުން، ޖިންނި މޮޔަވެގެން، ޝައިޠާނާ ތަޅުވަމުން ފޮޅުވަމުން ގެންދާ މީހަކު ތެދުވާފަދައިން މެނުވީ ( ޤިޔާމަތްދުވަހު އެއުރެން ކަށްވަޅުން ) ނުތެދުވާނެތެވެ. އެހެނީ، އެއުރެން ބުނެއުޅުނީ، ވިޔަފާރި ވާކަން ކަށަވަރީ ރިބާ ކަހަލަ ކަމެއް ކަމުގައެވެ. ނަމަވެސް ވިޔަފާރިކުރުން ވަނި ﷲ ހުއްދަކުރައްވާފައެވެ. އަދި ރިބާ ވަނީ ހަރާމްކުރައްވާފައެވެ. " سورة البقرة : 275
4. ޔަތީމުންގެ މުދާ ކެއުން
" ހަމަކަށަވަރުން، އަނިޔާވެރިކަމުގެ ގޮތުން ޔަތީމުންގެ މުދާ ކައިއުޅޭ މީހުން ދަންނާށެވެ ! އެއުރެން ކައިއުޅޭކަން ކަށަވަރީ ނަރަކައިގެ އަލިފާނެވެ. އަދި، އަނދަ އަނދާ ހުންނަ ނަރަކައަށް އެއުރެން ނިކަންހުރެ ވަންނާނެތެވެ " سورة النساء : 10
5. ހަނގުރާމައިގެ މައިދާނުގައި ކާފިރުންނަށް ފުރަގަސްދިނުން
" އޭ އީމާންވެއްޖެ މީސްތަކުންނޭވެ ! ހަނގުރާމައިގެ މައިދާނުގައި ކުރިމަތިލައި އަންނަނިކޮށް ކާފިރުވި މީހުންނާ ތިޔަބައިމީހުން ބައްދަލުވާހިނދު، އެއުރެންނަށް ފުރަގަސްދީ ތިޔަބައިމީހުން ނުދާހުށިކަމެވެ! ހަނގުރާމައަށް އުކުޅެއް ހަނދާ މީހެއްގެ ގޮތުގައި ނުވަދަ މުއުމިނު އެހެން ބައެއްގެ ފަރާތަށް ޖެހިލާމީހެއްގެ ގޮތުގައި މެނުވީ އެދުވަހުން ފުރަގަސްދީ ދުރަށްދާމީހާ ދަންނާށެވެ ! ފަހެ، އެމީހަކު ﷲގެ ކޯފާއާއިގެން އެނބުރި އަތުވެއްޖެކަން ކަށަވަރެވެ. އަދި އެމީހާ އުޅޭނެތަނަކީ ނަރަކައެވެ. އަދި އެއީ ހާދަހާ ނުބައިވެގެންވާ ނިމިދިޔުމެކެވެ." سورة الأنفال : 15،16
6. ﷲ އަށް އީމާންވެހުރި، ޢިއްފަތްތެރި، މުއުމިން އަންހެނެއްގެ ބޮލުގައި ޒިނޭގެ ތުޙުމަތު އެޅުވުން
" ޢިއްފަތްތެރި އަންހެނުންނަށް ޤަޛުފްކުރާމީހުން، އެކަމުގެ މައްޗަށް ހަތަރު ހެކިން ނުގެނައިނަމަ، ފަހެ އެއުރެންގެ ގައިގައި 80 އެތިފަހަރުން ހައްދު ޖަހާށެވެ! އަދި ދުވަހަކުވެސް އެއުރެންގެ ހެކިބަހެއް ތިޔަބައިމިހުން ޤަބޫލުނުކުރާށެވެ! އަދި އެއުރެންނީ ހަމަ، ފާސިޤުންނެވެ. " سورة النّور : 4
7. ސިހުރުހެދުން
" … އެއުރެން އެ އުނގެނެނީ އެއުރެންނަށް ގެއްލުންދޭ، އަދި އެއުރެންނަށް މަންފާއެއް ނުކުރާކަންތައްތަކެވެ. ހަމަކަށަވަރުން އެތަކެތި ގަތް މީހަކަށް އާޚިރަތުގައި އެއްވެސް ނަޞީބެއްނެތްކަން އެއުރެންނަށް ކަށަވަރުކޮށްވެސް އެނގިފައިވެއެވެ. އެއުރެންގެ ނަފްސުތައް އެއެއްޗަކަށް އެވިއްކައިލި އެއްޗެއްގެ ނުބައިކަން ބޮޑުކަމާއެވެ! އެއުރެން އެކަން ދަންނަކަމުގައި ވިނަމައެވެ. " سورة البقرة : 102
މި 7 ފާފަތަކަކީ އޭގެ ނުބައިކަމުގެ ސަބަބުން ތިބާގެ ހުރިހާ ހެޔޮ ޢަމަލެއް ފުހެވި ދާއިމަށް ނަރަކައިގެ ވޭންދެނިވި ޢަޒާބަށް ތިބާ ހުށްއެޅިގެންދާނެ ކަންތައްތަކެވެ. އެހެންކަމުން މިކަންތައްތަކުން ތިބާގެ ނަފްސު ދުރުހެލިކޮށް ގިނަގިނައިން ހެޔޮ ޢަމަލުކުރުންމަތީ ދެމިހުންނާށެވެ. ﷲއީ ގިނަގިނައިން ފާފަފުއްސަވާ ރަޙީމްވަންތަ ރަސްކަލާނގެއެވެ.
